«İnsan alverinin arxasında kişilər durur,
amma qadınlar cəzalandırılır»
İnsan Alverinə Qarşı
Mübarizə İdarəsinin
2010-cu ildə həyata
keçirilmiş əməliyyat-axtarış
tədbirləri nəticəsində
183 cinayət faktı
qeydə alınıb. Bu barədə qurumun 2010-cu ildə gördüyü işlərə
dair yaydığı
arayışda deyilir.
Sənəddə bildirilir
ki, onlardan 70-i insan alveri,1-i məcburi əmək,
3-ü seksual hərəkətlərə
məcbur etmə, 2-i yetkinlik yaşına çatmayanları fahişəliyə
və ya əxlaqsız əməllərə
cəlb etmə, 5-i pornoqrafik materialları və ya əşyaları
qanunsuz yayma, 63-i fahişəliyə cəlb
etmə, 77-i isə əxlaqsızlıq yuvaları
saxlama ilə bağlı olub. “İnsan alveri cinayətilə bağlı
70 cinayət faktı qeydə alınıb, cinayətləri törətdiklərinə
görə 39 şəxs
cinayət məsuliyyətinə
cəlb edilib və insan alveri
qurbanı olan 34 nəfər müəyyən
olunub. Bu müddət
ərzində keçirilmiş
tədbirlər nəticəsində
8 cinayətkar qrup aşkar olunub. İctimai mənəviyyata
zidd hərəkətlərə
yol verdiyinə görə İnzibati Xətalar Məcəlləsinin
308-ci maddəsi ilə
109 nəfərə inzibati
protokol tərtib edilib, dövlət nəfinə 4.251 manat pul ödətdirilib”, - deyə arayışda qeyd olunur.
İdarə tərəfindən müəyyən
edilib ki, 34 qurbandan 27-si sığınacağa
yerləşdirilib, onların
əksəriyyəti cəmiyyətə
reinteqrasiya olunub, qurbanların hamısına
hüquqi, tibbi və psixoloji yardımlar göstərilib. İnsan alveri qurbanlarının
uşaqlarından 2-si internat
məktəbinə, 5-i isə
uşaq baxçasına
yerləşdirilib. Nazirlər
Kabinetinin müvafiq qərarına əsasən,
insan alverindən zərər çəkmiş
30 nəfərə reinteqrasiya
dövründə birdəfəlik
müavinətlər, 5 nəfərə
isə İnsan alveri qurbanlarına Kömək Fondundan yardımlar verilib.
“Qaynar xətt” xidmətinə 2010-cu ildə
müxtəlif məsələlərlə
bağlı 13.699 məlumat
daxil olub, onlardan 15-i insan alverindən zərər çəkmiş və ehtimal olunan şəxslər barədə,
1.436-sı xaricdə işə
düzəlmə ilə
bağlı, 651-i xaricdə
təhsil alma, 82-si xarici
vətəndaşla nikah
bağlama, 9.376 məlumat
isə digər məsələlərlə əlaqədar
olub. Zəng etmiş abonentlərə
müvafiq məsləhətlər
verilib.
Göründüyü kimi, quldarlıq
dövrü çoxdan
başa çatsa da, insanların qul kimi alınıb-satılması
faktlarına bu gün də rast gəlinir.
Qeyd edək
ki, insan alveri 1807-ci ildə Böyük Britaniyada,
1808-ci ildə isə
ABŞ-da qadağan olunandan sonra, 1926-cı ilin sentyabrın 25-də Cenevrə Konvensiyası ilə dünyanın bir neçə aparıcı dövləti
birlikdə bu problemlə mübarizəyə
qoşulublar. Amma birgə
səylər də insan alverinin geniş vüsət almasını əngəlləyə
bilməyib. Ona görə də
1956-cı il sentyabrın 7-də Cenevrə
Konvensiyasına əlavədən
sonra bu sənədə qoşulan
dövlətlər insan
alveriylə daha mütəşəkkil şəkildə
məşğul olmağa
başlayıblar.
Azərbaycanda isə insan alveri probleminin
mövcudluğu rəsmi
şəkildə 2003-cü ildə təsdiqlənib. Həmin ilin may
ayının 6-da prezidentin
fərmanı ilə Azərbaycan Respublikasında
İnsan Alverinə qarşı Mübarizə
üzrə Milli Fəaliyyət Planı qəbul olunub. Avqust ayının 4-dən isə
Azərbaycanda İnsan
Alverinə Qarşı
Mübarizə haqqında
qanun qüvvəyə
minib. Ölkədə insan alverinə
qarşı mübarizə
aparılsa da, QHT rəhbərləri mübarizənin
hələ ki, effektli olmadığını
söyləyirlər.
