«Bunca
zorluqlara rəğmən, nəsə yazırıqsa, qəhrəmanıq»
Oktay
Hacımusalı imzası ədəbi aləmdə olan hər
kəsə tanışdır. Zəhmətkeş, durmadan
çalışan, fərqli düşüncəsi ilə
tanınan bir yazardır, Oktay. Çölçülər Ədəbiyyat
Mərkəzini quranlardan biri olub. Uzun müddət ÇƏM-in
təbliğatı ilə məşğul olduqdan sonra Azərbaycan
Yazıçılar Birliyində fəaliyyətini davam
etdirib. AYB üzvü kimi “Prezident təqaüdü”
alanların sırasında olub. Əsərləri mütəmadi
olaraq dövrü nəşrlərdə
işıqüzü görüb. Hal-hazırda “Xalq Cəbhəsi”
qəzetinin yazarıdır.
-
Çağdaş ədəbi proseslərə nikbin baxanlar
çox azdır. Azərbaycan
ədəbiyyatında son dövrlərdə gedən prosesləri
necə dəyərləndirirsən?
- Azərbaycan ədəbiyyatında
gedən proseslər mənə həm maraqlı gəlir, həm
də maraqsız. Maraqlı gəlir, ona görə ki, Azərbaycan
ədəbiyyatı dinamik bir şəkildə inkişaf edir.
Ortaya yeni imzalar çıxır, yeni söz deyilir, bu sözlərin
arasında yeni sözlər çoxdur. Eyni zamanda,
maraqsızdır. Çünki Azərbaycan ədəbiyyatı
bir monotonluq yaşayır. Bu, yeni imzaların yazdıqları
bir-birinin təkrarıdır. Bu qədər yazar
çoxluğunda insanı silkələyən, insanı
varından-yoxundan edən əsərlərin sayı bir əlin
beş barmağını keçmir. Bazar böyükdür,
adam çoxdur, amma bu bazarın böyüklüyündə,
adamın çoxluğunda oxuyub zövq ala biləcəyin əsərlər
çox azdır. Bir qisim yazarlar var ki, inkarçı
olduqlarını iddia edirlər. “Mən inkarçıyam”, -
deyirlər. Amma inkar etmək üçün də ortaya o
inkar etdiyinin yerinə nəyisə qoymağı
bacarmalısan axı. Bunlar ortaya bir əsər qoymadan nələrisə
inkar etməyə çalışırlar.
-
Mən “inkarçı”larla bağlı sual verəcəkdim,
sən məni bir balaca qabaqladın. Bizim ədəbi nəsil
inkarçı ədəbi nəsildir. Və biz
“altmışıncı”lardan fərqli olaraq nəyi inkar
etdiyimizi çox gözəl bilirik. Hamımız ənənəni
inkar edirik, amma ortaya qoyduğumuz ən yaxşı halda
dekonstruksiyadan o yana keçmir. Səncə, bizdə
keçilmiş yolları yenidən keçmək prosesi nə
vaxta kimi davam edəcək?
- Bizdə bir anlam
qarışıqlığı yaşanmaqdadır.
Çoxları müəyyən anlayışları bilmirlər,
bilməməklə yanaşı, bu dəbə uyaraq onun
haqqında danışmaqdan çəkinmirlər. Mən bu
yaxınlarda nisbətən yaşlı nəslin nümayəndəsi
ilə bu barədə fikir mübadiləsi edirdim. Ondan
soruşanda ki, “siz modernizm deyəndə nəyi nəzərdə
tutursunuz», cavab verdi ki, çılpaqlığı. Halbuki,
modernizm heç də çılpaqlıq demək deyil. Mən
onları qınamıram. Amma eyni zamanda, qınayıram da.
Qınamıram, çünki Azərbaycanda, hətta
özündən deyən ədəbiyyat alimləri, elm
adamları bu mənada çox piyadadırlar. Onlar dünyada
gedən ədəbi prosesləri izləməyiblər, izləmirlər
və izləməyəcəklər də... Çünki
artıq onların ədəbi tutumu dolub. Yəni, bir məkanda
ki, elm adamları, bu sahənin biliciləri bu məsələdə
ciddi mənada səy ortaya qoyub, müstəqillikdən
sonrakı Azərbaycan ədəbiyyatında gedən prosesləri
araşdırmayıblar. Bu suala hələ də cavab tapmayıblar
ki, Azərbaycan ədəbiyyatında modernizm tam mənasıyla
yaşandımı? Yaşandısa, hansı cərəyanlar
bunun ilkin təzahürlərini özündə əks elətdirir?
