Səfir Fuad İsmayılovla vida mərasimi keçirilib

Araz Əzimov: "Fuad İsmayılovun vəfatı Azərbaycan diplomatiyası üçün böyük itkidir"

Vaqif Sadıqov: "Fuad İsmayılov Vyanadakı diplomatik korpusda böyük nüfuza malik şəxs idi"

Dünən Təzəpir məscidində Vyanada vəfat etmiş Azərbaycanın Avstriyadakı fövqəladə və səlahiyyətli səfiri Fuad İsmayılovla vida mərasimi keçirildi. Saat 12.00-da başlanan vida mərasiminə mərhumun qohumları, Azərbaycanda fəaliyyət göstərən diplomatik korpusun təmsilçiləri, hökumət rəsmiləri qatılmışdılar.

Səfirlə vida mərasiminə gələnlər arasında ABŞ-ın Azərbaycandakı səfiri Metyu Brayza, ATƏT-in Bakı Ofisinin rəhbəri Əli Bilgə Cankorel, Avstriyanın Azərbaycandakı səfiri xanım Silviya Mayer-Kaybiç, maliyyə naziri Samir Şərifov, Bakı şəhər İcra Hakimiyyətinin başçısı Hacıbala Abutalıbov, Konstitusiya Məhkəməsinin sədri Fərhad Abdullayev, xarici işlər nazirinin müavinləri Xələf Xələfov, Araz Əzimov, Nadir Hüseynov, nazir müavini, Diplomatik Akademiyanın rektoru Hafiz Paşayev, Mərkəzi Seçki Komissiyasının sədri Məzahir Pənahov, mədəniyyət və turizm nazirinin müavini Sevda Məmmədəliyeva, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Memarlıq və İnşaat Universitetinin rektoru, millət vəkili Gülçöhrə Məmmədova, digər hökumət təmsilçiləri, millət vəkilləri, əməkdar artist Tünzalə Ağayeva, ziyalılar da var idi. Vida mərasiminə gələnlər mərhumun valideynləri, həyat yoldaşı, övladları və digər yaxınlarına başsağlığı verdilər.

Mərasimdə iştirak edən rəmi şəxslərdən bəziləri mərhum səfirlə bağlı xatirələrini jurnalistlərlə bölüşdülər. "Səfir Fuad İsmayılov çox təcrübəli diplomat idi". Bu açıqlamanı jurnalistlərə xarici işlər nazirinin müavini Araz Əzimov verdi. O, F.İsmayılovun vəfatını Azərbaycan diplomatiyası üçün böyük itki adlandırdı.

F.İsmayılovdan öncə Azərbaycanın Avstriyadakı səfiri işləmiş, hazırda Azərbaycanın İtaliyada fövqəladə və səlahiyyətli səfiri olan Vaqif Sadıqov da F.İsmayılovun vəfatını diplomatiyamız üçün böyük itki adlandırdı: "Onun haqqında keçmiş zamanda danışmaq çox çətindir. Biz Fuad İsmayılovla uzun müddət bir yerdə işləmişik, o, bizim həmkarımız və əsl vətənpərvər insan idi. Fuad həm də son dərəcə peşəkar diplomat idi. O, ölkəmizin maraqlarını Avropada, Vyanada, həmçinin ATƏT kimi nüfuzlu bir beynəlxalq təşkilatda təmsil edirdi. Fuad İsmayılov Vyanadakı diplomatik korpusda böyük nüfuza malik şəxs idi. Allah rəhmət eləsin!"

"Fuad İsmayılov çox mehriban dost, təcrübəli diplomat, yaxşı insan idi". Bu açıqlamanı isə jurnalistlərə dəfn mərasimində iştirak edən ABŞ-ın Azərbaycandakı səfiri M. Brayza bildirib: "Fuadı dörd ildir tanıyırdım. Biz onunla tez-tez Dağlıq Qarabağla bağlı aparılan müzakirələrdə görüşürdük. Onun vəfat etdiyini dünən eşitdim və bu, mənə çox pis təsir etdi. Bilirəm ki, onun üçün çox darıxacağam". Dəfn mərasimində iştirak edən M. Brayza F.İsmayılovun yaxınlarına, o cümlədən, atası Nazim İsmayılova başsağlığı verdi.

Xatırladaq ki, Fuad İsmayılov 1968-ci ildə Bakı şəhərində ziyalı ailəsində anadan olub. O, Bakı Dövlət Universitetinin şərqşünaslıq fakültəsinin məzunudur. "Assa-İradə" Azərbaycan Müstəqil İnformasiya Agentliyində əmək fəaliyyətinə başlayıb. 1992-1995-ci illərdə Azərbaycan Respublikası Prezidenti İcra Aparatının xarici əlaqələr şöbəsində, 1998-2005-ci illərdə Azərbaycan Respublikası Xarici İşlər Nazirliyində müxtəlif vəzifələrdə çalışıb. 2005-ci il martın 7-də Azərbaycan Respublikasının Avstriya Respublikasında fövqəladə və səlahiyyətli səfiri təyin edilib. Səmərəli fəaliyyətinə görə 2009-cu ildə "Azərbaycan Respublikası diplomatik xidmət orqanlarının 90 illiyi (1919-2009)" yubiley medalı ilə təltif olunub. Azərbaycanın Avstriyada fövqəladə və səlahiyyətli səfiri, BMT-nin Vyanadakı bölməsində, ATƏT, BMSİT, AEBA və NSTQOMT yanında Azərbaycan Respublikasının daimi nümayəndəsi, eyni zamanda, Sloveniya və Slovakiya Respublikasındakı fövqəladə və səlahiyyətli səfiri idi. Fuad İsmayılov uzun sürən xəstəlikdən sonra fevralın 23-də Vyanada vəfat edib.

Səxavət Həmid

Mərkəz.- 2011.- 26 fevral.- S.5.