Mehriban Əliyeva – Azərbaycan xanımlığının təntənəsi

“…Həyatda hər bir kəsin yerini və taleyini tarix müəyyən edir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi, dərk edilmiş məsuliyyətin imkan verir. Bu kitabda hər bir kəs özünü şəxsi həyatının və dünyanın yaradıcısı, yaxud dağıdıcısı kimi təcəssüm etdirir.

Kimsənsə, elə də olmalısan – bax, budur bizim həyatımız. Ona görə də özgələrin rollarını və obrazlarını gərək öz üzərinə götürməyəsən. Çünki sənin də dünyada yerin yeganə və bənzərsizdir”.

Azərbaycan Respublikası Prezidentinin xanımı, Heydər Əliyev Fondunun Prezidenti, YUNESKO və İSESKO-nun Xoşməramlı Səfiri, millət vəkili Mehriban Əliyevanın söylədiyi bu sözlər onun dünyaya, insanlığa, mənəvi-əxlaqi dəyərlərə yanaşma fəlsəfəsinin kredosudur. Azərbaycan mədəniyyətini dünya mədəniyyətləri xəttinə qovuşduran Mehriban xanım Əliyevanın milli irsimizin qoruyucusu, təbliğatçısı, himayədarı kimi formalaşan bu portreti onun doğum günü ərəfəsində ayrı-ayrı ictimai xadimlərimiz tərəfindən bir daha xarakterizə olundu.

“Simurq” Azərbaycan Mədəniyyəti Assosiasiyasının rəhbəri, professor Fuad Məmmədov:

- Mədəniyyətin inkişaf prosesinin idarə olunmasına yönələn universal kulturoloji yanaşma Heydər Əliyev Fondunun Prezidenti Mehriban xanım Əliyevanın sosial-mədəni fəaliyyətinin əsasını təşkil edir. YUNESKO və İSESKO-nun Xoşməramlı Səfiri Mehriban Əliyevanın çoxillik uğurlu idarəçilik fəaliyyəti sərt qloballaşma şəraitində milli mədəniyyətimizin modernləşdirilməsi və təbliği sahəsindəki mükəmməliyini üzə çıxartdı. Bu ilin may ayında onun rəhbərliyi altında təşkil olunan və dünyanın bir çox ölkələri tərəfindən heyranlıqla qarşılanan, mədəniyyətimizin yüksək intellektual, etik, estetik, bədii və siyasi vəhdətinə çevrilən “Eurovision” mahnı müsabiqəsi Mehriban Əliyevanın mükəmməl təşkilatçılıq qabiliyyətinin yalnız bir nümunəsidir.

Мehriban xanım öz sözlərini, hərəkət və davranışlarını diqqətlə ölçüb-biçən, yüksək mədəniyyətə, intellektə və etikaya sahib bir insandır. O, təbiətən malik olduğu qeyri-adi zəkası, mükəmməl məntiqi, yüksək mədəni düşüncəsi, məsuliyyət və özünəhörmət hissi, insanlara münasibətdə diqqətli davranışı ilə seçilir.

Mehriban xanım uşaqlıqdan layiqli tərbiyə və təhsil alıb. Hələ uşaqlıqdan ailə dəyərlərini düzgün qiymətləndirməyi öyrənib. Onun insanlarda dürüstlüyü, ləyaqəti, səmimiliyi, mehribanlığı, ağlı və professionallığı dəyərləndirməsi, qeyri-səmimiliyi və yalanı əsla qəbul etməməsi yüksək daxili mədəniyyətindən xəbər verir. Onun həyat fəlsəfəsi – “hər zaman ləyaqətini qorumaq, özünə və prinsiplərinə sadiq qalmaq”dır.

Nəhayət ən önəmli faktor odur ki, Mehriban xanım Ümummilli Lider Heydər Əliyev məktəbinin davamçısıdır. Buna görə də o, Azərbaycanın sosial-mədəni inkişaf tarixində kifayət qədər uğurlara imza atıb. Onun rəhbərlik etdiyi Heydər Əliyev Fondu ölkənin sosial-mədəni inkişafının təkanverici qüvvəsinə çevrilib. Fondun əsas fəaliyyət prinsipində milli-mədəni irsimizin qorunması, inkişafı, milli təhsilin və səhiyyənin inkişafına dəstək, valideyn himayəsindən məhrum uşaqlara maddi, mənəvi dəstəyin göstərilməsi və sair cəmiyyət qarşısındakı tarixi xidmətləri dayanır.

“Həsrət Yolu” Əsir və Girovlara Kömək İctimai Birliyinin sədri, şərqşünas-türkoloq Esmira Orucova:

- Həyatda elə insanlar var ki, onların keçdiyi həyat yolu, cəmiyyətdə tutduğu mövqeyi əvvəldən müəyyən olunmuş alın yazısıdır. Nəcib əməlləri, həssas münasibəti, böyük qayğı və diqqəti nəticəsində insanların qəlbində əlçatmaz zirvələr fəth etmiş, Azərbaycanın birinci xanımı Mehriban Əliyeva belə insanlardandır.

Mehriban xanımın sözün əsl mənasında xalqın fondu olan Heydər Əliyev Fondunun Prezidenti, YUNESKO və İSESKO-nun Xoşməramlı Səfiri, millət vəkili kimi vətən, millət naminə istər təhsil, səhiyyə, mənəvi irsimizin qorunması, istərsə də Qarabağ həqiqətlərinin dünya ictimaiyyətinə çatdırılması sahəsində irəli sürdüyü təşəbbüslərin, həyata keçirdiyi qlobal layihə və proqramların sayı-hesabı yoxdur. Mehriban xanım hər zaman yardıma ehtiyacı olanların yanında olub, kimsəsizlərin kimsəsi olub, köməyini onlardan əsirgəməyib.

