«Xocalı soyqırımının tanınmaması Azərbaycana qarşı ikili siyasətin nəticəsidir»

Xocalı faciəsindən 19 il ötdü. Ancaq hələ də dünya ictimaiyyəti bu faciəyə hüquqi-siyasi qiymət verməyib. Bəs Azərbaycana qarşı sərgilənən bu ikili yanaşma nədən qaynaqlanır?

Yeni Azərbaycan Partiyasının sədr müavini, icra katibi Əli Əhmədov: «Biz təəssüf hissi ilə bildiririk ki, beynəlxalq təşkilatlarda ikili standartlardan istifadə olunur. Bu gün Xocalı faciəsinə beynəlxalq qiymətin verilməməyinin arxasında da ikili standartlar durur”.

Politoloq Qabil Hüseynli: “Ermənilər qondarma soyqırımını tanıtmaq üçün əvvəlcə miflər yaratmağa başladılar, sonra isə bu mifləri kitablara köçürdülər. Məsələn, Ermənistanda “Erməni genosidi” deyilən qondarma soyqırımı haqqında təxminən 453 kitab çıxıb. Bu kitablar çap olunduqdan sonra bunu dünya miqyasında yaymağa başladılar. Bunlar dünyanın təxminən 89 dilinə tərcümə edilib. Eyni zamanda, tərcümə edilən kitablar bütün dünyaya yayılıb. Dünya ictimai rəyi bu kitabların təsiri altındadır. Daha sonra radiolar, televiziyalar, erməni lobbisinin yeni texnalogiyalara nüfuzu və bu yollarla da təbliğat-təşviqatı geniş qurublar. Biz də bu yola getməliyik. Xocalı soyqırımının bütün anatomiyası araşdırılmalı, bu istiqamətdə müəyyən kitablar yazılıb, yeni kitablar da yazılmalı, zənnimcə Sumqayıt hadisələri də bu kontekstə daxil edilməlidir. Çünki Sumqayıt hadisələri də ermənilərin və Kremlin azərbaycanlılara qarşı törətdiyi təxribatlardan biri idi və Dağlıq Qarabağ müharibəsinin başlaması üçün bir siqnal idi. Bundan əlavə, Qaradağlı kəndində törədilən soyqırımı Xocalıdan bir az kiçik genosiddir. Bundan əlavə, cəmilli kəndində də genosid törədilib. Həmin kəndin əhalisinin təxminən yarısı qırılıb. Yəni Ağdamın bir qəsəbə və iki kəndində azərbaycanlılara qarşı soyqırımı törədilib. Bunların hamısı, eləcə də Kəlbəcərdən əsir düşmüş 4500-5500 insanın taleyi barəsində yazılmalıdır. İndi həmin insanların aqibəti haqqında məlumatlı deyilik. Ya onlar öldürülüb, ya da başlarına başqa müsibətlər gətirilib. Beləliklə, dünyanı erməni vəhşiliyinin miqyası, mahiyyəti, onun təzahür formaları ilə bağlı məlumatlandırmalıyıq. Dünya ictimaiyyətinin bu hadisələrlə tanış olmasına imkan yaratmalıyıq. Bu sahədə həm Xarici İşlər Nazirliyinin, həm Diasporla İş üzrə Dövlət Komitəsinin, həm Elmlər Akademiyasının, həm də Azərbaycanın hər bir vətəndaşının üzərinə böyük bir vətənpərvərlik vəzifəsi düşür”.

Bəs XX əsrin ən dəhşətli faciəsi olan Xocalı soyqırımının dünya dövlətləri və beynəlxalq təşkilatlar tərəfindən tanınması üçün Azərbaycan diaspor təşkilatları hansı işləri görürlər?

Diasporla İş üzrə Dövlət Komitəsinin mətbuat xidmətinin rəhbəri Bəhruz Nəzərov: “Dünyanın ayrı-ayrı ölkələrində Azərbaycan diaspor təşkilatları Xocalı soyqırımının tanınması üçün geniş fəaliyyət göstərirlər. Bu fəaliyyət özünü, əsasən, ayrı-ayrı tədbirlərdə, imzatoplama kampaniyalarında, fəaliyyət göstərdikləri ölkələrin parlamentlərinə, hökumətlərinə və digər dövlət qurumlarına Xocalı soyqırımının, qırğınların çatdırılmasında özünü büruzə verir. Azərbaycan diaspor təşkilatları məskunlaşdığı ölkələrdə əsasən anım tədbirləri, qəzetlər, fotostendlər, Xocalı soyqırımını özündə əksetdirən sənədli filmlər və sair vasitələrdən istifadə edərək həmin ölkələrin ictimaiyyətini və dövlət qurumlarını Xocalıda baş verən soyqırımıyla tanış edirlər. Onları Xocalı soyqırımına obyektiv qiymət verməyə səsləyirlər. Bu il də dünyanın hər yerində anım tədbirləri ciddi şəkildə keçirilir ki, dünyada Xocalı soyqırımının tanınmasında irəliləyiş olsun. Hər il keçirilən tədbirlər daha geniş xarakter alır. Diaspor təşkilatlarımız məskunlaşdıqları ölkədə ictimaiyyət, parlament, dövlət qurumları tərəfindən daha böyük dəstək qazanır. Təbii ki, bütün bunlar onu deməyə əsas verir ki, tədricən Azərbaycanın haqq səsi eşidiləcək və Xocalı soyqırımının genosid aktı olaraq tanınması barədə Azərbaycanın çağırışları pozitiv nəticələr verəcək. Yəni həmin ölkələr və onların hökumətləri müsbət rəy verərək Xocalı soyqırımını genosid aktı kimi tanıyacaqlar”.

Məhərrəm AĞALAROĞLU

Mərkəz.- 2011.- 26 fevral.- S. 8.