Qloballaşma və mədəniyyət
(əvvəli
qəzetimizin ötən sayında)
Tanınmış
yazıçı-dramaturq, fəlsəfə elmləri doktoru Firuz Mustafa
«Qloballaşma və mədəniyyət» adlı esse
qələmə alıb.
Yazıçının redaksiyamıza təqdim
etdiyi əsər ilk dəfə «Mərkəz» qəzetində çap olunur. Qeyd edək ki, «Qloballaşma və mədəniyyət»
kitab şəkilində
də çap ediləcək.
Sivilizasiya bir istilah kimi meydana gəldiyi vaxtdan ən
müxtəlif formalarda şərh və təhlil edilməyə başlamışdır. O, cəmiyyət
hadisəsi olduğu üçün
əksər mülahizələrdə insan birliklərinin fəaliyyəti ilə çarpaz
şəkildə öyrənilməkdədir.
Rus tədqiqatçısı
A.Semyonnikova sivilizasiyanı
insan birliyi və cəmiyyət kimi xarakterizə edərək göstərir ki,
hansısa genetik bir kod mövcuddur
və həmin kod sivilizasiyanın
inkişafının magistral
axınını müəyyən
edir; bu hal isə sözün müəyyən mənasında
sivilizasiyanı mistik hadisəyə
çevirir.
Bəzi tədqiqatçılar
sivilizasiyanı sözün müəyyən mənasında
malik olduğu «mistiklikdən» çıxararaq onun konkret radiusunu
müəyyənləşdirməyə
çalışır və belə hesab
edirlər ki, sivilizasiya müxtəlif subyektlərin (adamlar, kəndlər,
sosial qurumlar, xalqlar və s.) mədəniyyət birliyinin ən yüksək səviyyəsidir.
Belə hesab edirik ki,
sivilizasiyanın subyektləri haqqında söylənilən bu cür mülahizələrdə
elə bir yenilik nəzərə çarpmır. Əslində
mədəniyyətin subyektlərini də həmin «obyektlər»
(fərdlər), sosial icmalar
(tələbələr, mühəndislər və s.), sosial institutlar
(ailələr,
məktəblər, ordu və
s.), habelə xalqlar ( ingilis, türk,
rus və s.) təşkil edir.
Məntiqi nəticə
çıxır: əgər sivilizasiya insan birliklərinin məcmusundan
təşkil olunmuşsa, deməli, tarixin ayrı-ayrı mərhələlərində
mövcud olmuş siyasi sistemlər də sivilizasiyaların
başlıca elementləri kimi qəbul oluna bilər. Elə
məhz bu səbəbdəndir
ki, bir çox
müəlliflər öz
əsərlərində keçmiş
imperiya və orta əsrlər dövlətlərini də sivilizasiya hesab edirlər. Əslində
isə həmin dövlətlər mahiyyətcə sivilizasiya deyil, siyasi birlikdir; çünki bu cür birliklərə (və ya birləşmələrə)
sivilizasiya institutları (dil,
din, dövlət) daxil
olmur. Bu birliyə hər
şeydən əvvəl mövcud xalqların mənəvi-dünyagörüşü
elementləri və ya geniş
mənada mövcud dövlətlərin mənəvi-mədəni
bütövlüyü daxil
olmalıdır. Bu mənada
Y.Yakobskinin yazdığı kimi, sivilizasiya müxtəlif tiplərə malikdir;
onların bir qisimi ümumi dil və etnik mənşəyə
malik qonşular kimi yaşayıb vahid dövlətə malik olmuşlar, başqa bir qisim dövlət kimi mövcuddur, üçüncülər dini
birliklər şəklindədir, dördüncü
tipə müxtəlif
sosiomədəni keyfiyyətlərin birliyinə daxil olanlardır.
Bu sivilizasiyalardan
danışarkən (misal
olaraq, müasir dövrdə) birincilərə Qərbi
avropalıları, ikincilərə Çin,
Hindistan və Şimali Amerikanı, üçüncülərə
müsəlmanları, dördüncülərə Afrika, Okeaniya, Latın
Amerikasını və s. daxil
etmək olar.