İnsan alverçilərinə
yüngül cəza verilir
Miqrantlara Hüquqi Yardım
Mərkəzinin direktoru
Əlövsət Əliyev
deyir ki, indiyədək insan alveri ilə məşğul olan mütəşəkkil, transmilli
cinayətkar qruplar aşkar edilsə də, onların himayədarları hələ
də məsuliyyətə
cəlb olunmayıb. Onun sözlərinə
görə, bu növ cinayətlərin istər ibtidai istintaqda, istərsə də məhkəmə baxışında araşdırılması
zamanı insan alveri əməli ilə paralel törədilən cinayət
əməllərinə qiymət
verilmir: «Cinayət işlərinin nəzarət
icraatlarının və
məhkəmə hökmlərinin
öyrənilməsi göstərir
ki, insan alveri qurbanlarının zərərçəkmiş şəxs
kimi tanınmasına səbəb, onların ancaq cinsi istismara
məruz qalması olub. Faktiki isə
bu cür cinayət törətməkdə
təqsirləndirilən şəxslər
qurbanların cinsi istismarı cinayəti ilə bərabər, bəzən qurbanlara saxta sənədlərin düzəldilməsi və
verilməsi, qurbanlara qarşı əxlaqsız
hərəkətlərin edilməsi,
onların döyülməsi,
narkotik maddələrin
əldə edilməsi,
saxlanmasına, qəbuluna
məcbur edilməsi və s. bir çox cinayətlər də törədilir. Ancaq DİN-nin İnsan Alverinə Qarşı
Mübarizə İdarəsinində aparılan cinayət
işlərinin istintaqı zamanı bu faktlar nəzərə
alınmır».
Mərkəz rəhbərinin dediyinə görə,
işlərə baxılan zaman məhkəmələr də
eyni mövqeni tutur. Bu
cinayəti törətmiş şəxslərin, eyni zamanda, həmin
əməllərə görə məsuliyyətə cəlb
olunmaması insan alverinə qarşı aparılan mübarizənin
effektivliyini azaldır, cinayət törətmiş şəxslərin
yenidən həmin cinayəti törətmələrinə
şərait yaradır.
Qadın
alverinin başında
duran kişilərdir
Ə.Əliyevin sözlərinə
görə, daha bir nöqsan insan alveri cinayətinin qrup şəklində törədilməsinin nəzərə
alınmamasındadır: «İnsan alveri, yəni şəxsin
alqı-satqısı cinayətləri təbii ki, daha çox
qabaqcadan əlbir olan bir qrup
şəxs, mütəşəkkil dəstə, daha çox isə transmilli cinayətkar birliklər tərəfindən
törədilir. Ölkəmizdə isə bu
il bu sahədə 8
cinayətkar qrup aşkarlanıb. Mütəşəkkil qrupun üzvlərinin bir
neçə ölkə ərazisində fəaliyyətini, bu cinayətdən gələn gəlirlərin həddən
artıq yüksək olmasını, eyni zamanda, bəzi hallarda fiziki zorun tələb
olunmasını nəzərə alsaq, bu cinayətin təşkilatçılarının
birmənalı olaraq kişilər
olması inkar
olunmazdır. Amma bir qayda olaraq qadınların
məsuliyyətə cəlb edilməsi ölkədə bu cinayətlərə qarşı mübarizənin qeyri-effektivliyinin,
ibtidai istintaqa prokuror nəzarətinin olduqca aşağı olmasının göstəricisidir.
Qonşu
ölkələrdən Rusiya
Federasiyasının təcrübəsinin öyrənilməsi
zamanı müəyyən olunub ki, insan alveri
cinayətlərə görə
məsuliyyətə cəlb olunanların 56-58 faizini
kişilər təşkil
edir. Ölkəmizdə
bu cinayətlərin təşkilatçılarının
daha çox qadınlar olması təbii ki, real deyil.
Əslində, bu məqsədli
şəkildə edilir.
Çünki məhkəmələr
tərəfindən qadınlara daha yüngül cəza təyin
olunur. Ona görə də cinayətkar qrupun qadın üzvlərinin məsuliyyətə cəlb
olunması faktlarına üstünlük
verilir. 2006-cı ildə cinayət məsuliyyətinə
cəlb olunan 58 nəfərdən
11 nəfərinin kişi, 47 nəfərinin isə qadın olması bunun canlı sübutdur".
Qadın Krizis Mərkəzinin rəhbəri
Mətanət Əzizova da insan
alveri qurbanlarının dövlət xətti
ilə reabilitasiya və
reinteqrasiyasının aparılmasından
razı deyil. Onun sözlərinə görə, belə olduqda insan alveri
qurbanları yenidən qurbana çevrilir. Ailəyə qayıtdıqdan sonra isə öldürülür. M. Əzizova deyir ki, ölkə daxilində
də insan alverinin qurbanına çevrilənlər çoxdur. Amma qanunla yalnız xarici ölkələrə satılanlar
insan alveri qurbanları sayılır. M.Əzizovanın
sözlərinə görə, ölkədaxili bu alverin qurbanına
çevrilənlərin statistikası aparılsa, say ,nəinki 34-ü, hətta
334-ü keçər.
Zülfiyyə
QULİYEVA
Mərkəz.- 2011.- 4 mart.- S.8.