Moldovada Azərbaycan Mədəniyyəti Günləri başa çatıb

2012-ci il noyabr ayının 11-dən 15-dək Moldovada Azərbaycan Mədəniyyət Günləri keçirilmişdir.

Noyabrın 14-də Moldovada Azərbaycan Mədəniyyət Günləri çərçivəsində daha bir tədbir Beltsı şəhərində baş tutub. Burada Azərbaycan Dövlət Rus Dram Teatrının kollektivi "Müsyö Jordan və Dərviş Məstəli şah" tamaşası ilə Beltsı şəhərinin tamaşaçıları qarşısında çıxış ediblər. M.F.Axundzadənin 200 illik yubileyi münasibətilə hazırlanan iki hissəli səhnə əsəri tamaşaçıların böyük marağına səbəb olub.

Paytaxt Kişineuda S. Lunkeviç adına Milli Filarmoniyada isə Əfqan Rəsulov, Ruslan Hüseynov və Elvin Bəşirovdan ibarət Azərbaycan caz ifaçılarının konserti olub. Tədbirin əvvəlində Azərbaycan Milli Konservatoriyasının rektoru, Xalq artisti Siyavuş Kərimi çıxış edib. O, Azərbaycanda caz musiqisinin tarixi, inkişaf yolları, bugünkü durumu barədə geniş məlumat verərək, musiqinin bu növünə marağın daha da artdığını və istedadlı ifaçılar nəslinin yetişdiyini bildirib. Artıq ənənəvi olaraq hər il ölkəmizdə Beynəlxalq Caz Festivalının keçirildiyini xatırıladan natiq, tamaşaçıların bu konsertdən zövq alacağına əmin olduğunu qeyd edib.

Tamaşaçıların böyük marağına və gurultulu alqışlarına səbəb olan konsertdə Moldovanın mədəniyyət naziri Boris Fokşa, Azərbaycan Respublikası mədəniyyət və turizm nazirinin müavini Ədalət Vəliyev, Azərbaycanın Moldovadakı səfiri Namiq Əliyev, Moldova Azərbaycanlıları Konqresinin Prezidenti Vüqar Novruzov, Türkiyə, Ukrayna, Belarusiya və Yaponiyanın Moldovadakı səfirləri iştirak ediblər.

Noyabrın 14-də Moldovada Azərbaycan Mədəniyyəti Günləri çərçivəsində Kişineudakı "Odeon" Mədəniyyət Mərkəzində Ülviyə Könülün "Vəkil haradadır?" filmi nümayiş olunub.

Bununla da zəngin tədbirlər proqramı ilə yadda qalan Moldovada Azərbaycan Mədəniyyəti Günləri sona çatıb.

Cəvahir Səlimqızı.

Mərkəz.- 2012.- 17 noyabr.- S.15.