Qloballaşma və mədəniyyət
(esse)
Qloballaşma...
Qloballaşan dünya...
Yəqin
ki, günümüzün elmi dövriyyəsində ən
çox işlənən ifadə və sözlər elə
bunlardır. Qloballaşmanın mahiyyətində və hərfi
mənasında bir “böyük” və “nəhəng”
anlamı dayanır. Amma əslində, bu “böyüklük
özlüyündə bir “kiçiklik” və ya “kiçilməni”
də ehtiva edir. Yəni, bir yandan “böyüyən” dünya
digər tərəfdən həm də “kiçilir”. İndi
dünya az qala “ovcumuzun içində” yerləşir. Adi mobil
(çevik) telefon istədiyimiz zaman dünyanın istənilən
nöqtəsi ilə bizim rabitə əlaqəmizi yarada bilir.
Elə-belə, xoş güzarandan
yaranmayıb, bu “kiçilən” qlobal dünya. Bəşəriyyət
dünyanı öz noosferinə çevirmək
üçün milyon illər yol gəlib. Hər halda, elmi
müddəalar “insan növünün” yaşının
dörd-beş milyon ilə yaxın olduğunu israr və iqrar
edir. Amma bu, heç də ən uzun yol və məsafə
hesab olunmur. Əslində bu, insanlığın keçib gəldiyi
ən qısa yoldur. Bu yolu qısaltmağa adi adamlar müyəssər
ola bilməzdi. Dahilərin seçdiyi və keçdiyi yoldur,
bu “qısa” yol. Min illər boyu öz inad və
ehtiraslarının hesabına müqavimət göstərən,
vuruşan, çarmıxa çəkilən, boyunları
gilyatino baltaları ilə vurulan dahilərdən söhbət
gedir, əlbəttə. Bütün tarix boyu lokal və qlobal
nadanlığın girdabında inildəyən, zaman-zaman təsadüfi
və mütəşəkkil cəhalətin məngənəsində
sıxılan dahilər- əsl insan örnəkləri,
zamanı kəsə yolla addımlamağa
çalışıblar. Kəsə yol üçünsə
həmişə öndə gedən cəsurlara, qəhrəmanlara
ehtiyac duyulub. Dəstəsini, qatarını öz arxasınca
çəkib gedən durnada belə bu cür “qorxmazlıq”,
“öndərlik” hissi olmamış deyil, o ki ola insan
övladı.
Öz yolunu insan özü seçir,
özü müəyyənləşdirir.
İnsanın seçdiyi yol
birbaşa tarixdən keçir. Tarixi
və zamanı da insan yaradır. İnsan yoxsa tarix də,
zaman da yoxdur. Və onu da qeyd etmək lazımdır ki, bizə
məlum olan “rəsmi” tarixdən başqa bir tarix də var. O
tarix hər kəsin içində yaşayır. Və yaxud
belə deyək, hər bir fərdin öz təfəkkürü
ilə bağlı bir tarix də mövcuddur. Bu mənada Yer
üzündə yaşayan insan nəslinin hər bir
üzvü “tarixçilərin” qərarlaşdığı
“ümumi” tadixdən başqa, həm də lokal, “xüsusi”
bir tarixi zonada yaşayırlar. Hər iki “tarix” paralel
yaşayır. Amma bu “tarixlər” heç vaxt kəsişmir.
Dahi ilə cahilin eyni məkanda yaşaması bəlkə də
mümkündür. Amma onların eyni zamanda, yaşaması
qeyri-mümkündür. Onların hərəsinin “öz”
tarixi, öz tarixi zonası, bir sözlə, “öz zamani” var.
Dünya
statik deyil, dinamikdir.
Dünyada
hər şey hər an dəyişmədədir.
Qloballaşan
dünyada insanın özü və insan həyatı ilə
bağlı olan bütün nəsnələr, dəyərlər
və münasibətlər də anbaan dəyişir.
Qloballaşmanın ağır dalğaları çox
şeyin üstündən ötüb keçir, nəticədə,
insan fəaliyyətinin yekunu kimi meydana çıxan bir
sıra maddi və mənəvi mədəniyyət elementləri
(və bir çox hallarda təkcə «elementlər» deyil,
özüllər də) əriyib gedir, sonsuzluğa və ya
heçliyə qovuşur.
Amma
qloballaşma təkcə «köhnənin» üstündən xətt
çəkmir; o özü ilə «yenilik» və yeniliklər
gətirir. Elm və texnikanın sürətli inkişafı
fonunda sosial tərəqqi çox ləng gedir. Obrazlı desək,
bir tərəf kosmik sürətlə, digər tərəfsə
tısbağa yerişi ilə irəliləyir. Sanki zamanın
(və məkanın) ənənəvi ölçüləri
dəyişib: indi daha çox «kiçilən» məkan və
«sıxılan» zaman haqqında söhbət gedə bilər.
Müasir kommunikasiya şəbəkələri bir tərəfdən
planetlər, dövlətlər, millətlər, regionlar və
insanlar arasında əlaqələri sürətləndirir,
digər tərəfdənsə bu saydığımız
komponentlər arasında «özgələşmə» gedir. Əlaqələrin
intensiv inkişafı nəticəsində «birləşən»
insanlar bir çox hallarda həm də ətraf aləmdən
təcrid olunur, cəmiyyətə (və həm də
özünə) yadlaşır, nəticədə
“ayrılan” insanlara çevrilir.
Əvvəlcə
sivilizasiyalar haqqında bir neçə söz. Qloballaşma mərhələsində
sivilizasiyaların mövcud hüdudlarını dəqiqləşdirməyə
cəhd, özlüyündə təbii
qarşılanmalıdır. Çünki elmi dövriyyəyə
buraxılan hər bir hadisə, anlayışın konkret
status və parametrini müəyyənləşdirmək bu və
ya digər sahənin daxili mahiyyətindən irəli gəlir.
Biz
artıq dediyimiz kimi belə hesab edirik ki, ümumiyyətlə,
sivilizasiyanın konkret tərifini vermək, onun dəqiq
konturlarını göstərmək çox çətin məsələdir.
A.Toynbi yazırdı ki, elm, sivilizasiya kompleksinin parametrlərini
müəyyən etmək üçün hansısa metodoloji
alətə malik deyildir. Ən yaxşı halda biz konkret
sivilizasiyanı təsvir edirik, amma onun sistem təşkil edən
əsaslarının nədən ibarət olduğunu bilmirik.
(Davamı
növbəti sayımızda)
Firuz MUSTAFA
Mərkəz.-2011.-15 mart.-S.15.