Daha bir teatrda rejissor dəyişikliyi

Musiqili Komediya Teatrında «Fransızsayağı qarnir» hazırlanır

Akademik Dram Teatrından başlayan islahatlar digər teatrlarda da tətbiq olunmaqdadır. Məqsəd - repertuarı yeniləmək və tamaşaçıya fərqli səhnə əsərləri təqdim etməkdir. Tezliklə Azərbaycan Dövlət Musiqili Komediya Teatrının afişalarında daha bir rejissorun adı görünəcək. Belə ki, Mark Kamolletinin «Xoşbəxt ailə oyunu oynayırıq və ya fransızsayağı qarnir» əsərini teatrın rus bölməsində əməkdar incəsənət xadimi Əsgər Əsgərov hazırlayacaq. Prezidentin 18 may 2009-cu il tarixli 277 nömrəli Sərəncamı ilə təsdiq olunan «Azərbaycan teatrı 2009-2019-cu illərdə» Dövlət Proqramına əsasən, Mədəniyyət və Turizm Nazirliyinin apardığı islahatlar çərçivəsində Musiqili Komediya Teatrında hazırlanacaq yeni tamaşanın quruluşçu rejissoru artıq bir neçə gündür ki, məşqlərə başlayıb. Tamaşanın musiqi rəhbəri əməkdar incəsənət xadimi Nazim Hacıəlibəyov, quruluşçu rəssamı Nabat Səmədova, ikinci rejissoru əməkdar artist Boris Qrafkindir. Teatrdan merkez.az saytına verilən məlumata görə, Əsgər Əsgərov uzun illər Naxçıvan Dövlət Musiqili Dram Teatrında çalışıb, 1990-1996-cı illərdə teatrın baş rejissoru işləyib.

Moskvada, Mayakovski adına Akademik Dram Teatrının baş rejissoru A.Qonçarovun yanında təcrübə keçdikdən sonra Akademik Milli Dram Teatrında quruluşçu rejissor vəzifəsinə dəvət edilib. Bu teatrda Viktor Rozovun «Şadlıq sorağında», Nəbi Xəzrinin «Burla xatun», Kamal Abdullanın «Hərdən mənə mələk də deyirlər…», Jan Batist Molyerin «Skapenin kələkləri», A.Kamyunun «Anlaşılmazlıq» və s. əsərlərinə quruluş verib. Həmin tamaşalar dəfələrlə teatrın yaradıcı heyətinin təqdimatında xarici ölkələrdə keçirilən teatr festivallarında nümayiş etdirilib və mükafatlara layiq görülüb.

Onu da qeyd edək ki, teatrın rus truppası tərəfindən təqdim olunacaq tamaşada aparıcı aktyorlar Nərgiz Kərimova, Nadejda Povelisina, Fərid Əliyev, Rauf Babayev, Emil Heydərov, Əliməmməd Novruzov, Svetlana Bulax, İzabella Şves, Marina Litvinenko, Yuliya Heydərova, Firuz Məmmədov, Rauf Babayev və başqaları çıxış edəcəklər.

Teatrdan onu da bildirdilər ki, bu, islahatlar istiqamətində atılan ilk addımdır. Bu addımın davamı olaraq qarşıda Musiqili Komediya Teatrında yeni tamaşaların hazırlanması gözlənilir. Onu da öyrəndik ki, yeni tamaşalar yalnız Azərbaycan tamaşaçısı üçün nəzərdə tutulmayıb. Bu tamaşaların ölkə hüdudlarından kənarda-teatr festivallarında da nümayiş olunması da planlaşdırılır.

Cəvahir SƏLİMQIZI

Mərkəz.- 2011.- 4 mart.- S. 11.