Müasir Azərbaycan qadını obrazı…

“Mehriban Əliyeva dünyada müasir Azərbaycan qadını obrazını yarada bildi”.

Azərbaycanda belə bir deyim var: “Hər güclü kişinin arxasında bir zərif qadın dayanır”. Tarixi səhifələsək bu zərbi-məsəlin zaman-zaman öz təsdiqini tapmasının şahidi olacağıq. Dünya siyasətində bir çox siyasi simalar var ki, onlar siyasi, sosial, ictimai və mədəni mövqeyinə görə cəmiyyətdə çox böyük nüfuza sahibdirlər. Bu gün Azərbaycanın birinci xanımı, Heydər Əliyev Fondunun Prezidenti Mehriban xanım Əliyevanın ictimai-siyasi portretini xarakterizə edən siyasilərimiz də əsasən bu məqamların üzərində dayandılar.

Yeni Azərbaycan Partiyası Siyasi Şurasının üzvü, millət vəkili Aydın Mirzəzadə:

- Mehriban xanım özünün fəaliyyəti ilə həm Azərbaycanda, həm dünyada müasir Azərbaycan qadını obrazını yarada bildi. O qadın ki, ictimai fəaliyyəti göz qarşısındadır. O qadın ki, xalqının, dövlətinin inkişafı üçün böyük işlər görür. O qadın ki, öz ailə nümunəsi ilə cəmiyyətdə xoş duyğular yaradır. Mehriban xanımın bu cür müsbət xüsusiyyətləri birincisi özünün doğulduğu mühitdən, ailədən gəlir. İkincisi, təbiətdən gələn şəxsi keyfiyyətləri, onun daima öz üzərində işləməsinə, həmişə fəaliyyətində müsbət nəticələr əldə etməsinə gətirib çıxarıb. O, bütün sahələrdə həmişə uğurlar əldə edib. Onun Milli Məclisin deputatı kimi fəaliyyəti bir çoxları üçün nümunədir. Parlamentin işində fəallıq göstərir, Azərbaycanın xaricdə tanıdılmasında böyük işlər görür. Onun beynəlxalq təşkilatlardakı təmsilçiliyi Azərbaycanla bağlı müsbət fikirlərin yaradılmasında böyük imkanlar yaradır. Mehriban xanımın Azərbaycan tarixini, mədəniyyətini, incəsənətini beynəlxalq aləmdə tanıtması istiqamətindəki fəaliyyəti çox təqdirəlayiqdir. Onun istiqamətlərdən biri də Heydər Əliyev Fondunun bugünkü fəaliyyətidir.

Mehriban xanım Əliyeva ötən il “Eurovision”un Bakıda keçirilməsi ilə bağlı Təşkilat Komitəsinin sədri oldu. Bir il ərzində Milli Parkın uzadılması, orada möhtəşəm “Kristal sarayı”n yaradılması və yarışın yüksək səviyyədə təşkil edilməsinə nail oldu.

Bu gün Azərbaycan özünün dirçəliş dövrünü yaşayır. Bu böyük işlərdə Mehriban xanımın xüsusi bir imzası var. Onun Prezident İlham Əliyevin fəaliyyətinə daima dəstək olması, özünün fəaliyyəti ilə ölkə başçısının işlərinə xüsusi örnək gətirməsi göz qabağındadır. Mehriban xanım eyni zamanda yüksək mənəvi və insani xüsusiyyətlərə malik olan bir şəxsdir. O, Azərbaycan xalqının fəxridir.

Böyük Quruluş Partiyasının sədri, millət vəkili Fazil Mustafa:

- Mehriban xanım Azərbaycanın siyasi mühitinə fərqli bir hərəkətlilik gətirən insanlardandır. Onun həm millət vəkili, həm də ictimai-siyasi fəaliyyəti kifayət qədər geniş tanınır və sərhəd hüdudlarını aşır. Onun gördüyü işlər Azərbaycanın tanınmasında, xüsusilə də beynəlxalq mədəni sferada ölkəmizlə bağlı təsəvvürlərin dəyişməsində mühüm əhəmiyyət kəsb edir. Bu sırada onun muğam sənəti sahəsindəki işlərini xüsusilə qeyd etmək olar. Bundan başqa, onun rəhbərliyi ilə istər idman sferasında, istərsə də mədəni irsin tanınması prosesində çox ciddi əməyi var. Adətən Şərq mühiti olan cəmiyyətlərdə qadınların siyasətdə bəlli bir rolunun qabarması çox çətin bir prosesdir. Amma Mehriban xanım bu stereotipləri dağıda bildi. Göstərdi ki, ölkənin tanıdılması, ölkənin irəli aparılması üçün qadınların xüsusilə də ön cərgədə olması, proseslərə təsir etməsi daha vacibdir. Düşünürəm ki, Azərbaycanın gələcək mədəni irsinin dünyaya tanıdılması, dünya tərəfindən əxz olunması istiqamətində görülən işlərin qiymətini zaman verəcək.

