Gənc Alimlər Şurasının iclası keçirilib

Gənclərdə elmə həvəsi artırmaq üçün KİV-də təbliğata geniş yer veriləcək

AMEA Geologiya İnstitutunda Gənc Alimlər Şurasının 2011-ci ildə ilk iclası keçirilib. İclasda şuranın cari və illik fəaliyyət proqramı, həmçinin gənc alimlərin sosial problemləri müzakirə edilib.

İnstitutdan Mərkəz.az-a verilən məlumata görə, AMEA Gənc Alimlər Şurasının sədri İlqar Orucov bildirib ki, obyektiv səbəblərdən iclaslarını mütəmadi olaraq keçirə bilməyən qurum bundan sonra ayda bir dəfə toplanacaq. O qeyd edib ki, AMEA institutlarının gənc alimlər şuraları müvafiq sahələr üzrə beynəlxalq tədbirlərin keçirilməsində təşəbbüslə çıxış etməlidirlər. Hər il onlarla gənc alimin beynəlxalq səviyyəli tədbirlərdə iştirak etdiyini deyən İ.Orucov şuranın bundan sonra da onlara yardım edəcəyini bildirib.

2 Fevral Gənclər Günü ilə bağlı keçiriləcək tədbirlər haqqında məlumat verən İ.Orucov AMEA-nın bu tədbirlərdə Mədəniyyət və Turizm Nazirliyi ilə birgə iştirak edəcəyini bildirib. Bu günlə əlaqədar olaraq Gənc Alimlərin Elm sərgisinin keçirilməsi nəzərdə tutulur. Şura sədrinin fikrincə, sərgidə nümayiş etdiriləcək əsərlər son üç ilin nailiyyətlərini əhatə etməlidir.

AMEA Gənc Alimlər Şurası Gənclər və İdman Nazirliyinin elm sahəsində nailiyyətlərə görə təsis etdiyi “Gənclər mükafatı”na da namizədlər təqdim edəcək. Namizədlər AMEA-nın beş bölməsi üzrə hər bölmədən bir nəfər olmaqla irəli sürüləcək. Gənclər günü ilə əlaqədar AMEA gənc alimlərinin AMEA prezidenti, akademik Mahmud Kərimovla da görüşü keçiriləcək. Görüşün keçirilməsində məqsəd gənc alimlərin problemlərinin yüksək səviyyədə həllinə çalışmaqdır.

Gənc Alimlər Şurasının 2011-ci il üçün fəaliyyət proqramına fevral ayının sonunda “Yeni nəsil gənc arxeoloqların sərgisi”nin, mayda Gənc Alimlərin I Elm Festivalının keçirilməsi, beynəlxalq təcrübədən çıxış edərək avqustda gənc alimlər üçün Yay məktəbinin təşkil edilməsi daxildir. İlin sonuna doğru isə Gənc Alimlərin Forumunun keçirilməsi nəzərdə tutulur.

İclasda həmçinin qeyd olunub ki, gənclərdə elmə həvəsi artırmaq üçün KİV-də təbliğata geniş yer verilməlidir.

Mərkəz.-2011.- 18 yanvar.- S. 15.