“Leyli və Məcnun” San Fransisko səhnəsində

İlk dəfə olaraq “Leyli və Məcnun” operası ABŞ-da nümayiş olunub.

Noyabrın 10-da dahi bəstəkarımız Üzeyir Hacıbəylinin ˝Leyli və Məcnun˝ muğam operası Kaliforniyanın San Fransisko şəhərində tamaşaçılara təqdim olunub. Opera San Fransisko Dünya Musiqisi Festivalı (San Francisco World Music Festival) çərçivəsində səhnələşdirilib. Bu, ˝Leyli və Məcnun˝ operasının ABŞ-da ilk nümayişidir.

Azərbaycanın Los Ancelesdəki Baş Konsulu Nəsimi Ağayev tədbiri giriş sözü ilə açaraq, ˝Leyli və Məcnun˝ operasının tarixi barədə məlumat vermiş, onun müsəlman dünyasında ilk opera olduğunu və indiyə kimi sevilə-sevilə ifa edildiyini qeyd edib. Sonra diplomat Azərbaycanın xalq artisti, məşhur pianoçu, hazırda San Fransiskoda yaşayan Çingiz Sadıqova San Fransisko Dünya Musiqisi Festivalının xüsusi fəxrnaməsini təqdim edib. Fəxrnamə Ç.Sadıqova Azərbaycan musiqi və mədəniyyətinin ABŞ-da və bütün dünyada təbliği sahəsində gördüyü işlərə görə verilib.

Sonra opera tamaşası başlamışdır. Gənc xanəndələr Vüsalə Musayeva və İlkin Əhmədov Leyli və Məcnun rollarını ifa ediblər. Mahir instrumental ifaçılar İmamyar Həsənov (kamança) və Rüfət Həsənov (tar), eləcə də Çin, Hindistan, Cənubi Koreya və ABŞ musiqiçilərindən ibarət orkestr xanəndələrimizi müşayiət edib. Opera tamaşaçıların gurultulu və ayaqüstü alqışları ilə qarşılanmışdır. Tamaşada 500-dək şəxs iştirak etmişdir.

Cəvahir Səlimqızı.

Mərkəz.- 2012.- 13 noyabr.- S.- 14.