Ankarada ulu öndər Heydər Əliyevə həsr edilmiş konsert

Azərbaycanın Türkiyədəki səfirliyi və Hacettepe Universiteti Ankarada ulu öndər Heydər Əliyevin vəfatının 9-cu ildönümü iIə əlaqədar simfonik konsert təşkil etmişlər.

“Mərkəz” xəbər verir ki, Azərbaycan Respublikası Baş nazirinin müavini Elçin Əfəndiyev, Prezident Administrasiyasının humanitar siyasət məsələləri şöbəsinin müdiri Fatma Abdullazadə, Azərbaycanın və Türkiyənin mədəniyyət və turizm nazirləri Əbülfəs Qarayev və Ərtoğrul Günay, təhsil naziri Misir Mərdanov, digər rəsmi şəxslər, elm və incəsənət xadimləri konserti dinləmişlər.

Konsertdən əvvəl çıxış edən Əbülfəs Qarayev ulu öndər Heydər Əliyevin “bir millət, iki dövlət” adlandırdığı Türkiyə və Azərbaycan xalqlarının dahi şəxsiyyətin əziz xatirəsini birgə andıqlarını vurğulamışdır.

Türkiyənin tanınmış dirijoru, maestro Burak Tüzünün idarə etdiyi simfonik orkestr solistlər-xalq artisti Fərhad Bədəlbəyli, skripkaçı Toğrul Qəniyevin iştirakı ilə məşhur türk bəstəkarı Camal Erkinin və görkəmli Azərbaycan bəstəkarı Fikrət Əmirovun simfonik əsərlərini ifa etmişlər.

Ayşə Osmanova.

Mərkəz.-2012.-15 dekabr.-S.-14.