Mehriban xanım təşəbbüskar qadın obrazını dünyaya təqdim etdi. İkinci tərəfdən də aktual problemlərə toxunma yetənəyini göstərdi. O, öz fəaliyyətində ümumi standartlardan kənara çıxaraq, təşəbbüskar qadın obrazını dünyaya təqdim etdi.

ASDP sədri Araz Əlizadə:

- Mehriban xanım Heydər Əliyev Fondunun prezidenti kimi öz işinin öhdəsindən layiqincə gəlir. Onun gördüyü xeyirxah işlər hər bir kəsin ürəyindən xəbər verir. Mənə elə gəlir ki, Azərbaycanda qadın siyasətçiləri arasında bu səviyyədə çevik fəaliyyət göstərən siyasətçi olmayıb. Bu da səbəbsiz deyil. Belə bir atalar sözü var: “Ot öz kökü üstündə bitər”. Mehriban xanımın valideynləri böyük alim və ziyalı olublar. O, böyük və görkəmli nəslin bir nümayəndəsidir. Mehriban xanımın Azərbaycanın inkişafı naminə gördüyü işlərin dəyərli bir ocaqdan qaynaqlandığını qeyd edərək, bu işlərin daha da davamlı olacağına inanıram. O, öz intellekti, davranışı, mədəniyyəti ilə Azərbaycanı dünyada çox gözəl təmsil edir. Buna görə də ona minnətdarıq.

Demokratik İnkişaf Partiyasının sədri, millət vəkili Asim Mollazadə:

- Mehriban xanım ölkənin mədəniyyət, təhsil, səhiyyə və digər sahələri ilə bağlı çox böyük işlər həyata keçirib. Heydər Əliyev Fondunun vasitəsilə Azərbaycan mədəniyyətini dünyada tanıtmaq üçün çox böyük işlər görür. Onun gördüyü işlərin yüksək nəticələri dünyanın diqqətini Azərbaycana yönəldə bilib.

Vətəndaş Həmrəyliyi Partiyasının sədri, millət vəkili Sabir Rüstəmxanlı:

- Mehriban xanım qısa müddətdə Azərbaycan cəmiyyətində özünə xüsusi yer, hörmət qazanmış bir insandır. Lakin Mehriban xanım bir şərq qadını olaraq Azərbaycanın çağdaş qadın obrazını tərənnüm edir. Dünyada ölkə başçıları öz xanımları ilə bir toplumda ortaya çıxanda sevinirsən ki, Azərbaycan xanımının siması budur. Bu bizim maarifçilərimizin, ziyalılarımızın 200 ildən bəri apardığı türkçülük, islami dəyərlərlə bərabər çağdaş dünya ilə ayaqlaşmaq ideologiyasının davamlı təzahürüdür. Mehriban xanım mədəniyyətimizin dünyada təbliği baxımından böyük işlər görür. Onun Azərbaycanda kimsəsiz uşaqlara qayğısı, kimsəsiz uşaqların oxuduğu məktəblərə, bağçalara getməsi, onlara isti münasibəti, uşaqlara ana qayğısı ilə yanaşması bu xalqın gözünün qarşısında baş verir. Hazırda onun himayədarlığı altında Azərbaycan həqiqətlərini dünyaya çatdıran bir sıra xarici dildə nəşr olunan mətbuat orqanları, xüsusi buraxılışlar, kitablar var. Bütün bunlar Azərbaycanın bugünkü nüfuzunun inkişafına xidmət edir. Mehriban xanım Azərbaycanda qadın cəmiyyətlərini öz ətrafında birləşdirməklə bizim toplumun mənəvi aləminin inkişafında daha çox iş görə biləcək.

Tahirə Qafarlı

Mərkəz.-2012.-25 avqust.-S.3.