“Məni heç vaxt şöhrət maraqlandırmayıb”

İlham Nəzərov: «Mən xəyalımı gerçək etdiyinə görə ömrümün axırına kimi Prezidentimə və birinci xanım Mehriban Əliyevaya borcluyam»

Gənc istedadlarımızın xarici ölkələrdən xoş sorağını eşidəndə həmişə bir azərbaycanlı olaraq qürur hissi keçiririk. Belə gənclərdən biri də İlham Nəzərovdur. Klassik musiqisevərlər qeyri-adi ifaçılıq qabiliyyatı ilə fərqlənən və Azərbaycanımıza uğur gətirən İlhamı yaxşı tanıyır. Hazırda İtaliyada təhsil alan gəncin səs-sorağı tez-tez beynəlxalq festivallardan, konsert salonlarından eşidilir. İlham o istedadlı gənclərdəndir ki, onun İtaliyada təhsil almaq arzusunu ölkə prezidenti və Azərbaycanın birinci xanımı Mehriban Əliyeva gerçəkləşdirib. Belə ki, İlham prezidentin «Azərbaycan gəncləri 2011-2015-ci illərdə» gənclərə dəstək layihəsi çərçivəsində Mədəniyyət və Turizm Nazirliyinin də dəstəyi ilə İtaliyayada Osimo Darte Lirika Akademiyasında təhsil alır.

Hazırda doğma Vətənə- tətilə gələn opera sənətçisini biz də redaksiyamıza dəvət etdik. İlham təhsilindən, uğurlarından, bir də canı qədər sevdiyi Azərbaycan musiqisini dünyada fəxarətlə təmsil etməsindən danışdı… Yox, o təkcə danışmadı, həm də oxudu. Həm bariton, həm də kontur-tenor kimi elə məharətlə ifa etdi ki, bütün redaksiya bir neçə dəqiqəliyə əlini işdən ayırıb onun səsinin sehrinə düşdü.

- İlham gənc, istedadlı musiqiçisən, sənət cameəsində gözəl tanınırsan, amma səni daha yaxından tanıyaq; harda doğulmusan, hansı ali məktəbdə təhsil almısan?

- 1985-ci ildə Əlibayramlıda, indiki Şirvan şəhərində anadan olmuşam. Orta təhsilimi doğulduğum şəhərdə alandan sonra Bakıda bülbül adına orta istisas musiqi məktəbinə daxil olmuşam. Bakı Musiqi Akademiyasını bitirmişəm. Akademik Opera və Balet Teatrı və Üns Yaradıcılıq səhnəsi solistiyəm, Azərbaycan Dövlət Xor kapellasının artistiyəm, Dövlət mahnı və Rəqs ansanblının artisti olmuşam. Dövlət Musiqili Komediya Teatrında da müqavilə ilə tamaşalarda oynamışam.

- Bildiyim qədər sən əvvəllər muğam ifaçılığı ilə məşğul olmusan, amma nədən sonradan ifa tərzini dəyişməli oldun?

- Bəli mən ustad sənətkar Ağaxan Abdullayevin tələbəsi olmuşam, amma sonradan musiqinin digər janrları da məni özünə cəlb etdi. Cazla məşğul olmağa başladım. 2000-2001-ci illərdə beynəlxalq caz-blyuz festivalının laureatı da oldum.

- Dəfələrlə bir sıra yerli və beynəlxalq festivallara qatıldım, konsertlərdə çıxış etdim. Bu gün də italiyada təhsil aldığım müddətdə bu dəvətlər davam etməkdədir. Hazırda İtaliyanın Ozimo şəhərində Ozimo Darte Lirika Musiqi Akademiyasında təhsil alıram. Və tətilə buraxıldığım üçün doğma Bakıdayam. Əslində iyun ayından tətilə buraxılmışdıq, sadəcə, beynəlxalq festivala dəvət aldığım üçün Bakıya gec gəlməli oldum.

-Biz o festivalda sənin uğurlarını eşidib çox sevindik. Festivala kimin dəvəti ilə qatılmışdın, ümumiyyətlə, hansı ölkələrin musiqiçiləri orda iştirak edirdi

-Festivalın təşkilatçıları bizim Akademiyada ən yaxşı ifaçıların axtarışına çıxmışdılar, orda mənim səsimi eşidib, bəyəndilər və festivala dəvət etdilər. 25 ifaçı arasında mən seçildim. İtaliyanın Marina-Franka şəhərində keçrilən 38-ci Dela Vale Ditria festivalın barokko musiqisinə həsr olunmuş bir festivaldır. Dünyanın ən tanınmış barokko ifaçıları-Mariella Devia, Sonya Prina, Paola Koni, Antonio Qreko bu festivalda iştirak edirdi. Festivalda dörd opera nümayiş olundu ki, onlardan ikisində mən çıxış etdim. Luici Rossinin «Orfey» operasında əsas partiyanı ifa etdim.

