Festival finala yaxınlaşdı

Jalə Əliyeva: «Gələn il daha fərqli bir layihə ilə qarşınıza çıxacağıq»

Elşən Hüseynov: «Nazirlik olaraq hər zaman bu layihəyə dəstək verməyə hazırıq»

Gənclər və İdman Nazirliyi, Mədəniyyət və Turizm Nazirliyi, Azərbaycan – Amerika Alyansının dəstək verdiyi Gənclərin II Ümumrespublika Teatr Festivalı final mərhələsinə çatıb. Ekologiya, ətraf mühitin mühafizəsi mövzusuna həsr edilən festivalın qiymətləndirmə mərhələsi Dövlət Gənc Tamaşaçılar Teatrında noyabrın 27-dən dekabrın 1 – dək davam edəcək. Festivalla bağlı daha ətraflı Gənclər və İdman Nazirliyində mətbuat konfransı keçirildi.

Festivalın ideya rəhbəri, millət vəkili Jalə Əliyeva festivalın artıq ikinci ildir ki, təşkil olunduğunu bildirdi. Xanım millət vəkilinin sözlərinə görə, festivalın builki mövzusunun yaranmasına Heydər Əliyev Fondunun vitse-prezidenti, Azərbaycan gəncliyinin bariz nümunəsi Leyla Əliyevanın 12 iyul 2011-ci ildə elan etdiyi yeni qlobal gənclər ekoloji kampaniyası – “Ətraf mühitin müdafiəsi fəaliyyətində beynəlxalq dialoq” (International Dialogue on Environmental Action – IDEA) zəmin yaradıb.

Millət vəkili həmçinin festivala dəstək göstərdiyinə görə Gənclər və İdman naziri Azad Rəhimova öz minnətdarlığını bildirdi: «Gənclər və İdman naziri Azad müəllimə öz dərin minnətdarlığımı bildirirəm bizə dəstək verdiyinə görə. Eyni zamanda Azərbaycan – Amerika Alyansı hər zaman okeanın o tayında gənclərlə bağlı uğurlu layihələrə dəstək verir və Azərbaycan həqiqətlərini dünyaya car çəkir. Sağ olsunlar bizə də dəstək verdilər. Eyni zamanda Mədəniyyət və Turizm Nazirliyi bizə öz yardımını əsirgəmədi. Hər kəsə bu layihəyə dəstəkçi olduğuna görə dərin təşəkkürlərimi ifadə edirəm».

Jalə xanım sonda 3 gün ərzində tamaşalara baxış keçiriləcəyini və peşəkar münsiflər heyəti tərəfindən qaliblərin müəyyənləşəcəyini də bildirdi. Onun sözlərinə görə, I yerin qalibinə 3000 AZN, II yerin qalibinə 2000 AZN, III yerin qalibinə isə 1000 AZN mükafat veriləcək. Bundan başqa müxtəlif nominasiyalar üzrə də qaliblər müəyyən olunacaq. Ötən ildə olduğu kimi “Ən yaxşı ssenarist”, “Ən yaxşı rejissor işi”, “Ən yaxşı baş rol ifaçısı”, “Ən yaxşı aktrisa” və s. olacaq.

Jurnalistlərin «bu festivalın gələn il davamı olacaqmı» sualına xanım milət vəkilinin cavabı belə oldu: «Bircə onu deyə bilərəm ki, gələn il daha fərqli bir layihə ilə qarşınıza çıxacağıq».

Gənclər və İdman Nazirliyinin sektor müdiri Elşən Hüseynov festivalın əhəmiyyətindən danışdı: «Ümidvaram ki, bu festivalda iştirak edən və qalib olan gənclər Azərbaycan mədəniyyətinə, incəsənətinə öz töhfələrini verəcəklər. Biz də nazirlik olaraq hər zaman bu layihəyə dəstək verməyə hazırıq».

Festivalın icracı direktoru Ramil Ağasıyev festival çərçivəsində istər peşəkar, istərsə də həvəskar gənc teatr kollektivlərində seçim aparıldığını bildirdi: «8 Bakı, habelə Sumqayıt, Ucar, Zaqatala, Ağdam, Zərdab truppalarının iştirak etdiyi festivala ümumilikdə 100-dən atrıq gənc qatılaraq, 13 maraqlı, aktual mövzulu tamaşalar hazırlanıb. “Zibil düşüncə”, “13 yaşlı qızın gündəliyi”, “Ekosid”, “Qoy nəfəs alım”, ”Zibilə düşdük”, “Oksigen balonu” və s. tamaşalarla 4 gün ərzində tamaşaçıları, xüsusən də gənc auditoriyanı teatra səsləyəcək festival zamanı tanınmış sənət adamlarının iştirakı ilə ustad-dərslərin yer aldığı və həyəcanla gözlənilən 3 günlük Art Kamp keçiriləcək. Bilirsiniz ki, Art Kamplara bütün dünyada çoxlu pullar xərclənir. Amma Azərbaycanda gənclərə bu fürsət pulsuz olaraq yaradılacaq».

Xatırladaq ki, millət vəkili Jalə Əliyevanın ideyası, Gənclər və İdman Nazirliyi, eləcə də Mədəniyyət və Turizm Nazirliyinin birgə layihəsi olan Ekologiya mövzusuna həsr olunmuş “Gənclərin II Ümumrespublika Teatr Festivalı”na ssenari qəbulu artıq başa çatıb. Ssenarilər səhnələşdirilmək üçün komandalara paylanılıb. “Bizə idea lazımdır” devizi ilə keçirilən festivalın əsas məqsədi – gənclərdə teatra olan marağı artırmaq, istedadlı gəncləri teatra cəlb etmək və onlara ekologiya ilə bağlı olan problemləri çatdırmaq, fikirlərini bu problemlərə yönəltməkdir.

Cəvahir Səlimqızı.

Mərkəz.- 2012.- 16 noyabr.- S.- 14.