Əgər yaşanmadısa, niyə indi bəziləri durub
iddia edirlər ki, biz postmodernistik? Hələ bu suallara cavab
tapılmayıb. Bu baxımdan mən bu insanları
qınamıram. Amma eyni zamanda, qınayıram, çünki
Azərbaycan oxucusu hələ modernizmlə libido,
poststrukturalizm və nü ədəbiyyat nümunələrini
bir-birindən ayıra bilmir. Düşünün ki, bir gənc
kal, yetişməmiş halda şəhərə yeni qədəm
qoyur və o, çox-çox üzr istəyirəm, elementar
bir xanımla münasibətin nə olduğunu belə bilmir.
O ki qaldı həmin xanımla davranmağın qaydaları
olsun. Bu, nəticə etibari ilə ədəbiyyatı təbiri-caizsə
çirkləndirməyə gətirib çıxarır. Yəni
bu gənc içindəki o ehtirası, o
çılğınlığı kağıza qusur, nəticədə
libido ədəbiyyatı yaranır. Və eyni zamanda,
yanlış anlaşılmalara yol açır. Biz hardasa bunu
müstəqilliyin ilk illərində yaranan sarı mətbuatla
da müqayisə edə bilərik. Sarı mətbuatın
oxucularının əksərini Bakıya həmin dövrdə
işləməyə gələn gənclər təşkil
edirdi. Bir də var nü ədəbiyyat. Həmin ədəbi
nümunələrə underground da deyirlər bəzən.
Küçə ədəbiyyatı. Yəni, bu gün
küçədə nə baş verirsə, onun eynisini ədəbiyyata
gətirirlər. Bunların hamısı dünyada
keçilmiş proseslərdir. Məsələn, underground ədəbiyyatının
atası sayılan Çarlz Bukovskidən tərcümələr
də eləmişəm. Mən bunu ədəbiyyata gətirməyin
tərəfdarı deyiləm əslində, amma gərək
Azərbaycan oxucusunun bunlardan xəbəri olsun. Dünyada gedən
ədəbi proseslərdən xəbərimiz olmalıdır
ki, bu gün bəzilərinin - tutaq ki, Rasimqaracaların, Nərminkamalların,
Seymurbaycanların, Əliəkbərlərin Azərbaycan
oxucusuna sırımağa çalışdığı o dəyərlərin,
o yolların artıq çoxdan köhnəldiyinin fərqinə
varaq. Bu gün Azərbaycan oxucusunun böyük bir hissəsinin
məlumatsızlığından istifadə edən bəzi
qüvvələr, konkret yuxarıda adlarını
sadaladıqlarım və bu qəbildən olan bəzi insanlar
at oynadırlar. Hələ bu insanların özlərini
“postmodernist” adlandırması da başa düşülən
deyil.
Yəhuda Amaçai var, yəhudi ədəbiyyatında
“Qüds şairi” adlandırılır. Həmin şairin
“Ausvixtdən sonra” şeirini mən 2008-ci ildə tərcümə
edib internetdə ədəbiyyat portallarından birinə yerləşdirmişdim.
Bu şeirdə bir bənd var:
Ausvixtdən sonra teologiya öldü:
Qətl ediləcək sakinlərin biləklərində
Tanrının telefon nömrəsi
Amma zəng çatmır həmin
nömrəyə
Və indi həmin nömrə əhatə
dairəsi xaricindədir.
Həmin bu bənddəki fikirlər
bir zamanlar Nərmin Kamalın yazdığı “Allahı
bağışlama” şeirində birəbir öz əksini
tapıb. Bunu o vaxt Yəhuda Amaçai yazmışdı. Yəni
bu yeni bir şey deyil. Azərbaycan oxucusunun məlumatsızlığı
və yazar-oxucu arasında mövcud olan uçurum nəticədə
bunların ortada görünməsinə səbəb olur.
