Gəncədə Koreya kinosu

Gəncədə Koreya Filmləri Festivalının açılış mərasimi keçirilib

 

Koreya Respublikasının ölkəmizdəki səfirliyinin, Respublika Kinematoqrafiya İttifaqının və Gəncə Şəhər İcra Hakimiyyətinin birgə təşkilatçılığı ilə keçirilən tədbirin iştirakçıları əvvəlcə Gəncə Dövlət Dram Teatrının foyesində Koreyanın müxtəlif adət-ənənələrindən, təbii mənzərələrindən, eləcə də bugünkü inkişafından bəhs edən foto və rəsm əsərlərindən ibarət sərgiyə tamaşa ediblər.

Koreya Respublikasının Azərbaycandakı səfiri Li Ci-Han çıxışında Azərbaycan-Koreya əməkdaşlığında mədəni əlaqələrin genişləndirilməsinin vacibliyindən danışıb, bildirib ki, bu əlaqələrin inkişaf etdirilməsi hər iki xalqın bir-birinə yaxınlaşmasına təkan verəcək: Koreya filmlərinin Gəncədə nümayiş etdirilməsi də məhz bu məqsədə xidmət edir.

Səfir Gəncəyə səfəri çərçivəsində dahi Azərbaycan şairi Nizami Gəncəvinin və Cavad xanın məqbərələrini ziyarət etməsindən, eləcə də bu qədim şəhərin sakinləri ilə keçirdiyi görüşlərdən məmnunluğunu bildirib.

Diplomat bəzi mötəbər tədbirlərin artıq paytaxt Bakıdan kənarda, regionlarda keçirilməsinin əhəmiyyətindən danışarkən vurğulayıb ki, bu, həm də xarici ölkələrdə, Azərbaycanın bütün bölgələrinin tanınmasına imkan verir.

Açılış mərasimində çıxış edən Azərbaycan Kinematoqrafçılar İttifaqının Kino Yayımı və Təbliğatı Şöbəsinin müdiri Gəray Əlibəyov demişdir ki, 3 gün davam edəcək tədbirdə 6 film nümayiş etdiriləcək. Gəncə kinosevərləri Koreya Respublikasının müxtəlif kinostudiyalarında istehsal olunmuş dedektiv, məişət problemləri, məhəbbət mövzularında maraqlı ekran əsərlərinə baxa biləcəklər.

Mərasimdə səfir Li Ci-Hana Nizami Gəncəvinin 870 illik yubileyi münasibətilə xatirə hədiyyələri təqdim edildikdən sonra Mənim rəfiqəm casusdur filmi nümayiş olunub.

2009-cu ildə romantik komediya janrında çəkilmiş film tamaşaçılar tərəfindən maraqla izlənilib.

 

 

Cəvahir Səlimqızı

 

Mərkəz.- 2011.- 4 noyabr.- S. 11.