“Yer kürəsi uşaqların gözü ilə” sərgilənəcək

Noyabrın 17-də “Park Bulvar” ticarət və əyləncə mərkəzində Ətraf Mühitin Mühafizəsi üzrə Beynəlxalq Dialoq Təşəbbüsü – IDEA Kampaniyası tərəfindən həyata keçirilən “Yer kürəsi uşaqların gözü ilə” fotomüsabiqəsinin fotosərgisi açılacaq.

2011-ci il iyulun 12-də Heydər Əliyev Fondunun vitse-prezidenti Leyla Əliyeva tərəfindən başladılmış IDEA Kampaniyası gənclər arasında ətraf mühitlə bağlı maarifləndirici işlərin aparılmasına, daimi fəaliyyətin təmin olunmasına, ekologiya problemlərini ailənin, cəmiyyətin və milli həyatın ayrılmaz hissəsinə çevrilməsi naminə fəaliyyət göstərən kampaniyadı.

Bu məqsədi öz fəaliyyətində rəhbər tutan IDEA Kampaniyası ekoloji maariflənməni beynəlxalq səviyyədə həyata keçirərək “Yer kürəsi uşaqların gözü ilə” fotomüsabiqəsini reallaşdırıb. Layihə tanınmış fotoqraf Reza ilə əməkdaşlıq çərçivəsində həyata keçirilərək böyük auditoriyanın marağına səbəb olmuşdur. Bir sıra ölkələrdən fotomüsabiqəyə qatılan gənclər “Mən təbiəti sevirəm” və “Mən çirklənmədən qorxuram” mövzularını əks etdirən fotolarını təqdim ediblər.

Müsabiqədə fotoqraf Rezanın sədrliyi ilə dünyanın müxtəlif yerlərindən olan foto və incəsənət ekspertləri tərəfindən seçilmiş qalib fotoların müəllifləri hədiyyələrə layiq görülüb.

“Yer kürəsi uşaqların gözü ilə” fotomüsabiqəsinin şəkillərinin təbliğ etdiyi ekoloji çağırışları əhaliyə çatdırmaq məqsədilə IDEA Kampaniyasının növbəti məlumatlandırıcı tədbirinin keçiriləcəyi “Park Bulvar” ticarət və əyləncə mərkəzində qalib fotoların əks etdirdiyi təbiətə “dost” mesajları 20-dən artıq sayda banner vasitəsilə sərgilənəcək.

Cəvahir Səlimqızı.

Mərkəz.- 2012.- 17 noyabr.- S.14.