Moskvada Azərbaycan muğam gecəsi keçirilib

Moskva müxbirinin verdiyi məlumata görə, Lyudmila Ryumina adına folklor mərkəzində keçirilən gecədə Azərbaycanın xalq artisti, muğam ifaçısı Mələkxanım Əyyubovanın konserti təşkil olunub. Xanəndəni Əhməd Bakıxanov adına Xalq Çalğı Alətləri Ansamblı müşayiət edib.

Nəfis səhnə tərtibatı ilə diqqəti cəlb edən konsertdə Mələkxanım Əyyubova ayrı-ayrı bəstəkarların musiqi əsərləri ilə yanaşı, yeni işıq üzü görən “Rast” musiqi albomuna daxil olan mahnıları da tamaşaçılara təqdim edib. Konsertdə xanəndəni xalq artistləri, tarzən Möhlət Müslümov, kamança ifaçısı Fəxrəddin Dadaşov və muğam üçlüyü müşayiət edib.

M. Əyyubovanın F.Əmirovun “Gözəlim sənsən”, Qəmbər Hüseynlinin “Ay işığında”, Nəriman Məmmədovun “Səndə çoxdan gözüm var”, “Süsən Sünbül”, “Mən necə bağban olaram”, həmçinin “Şüştər”, “Mahur”, “Mahur-hindi”, “Rast” muğamlarından ibarət kompozisiya ilə davam edən ifası tamaşaçıların alqışlarına səbəb olub.

Qeyd edək ki, Azərbaycanın Rusiyadakı səfirliyinin təşkilatçılığı ilə keçirilən konsertdə ölkəmizin Rusiyadakı fövqəladə və səlahiyyətli səfiri Polad Bülbüloğlu, diplomatik korpusun nümayəndələri, Heydər Əliyev fondunun, Ümumrusiya Azərbaycan Konqresinin, habelə Rusiya və Azərbaycan ictimaiyyətinin nümayəndələri iştirak ediblər.

Cəvahir Səlimqızı.

Mərkəz.- 2012.- 17 noyabr.- S.- 14.