Həmişə bizimlə olan «Bakılı oğlan»…

Anar Məmmədxanovun vəfatından bir il ötdü

Şən, hazırcavab, gülərüz, mehriban, zarafatcıl, enerjidolu… Anar Məmmədxanovu xarakterizə etmək üçün o qədər gözəl sözlər var ki, adam bilmir hansını işlətsin. Amma bu sözlərin hamısı ona yaraşır. Çünki Anar özü də hər kəsin yaddaşında yaraşıqlı, şən və hazırcavab kapitan kimi qalıb. Dünən o kapitanın anım günü idi.

Anarın yoxluğuyla bizi birillik zaman kəsiyi ayırır. Amma ölüm sevinməsin, qoy, çünki Anarı sevənlər onu hələ də aralarında görüb hiss edirlər. Elə yaxınları, doğmaları, dostları da Anar haqqında keçmiş zaman şəkilçisində danışmırlar. Aprelin 22-də onun xatirəsinə həsr olunan anım gecəsində də bunun şahidi olduq.

Yaxınlarının dediyinə görə, Anar hamını özünə dost sayırmış, onun düşməni bir olub: «Yumor hissi olmayanlar». O harda bir yeni lətifə eşitdisə, həmin gün Anarın şən hay-küyündən qulaq tutulurmuş: «Elə ki, bir lətifə eşitdi, mütləq telefonu əlinə alıb bir-bir bütün dost-tanışına zəng edib, həmin lətifəni ucadan qəh-qəhə çəkərək danışardı. Evə həmin gün gələn olsa, mütləq Anarın yeni lətifəsini dinləyib gülməli idi. Vay o adamın halına ki, gülməsin. Anar dərhal ona məhəl qoymazdı. Bu insan hamıya pozitiv enerji paylamaq, sevinc ötürməklə özünü çox rahat hiss edirdi. Qanında idi bu xüsusiyyət»- həyat yoldaşı İradə xanım belə deyir.

İndi isə gəlin sizi, heç vaxt kədərli olmağı sevməyən Anarın Tanrıya qovuşacağı vaxtdan iki gün əvvəl onun oxuduğu «Əlvida» mahnısını zümzümə edib doluxsunmasından xəbərdar edim. Sonuncu dəfə ailəsi ilə birgə qohumlardan birinin toy məclisində iştirak edib. «Mən «Əlvida» mahnısını oxumaq istəyirəm», -deyə israr etdikdən sonra mikrafonu əlinə alıb və özünəməxsus tərzlə oxuyub. Səsi və hətta musiqi duyumu zəif olan Anar mahnını o qədər ürəklə oxuyub ki, hamını kövrəldib. Elə dünyadan köç edəcəyi gün də yolu toy məclisindən keçəcəkmiş. Toya məxsusi hazırlaşan Anar özünə kostyum da sifariş veribmiş. Amma heç o kostyumu əyninə geyinmək və həmin toy məclisinə getmək ona nəsib olmadı. Bəlkə də həmin toyda daha bir «Əlvida» oxuyacaqmış, amma bu «əlvida»nı mənzilində söyləməli oldu…

Cəvahir Səlimqızı

Mərkəz.-2012.- 24 aprel.- S. 14.