-
Azərbaycanda ədəbi proseslərin içərisində
ciddi bir boşluq var. Oxucunun nə istədiyini yazarlarımız
anlaya bilmir, yazarların nə yazdığı
oxucularımıza çatmır. Bu boşluğu doldurmaq
üçün məncə, dünya ədəbiyyatından
ciddi tərcümələrə ehtiyac var. Bəs sən necə
fikirləşirsən, Azərbaycanda oxucunun içində
olduğu həmin boşluğu doldurmaq üçün bu
gün nələrə ehtiyac var? - Bu gün kimsə durub desə
ki, bizim oxucumuz kütdür, bu, tamamilə yanlış bir
fikir olar. Xeyir, bizim oxucumuz küt deyil. Sadəcə bizim
oxucumuz hələ o proseslərə hazır deyil.
Çünki o, dəmir pərdədən çıxıb
və onunla dünya arasında uzun bir boşluq var. Və bu
özünü ciddi bir şəkildə biruzə verir. Bu
gün ətrafımıza baxaq, gənclər monotondur, fikirlər
monotondur, baxmayaraq ki, biz iyirmi il öncə öz müstəqilliyimizi
qazanmışıq, amma yenə də biz müstəqil gəncliyimizdən
əsər-əlamət belə görə bilmirik. Bunun səbəbləri
çoxdur, bəlkə də bunun səbəblərini biz
keçmişimizdə axtarmalıyıq. Bəlkə də
biz bunun səbəblərini öz xələflərimizdə
axtarmalıyıq. Bəlkə də, biz daha da dərinlərə
getməliyik. Bir siyasi sistem dağılıb, yeni bir siyasi sistem
çıxıb ortalığa və biz həmin o zamanlar
adı belə qoyulmamış sistemin uşaqlarıyıq.
-
Sənin bu danışıqlarından bir sual da yarandı, məndə.
Azərbaycandakı mövcud durum, gənclərin maarifləndirilməsi
və.s. bu kimi problemlərin işığında səncə,
Azərbaycan oxucusunu bu gün bizlərin yazdığı
maraqlandırırmı? Çörək üçün
çarpışan, yaşamaq uğrunda mübarizə aparan
insanlar üçün bizim yazdıqlarımız nə qədər
önəmlidir?
-
Qardaşım, bu gün bizlər yaşamaq uğrunda məgər
azmı mübarizə aparırıq? Hər birimiz yazar kimi fəaliyyət
göstərməkdən əlavə yaşamaq, adi gündəlik
tələbatlarımızı ödəməkdən
ötrü çarpışırıqsa, vallah bizim heykəlimiz
qoyulmalıdır. Mən bunu iddia edirəm. Bu gün sən Cəlil
Cavanşir, ya mən Oktay Hacımusalı yaşamaq
üçün dəridən-qabıqdan
çıxırıqsa, bunca zorluqlara rəğmən nəsə
yazırıqsa, biz qəhrəmanıq. Hər nə qədər
bu gün dövlətin yazarına, intellektual adamına
qayğısı varsa da, bu məncə kifayət deyil. Bu
heç də bizim istədiyimiz səviyyədə deyil. Məsələn,
bu gün Azərbaycanda kitab palatası mövcud deyil ki, mənim
kitabım çıxanda həmin kitab palatası nəşri
ən ucqar bir dağ kəndinə çatdırsın. Bu
gün kitab beş yüz nüsxə çap olunur və nəşr
olunan həmin kitabları özümüz yazırıq,
özümüz oxuyuruq və özümüz də həmin
kitab haqqında fikir yürüdürük. Kütləyə
həmin kitablar, bizim yazdıqlarımız gedib
çatmır. Amma gəlin baxaq bu gün bəzi yazarlar var
ki, bunların üzünə televiziya da açıqdır,
radio da açıqdır, həmin insanlar bütün təbliğat
vasitələrindən geninə - boluna istifadə edirlər.
Amma həqiqi istedad sahibləri nədənsə kənarda
qalıblar. Belə olan halda mən sizdən soruşuram,
hansı oxucu bizi oxuya bilər? Hansı oxucunun bizdən xəbəri
ola bilər?
(davamı
gələn sayımızda)
Cəlil CAVANŞİR
Mərkəz.-2011.-17 mart.-S.8.