Mədəniyyət və Turizm nazirindən aşıqlara sürpriz

Son zamanlar Azərbaycan aşıq sənətinə dövlət qayğısı daha da artmaqdadır. Aşıqlar və bu sahədə çalışan digər ifaçılar fəxri adlara layiq görülür, onların konsertləri üçün mütəmadi olaraq şərait yaradılır

Beynəlxalq və respublika səviyyəli tədbirlərdə, o cümlədən I Beynəlxalq Aşıq Festivalında, habelə Azərbaycan aşıq sənətinin görkəmli nümayəndəsi, böyük ustad Aşıq Ələsgərin anadan olmasının 190 illik yubileyinə həsr olunmuş respublikanın bölgələrində və Heydər Əliyev Sarayında təşkil edilən tədbirlərdə Azərbaycan aşıqları fəal iştirak ediblər və onların çıxışları böyük maraqla qarşılanıb. Bu uğurlarla yanaşı bəzən ictimaiyyət tərəfindən aşıqlarımızın geyimlərinə müəyyən iradlar bildirilməkdədir. Beynəlxalq və respublika səviyyəli tədbirlərdə Azərbaycan aşıqlarının bir sıra hallarda aşıq sənətinin yüksək səviyyəsinə uyğun olmayan geyimlərdə çıxması bu sahədə mövcud olan pərakəndəliyin aradan qaldırılması zərurəti yaradır.

Belə ki, deyəsən bu problem tezliklə aradan qaldırılacaq.

Qeyd edilənləri nəzərə alaraq, Mədəniyyət və Turizm Nazirliyi Azərbaycan aşıqları üçün səhnə geyim eskizinin hazırlanması üzrə müsabiqə elan edir.

Müsabiqənin təşkilati və texniki şərtləri:

1. Layihə Azərbaycan aşıq sənətinin qorunub saxlanılmasına, təbliğ olunmasına və gələcək nəsillərə çatdırılmasına xidmət etməlidir.

2. Layihə bütün geyim elementlərinin (qayış, çəkmə və s.) eskizləri ilə birlikdə təqdim edilməlidir.

3. Müsabiqədə iştirak edənlərə tövsiyə olunur ki, layihənin hazırlanmasına bu sahədə müvafiq bilik və təcrübəyə malik folklorşünasları, tarixçiləri, ədəbiyyatçıları və digər mütəxəssisləri cəlb etsinlər.

4. Hazırlanacaq səhnə geyiminin eskizində milli ornamentlər öz əksini tapmalı və Azərbaycana məxsusluğu bilinməlidir.

5. Müsabiqənin qalibləri üçün hər biri müvafiq olaraq 1000, 750 və 500 manat məbləğində 1-ci, 2-ci və 3-cü dərəcəli mükafatlar təsis edilir.

Gözəl! Hər halda, çoxdan aşıq sənəti vurğunlarını, eləcə də aşıqların özlərini narahat edən məsələ öz həllini tapacaq. Gəlin görək, aşıqlarımız bu xəbəri necə qarşılayıblar?

Azərbaycan Aşıqlar Birliyinin sədri, xalq şairi Zəlimxan Yaqub belə bir müsabiqəyə başladıqları üçün mədəniyyət və turizm naziri Əbülfəs Qarayevə minnətdarlığını ifadə etdi: «Aşıqlarımız milli geyimdə səhnəyə çıxacaqlar, biz də bununla qürur duyacağıq. Sağ olsun, nazir Əbülfəs Qarayev ki, aşıqlarımızın arzularını yerinə yetirdi».

AAB sədri aşıq geyimində mütləq milli ornamentlərin yer alacağına əmin olduğunu söylədi: «Aşıq geyimi mütləq milli ornamentlərlə bəzədilməlidir və dünyaya çıxmalıdır. Çünki artıq aşıq sənəti YUNESKO kimi nüfuzlu bir quruma daxil edilib. YUNESKO və İSESKO-nun xoşməramlı səfiri, ölkənin birinci xanımı Mehriban xanım Əliyevanın sayəsində sazımızı dünya tanıyır».

