2011 Turizm ili olacaq

İqtisadi İnkişaf Nazirliyində müşavirə keçirilib

Yanvarın 15-də İqtisadi İnkişaf Nazirliyində Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında dövlət başçısının tapşırıqlarına uyğun olaraq, nazirlik tərəfindən görüləcək işlərlə əlaqədar müşavirə keçirilib. Nazirlikdən «Mərkəz» qəzetinə verilən məlumata görə, müşavirədə 2011-ci ildə makroiqtisadi sabitliyin qorunması, inflyasiyanın birrəqəmli səviyyədə saxlanılması, istehlak bazarına nəzarətin gücləndirilməsi, biznes mühitinin daha da yaxşılaşdırılması, sahibkarlığa əsassız müdaxilələrin qarşısının alınması, kiçik və orta sahibkarlığın inkişafına diqqətin daha da artırılması, yeni bazarlara ixracın artırılması, infrastruktur layihələrinin davam etdirilməsi, 2011-ci ilin “Turizm ili” elan olunması və bu sahənin inkişafı ilə bağlı işlərin sürətləndirilməsi və s. istiqamətlərdə görüləcək işlər müzakirə olunub.

İqtisadi İnkişaf naziri Şahin Mustafayev müşavirəyə yekun vuraraq qarşıya qoyulan vəzifələrin həyata keçirilməsi istiqamətində konkret tapşırıqlar verib.

Müşavirədə Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında dövlət başçısının çıxışlarından irəli gələn vəzifələrin icrası ilə bağlı Tədbirlər Planının hazırlanması barədə qərar qəbul edilib.

Zülfiyyə

Mərkəz.- 2011.- 18 yanvar.- S. 6.