Biz erməni terrorizminin və vəhşiliyinin ifşa olunması ilə bağlı təbliğatın aparılması və canlı müharibə qurbanlarının ümid yeri olması məqsədilə ictimai birliyimizin qərargahla təmin olunması üçün Mehriban xanıma müraciət etmişdik. Hər zaman olduğu kimi bizim də xahişimiz öz müsbət həllini tapdı.

“Həsrət Yolu” Əsir və Girovlara Kömək İctimai Birliyinin üzvləri olan əsir-girovluqdan azad edilmiş soydaşlarımız və əsir-itkin-girov ailələri adından, eyni zamanda, öz adımdan Mehriban xanım Əliyevaya cansağlığı, uzun ömür, övladları və nəvələri ilə birlikdə ailə səadəti, xoşbəxt həyat arzulayıram!

Azərbaycan Türk Qadınları Birliyinin sədri Tənzilə Rüstəmxanlı:

- Ümummilli Liderimiz Heydər Əliyev bir çıxışında belə demişdi: “Təbiət dünyanı dəyişdirərkən cənnəti qadınla əvəz etdi. Həqiqətən belədir! Nə qədər gözəl sözdür və qadının yerini nə qədər gözəl təsvir edir. Azərbaycan qadını tarix boyu öz ağlı, zəkası, namusu, qeyrəti, isməti, fədakarlığı, çalışqanlığı, mərdliyi, vətənpərvərliyilə millətinə, torpağına olan hədsiz məhəbbəti və gözəlliyi ilə tanınıb.

Tarixi keçmişimizə nəzər salsaq, həmişə ilkləri ilə tarixə iz salan türklərin öz qeyrətli, savadlı qadınları ilə fəxr duymalarının şahidi olarıq. İlk qadın hökmdarlarımızdan olan Tomris, Şərqdə ilk diplomat qadın Saraxatun, düşmənlərini adı ilə lərzəyə salan Nüşabə, misraları dillər əzbəri olan Məhsəti, öz xeyirxah əməlləri ilə tarixə səs salan Natəvan və bu kimi yüzlərlə azəri qanı daşıyan Azərbaycan xanımlarının adlarını çəkə bilərik.

XXI əsr Azərbaycan qadını üçün böyük nailiyyətlər, uğurlar əsri olub. Azərbaycan xanımlarının cəmiyyətdə rolunun ən bariz nümayəndəsi Azərbaycanın birinci xanımı Mehriban Əliyevadır. Azərbaycanın birinci xanımı, YUNESKO və İSESKO-nun Xoşməramlı Səfiri, Milli Məclisin deputatı Mehriban Əliyeva gördüyü xeyriyyə və uğurlu işləri ilə nəinki bütün Azərbaycan xanımlarının, eləcə də bir çox ölkələrin xanımlarının rəğbətini qazanıb. Bütün Azərbaycan qadınları Heydər Əliyev Fondunun Prezidenti Mehriban Əliyevanın çoxşaxəli fəaliyyətindən, nəcib və xeyirxahlıq keyfiyyətlərindən nümunə götürərək cəmiyyətdə öz yerlərini tutmaq üçün çalışmalıdırlar. Hesab edirəm ki, ölkəmizin birinci xanımı və hörmətli prezidentimizin silahdaşı Mehriban xanım Əliyeva öz fəaliyyəti ilə XXI əsr qadın hərəkatını nəinki canlandırdı, mən deyərdim ki, onun tarixində yeni bir mərhələ açdı. Mehriban Əliyevanın fəaliyyəti ilə qadın hərəkatının forma və metodları müasirləşdi. O, bütün layihələrində həm zadəgan dəyərlərinin davamçısı, həm də birinci xeyriyyəçi kimi müqəddəs analığın xidmətindədir. Onun təşəbbüsü ilə əlil və valideynsiz uşaqlara sosial himayə göstərilməsi həqiqətən bir ənənəyə çevrildi. Bu gün hətta gənc tələbə qızlar belə, vəsait toplayıb uşaq evlərinə, internat məktəblərinə, fiziki cəhətdən qüsurlu uşaqların tərbiyə aldığı mərkəzlərə gedirlər. Bu şərəfli yol Mehriban Əliyevaya aiddir.

Mehriban Əliyeva qadın hərəkatının yönünü həm də təhsilə, məktəbə, səhiyyəyə, uşaqların sağlamlığına, mədəniyyət və idman proqramlarına çevirdi. Nəticədə onun fəaliyyəti beynəlxalq miqyasda diqqəti cəlb etdi. Bu gün YUNESKO və İSESKO-nun xoşməramlı səfirinin fəaliyyəti Azərbaycan qadınlığının təntənəsinə çevrilib. Hazırda Mehriban Əliyevanın humanist və mədəni layihələri onlarla ölkələr tərəfindən dəstəklənir. Onun nüfuzu və işgüzarlığı sayəsində Azərbaycan YUNESKO tədbirlərinin mərkəzinə çevrilib.

Mehriban Əliyevanı bu səbəblərdən dolayı “Azərbaycan qadınının mayakı” adlandırmaq olar. Çünki Azərbaycan qadını Mehriban Əliyeva sayəsində ölkə sərhədlərindən kənarda lider-örnək şəxsiyyət axtarmır. Azərbaycan qadın hərəkatı sadəcə öz lideri ilə qürur duyur.

Tahirə Qafarlı

Mərkəz.-2012.-25 avqust.-S.6.