-Mən o festivalda həm bariton, həm də kontur-tenor kimi təmsil olundum. Onu da deyim ki, bəlkə də elə təşkilatçıların diqqətini mənim kontur-tenor olmağım cəlb etdi. Mənim ikisəslə oxumağım onlarda böyük maraq hissi doğurmuşdu.

-Azərbaycanda tenor, bariton, saprano sənətçilərin olduğundan xəbərimiz var, amma mən ilən kontur-tenorumuz yoxdur, səhv eləmirəmsə?

-Bəli, mən kontur-tenor səs tembrinə malik olan yeganə peşəkar azərbaycanlıyam. Sadəcə, buna cəhd etmək istəyənlər olur, amma bu səs tembri sənətçidən böyük ustalıq tələb edir. Bu səs tembrinə malik olan sənətçidən borokkonun bütün sirlərini peşəkar səviyyədə bilməsi tələb olunur. Kontur-tenor folsetin daxili güc hesabına inkişaf etdirilmiş formasıdır.

-Necə qarşılandı çıxışın?

- Möhtəşəm. İtaliyanın tanınmış mətbu orqanları mənim ifamı yüksək qiymətləndirdi. Hər kəs mənə yaxınlaşıb, öz ölkəsində işləməyə dəvət edirdi. Ümumiyyətlə, italiyada təhsil aldığım müddətdə Astriya, Almaniya, Estoniya və digər ölkələrdə işləmək təklifləri almışam.

- Qəbul etmisən?

- Yox, mən Azərbaycanımda xalqıma xidmət etmək istəyirəm.

- İtaliyada təhsillə Azərbaycandakı təhsil arasında fərq nədədir?

- Fərq böyükdür, İtaliya operanın vətənidir.

Ümumiyyətlə, İtaliyada təhsil almaq mənim ən böyük arzum idi. Amma italiyada təhsili xəyal edirdim. Çünki bilirsiniz ki, orda təhsil çox bahadır. Sağ olsun prezidentim, Azərbaycanın birinci xanımı, bir də Mədəniyyət və Turizm nazirliyinin dəstəyi ilə bu xəyalım gerçək oldu. Mən ömrümün axırına kimi Prezidentimə və birinci xanım Mehriban Əliyevaya borcluyam. Mənə maddi dəstək ayrıldı və mən də təhsili başa vurduqdan sonra onların dəstəyinə cavab olaraq Azərbaycan musiqisini bütün dünyada layiqincə təmsil və təbliğ edəcəyəm.

- Orda təhsil aldığın müddətdə heç çətinliklərin oldumu?

- Təzə-təzə vaxtlarda çox çətin oldu mənə, çünki dili bilmirdim, müəllimlər nə deyirdi başa düşmürdüm, ünsiyyətə girə bilmirdim. Gecə-gündüz əziyyət çəkəndən sonra dili öyrəndim və problem öz-özünə həll olundu.

- İtalyanlarla oxşar cəhətlərimiz çoxdur, bu mənada ölkədə yəqin isti qarşılandın?

- Bəli onlar da bizim kimi istiqanlı millətdir. Amma deməliyəm ki, biz yeməklərdə onlardan üstünük. Yeməklərini heç xoşlamadım, buna görə də özüm özümə yemək bişirməli oldum.

- Hansı yeməkləri daha mükəmməl şəkildə bişirməyi bacarırsan?

- Hamısını, plovdan tutmuş, dolmanın bütün növlərinə qədər.

- Akademiyada sənə münasibət necədir?

- Çox yaxşı. Məni bir ifaçı olaraq müəllimlərim yüksək qiymətləndirir. Mən buna zəhmətimlə nail olmuşam.

- Arzularını bilmək maraqlı olardı?

- Arzularım bir-bir yerinə yetir. İtaliyada təhsildən sonra Azərbaycanımı həm öz Vətənimdə, həm də dünyada fəxarətlə təmsil etmək niyyətindəyəm. Məni heç vaxt şöhrət maraqlandırmayıb, sadəcə musiqidə uğurlara imza atmaq istəyirəm.

… İlham redaksiyamıza gətirdiyi çoxlu sayda təşəkkürnamələri, fəxri diplomları, haqqında yazılmış əcnəbi qəzetləri bizə göstərir.

Dünyaşöhrətli sənətçilərin onun haqqında dəyərli fkirlərini oxuduqca və sənətçimizin bu qədər yüksək uğurlarından xəbərdar olduqca qürur hissi keçirdik. Əhsən, vallah!

Cəvahir Səlimqızı

Mərkəz.-2012.-11 avqust.-S.14.