Amma heç
də bütün tədqiqatçılar
sivilizasiyaların təsnifat və bölgüsünü təkcə
insanların tarixi birliyi prizmasında nəzərdən
keçirmirlər. Məsələn, P.Sorokin
sivilizasiyanı sırf
mədəniyyət baxımından inteqrasiya
etməyi məqbul
sayır. O, göstərir ki, mədəniyyət iki və
ya daha çox
fərdin fəaliyyətinin nəticəsi kimi
təsəvvür olunur.
Mədəniyyət fenomeni kimi təkcə fəlsəfə,
elm, texnika və i.a. deyil,
habelə ən sadə maddi elementlər də
götürülə bilər (məsələn, qum üzərində ləpir və s.). Əgər adi halda sivilizasiya insanların tarixi birliyidirsə və
özlüyündə mədəniyyətin maddi
və mənəvi elementlərini birləşdirirsə,
P. Sorokinə görə, bu (yəni sivilizasiya), hər
şeydən əvvəl mədəniyyət elementləri sistemidir və bu sistem onların
yaradıcı və müşahidəçilərindən
asılı deyildir.
Sivilizasiya mədəniyyətin
məntiqi-məna inteqrasiyasının forması kimi iki tərəfi
birləşdirir; bunlar daxili
və xarici tərəflərdir.
Daxili tərəfə «zəka, dəyərlər,
məna sferası» daxildir. Həmin
tərəfi P.Sorokin
«mədəni mentallıq»
adlandırır. Daxili tərəf
(mədəni mentallıq) xarici
tərəfi (maddini)
idarə edir.
Lüdviq fon
Mizes sivilizasiyanı həyatın adi bioloji və fizioloji aspektindən fərqləndiyini yazır və göstərir
ki, bu fərqin
əsasında ideya dayanır; yəni
sivilizasiyanın mahiyyətini ideyalar təşkil edir. Və elə
bu baxımdan da iddia etmək
olar ki, sivilizasiyanı əslində
ideyalar idarə edir.
Bizcə, həmin fikirlərin doğruluğu şübhə
yarada bilməz. Həqiqətən, sivilizasiyanın kvintessensiyasında ideyalar
dayanır.
Lakin biz belə hesab edirik ki, burada
söhbət hansısa
mücərrəd və
ya «çılpaq» ideyadan deyil, gerçəkliyə çevrilən
ideyadan gedir və ya getməlidir.
Qloballaşma mərhələsində
sivilizasiyanın «məkanı»
da genişlənir. İnsan idrakının yeni
sahələrə nüfuzu
istər-istəməz mövcud
problemə yenidən nəzər salmağı
zəruri edir. Müasir texnoloji nailiyyətlər müstəvisində artıq
təkcə «real» mövcud
olanlar deyil, virtual «gerçəkliklər» də
mədəniyyətin (eləcə
də sivilizasiyanın)
komponentlərinə daxil
edilməkdədir. Lap sadə bir misal
çəkmək olar:
vaxtilə bir çox klassiklərin epistolyar janrda, daha doğrusu, məktub şəklində
yazdığı əlyazmaların
əksəriyyəti sonralar
qiymətli sənət
və mədəniyyət
nümunələri kimi
dəyərləndirilmişdir. Doğrudur, əslində ən adi kağız parçası və həmin kağız parçası üzərində
ən adi adamın yazdığı
ən adi məktub belə özlüyündə mədəniyyət
hadisəsidir. Lakin indiki
halda kompyuter vasitəsi ilə yazılan və internetlə istənilən
ünvana göndərilən
məktublar kəmiyyət
və keyfiyyət cəhətdən keçmişdə
yazılanları dəfələrlə
üstələmişdir. İndiki
virtual sənət və
adi yazışma nümunələrini rahatca
böyük mədəniyyət
hadisəsinin tərəddüdsüz-filansız
hissəsi kimi qəbul etmək lazımdır. Və elə
buradaca vurğulamaq istərdik ki, sivilizasiya təkcə insanın yer üzündə qurub-yaratdıqlarını
deyil, onun “yerdənkənar” fəaliyyətini
də qapsayır, ehtiva edir. Yəni bu, əslində noosferi əhatə edən bir hadisədir.
(davamı növbəti
sayımızda)
Firuz MUSTAFA
Mərkəz.- 2011.-16 mart.-S.15.