Mədəniyyət və İncəsənət Universiteti aşıq fakültəsinin baş müəllimi Aşıq Samirə çoxdan bu arzuda olduğunu söylədi: «Aşıq sənətinə olan dövlət qayğısından yerlə-göy qədər razıyam. Mədəniyyət və Turizm Nazirliyinin aşıqların geyimləri ilə bağlı elan etdiyi müsabiqəyə isə çox sevindim. Artıq biz aşıqların da öz geyimi olacaq». Aşıq Samirə onu da bildirdi ki, aşıq geyimləri ilk növbədə milliliyi ilə seçilməlidir. «Çox arzulayardım ki, aşıq milli geyimini milli baş örtüyümüz olan kəlağayılar tamamlasın», – deyən Aşıq Samirə geyimlərin yaş senzinə görə də fərqlənməsini məqbul saydı.

«Deməli, biz də ürəklə aşıq paltarını geyinib, əlimizdə saz ürfan məclislərinə daxil olacağıq», -deyən Aşıq Altay hər kəsin ürəyincə olan bir aşıq libasına malik olacağımıza ümid etdi: «Çox istərdim ki, aşıq geyimi milliliklə müasirliyi özündə cəmləsin. Papaq isə mütləq şəkildə saxlanılsın. Çünki papaq qeyrət, saz isə ürfan rəmzimizdir. Mən istərdim ki, aşıq geyimləri həm də estetik görünüşü ilə göz oxşasın. Artıq aşıq sənəti Avropada da tanınır. Avropalıların qarşısına müasirliyi və milliliyi ilə fərqlənən bir libasda çıxmağımız baş ucalığımızdır».

Vaxtilə aşıqlarımızın geyindiyi libasın öz əhəmiyyətini çoxdan itirdiyini deyən Aşıq Mehdi, həmin geyimə görə hətta xəcalət çəkdiyini də gizlətmədi: «İndi hansısa aşıq qalife şalvarda, xrom çəkmələrdə insanlar qarşısına çıxsa, kinayə obyektinə çevrilər, çünki bu geyim Stalin dövründən qalıb. Vaxtilə Aşıq Əsəd Moskvaya qurultaya gedərkən Stalin qarşısında çıxış edib. Stalin də aşıqların bu formada çıxış etməsini məsləhət bilib. Amma indi həmin forma köhnə və milli ruha yaddır. Bizim aşıq geyimimiz köhnə çuxa, papaqdan ibarət olmalıdır. Hansı ki, Dədə Ələsgərdən də o yana aşıqlarımız bu libasda olublar».

Aşıq Əli də milli ruhda aşıq geyimlərinin tərəfdarıdır. Onun fikrincə, aşıq geyimlərində milli ornamentlər mütləq öz əksini tapmalıdır: «Mədəniyyət və turizm naziri çox gözəl bir müsabiqəyə start verib. Aşıqlarımız nəhayət ki, öz milli geyimlərində səhnəyə çıxacaqlar. Mən həmişə milli aşıq formasının tərəfdarı olmuşam. Çünki saza hörmət əlaməti olaraq onun libası da gözəl, milli koloritə malik olmalıdır. Mən ümumiyyətlə, bu geyim olmayan vaxtlarda da saza hörmət əlaməti olaraq kostyumda səhnəyə çıxmışam və heç vaxt cins şalvarda əlimə saz götürməmişəm. Çünki cins şalvarı saza yaraşdırmıram. Kişi geyimlərində çuxa, papaq, qadın geyimlərimizdə isə kəlağayı, baş örtüyü mütləq saxlanmalıdır. Milli rəqs ifa edən rəqqasələrimizin geyimlərindən istifadə etmək olar».

Aşıq Telli Borçalı da aşıq geyimlərinin tezliklə hazır olmasını və həmin geyimlərdə milli ruhun köklənməsini arzuladı.

Cəvahir Səlimqızı

Mərkəz.- 2012.- 4 aprel.- S. 14.