Azərbaycan-Qazaxıstan mədəniyyət əlaqələri müzakirə olunub

Cari ilin noyabr ayının 19-da mədəniyyət və turizm naziri Əbülfəs Qarayev Azərbaycanda keçirilən Qazaxıstan Respublikasının Mədəniyyət Günləri ilə bağlı ölkəmizə səfərə gəlmiş Qazaxıstanın mədəniyyət və informasiya naziri Darxan Mınbayın rəhbərlik etdiyi nümayəndə heyəti ilə görüşüb.

Qonaqları salamlayan Ə.Qarayev Azərbaycanda növbəti dəfə Qazaxıstan Mədəniyyəti Günlərinin keçirilməsindən məmnun olduğunu bildirərək, iki ölkə arasında mədəniyyət və turizm sahəsində əlaqələrin genişləndiyini, bu istiqamətdə maraqlı layihələrin həyata keçirildiyini və bunun nəticəsi olaraq ötən illərə nisbətən bu il Qazaxıstandan Azərbaycana gələn turistlərin sayının artdığı vurğulayıb.

Keçmiş sovet respublikaları arasında iqtisadi inkişaf baxımından Azərbaycan və Qazaxıstanın ön sıralarda olduğunu nəzərə çatdıran Nazir, ölkəmizdə mədəniyyətə göstərilən dövlət qayğısı, yeni mədəniyyət ocaqları, muzey və teatrların inşası barədə məlumat verib, iki ölkə arasında xüsusilə muzey sahəsində təcrübə mübadiləsi həyata keçirməyin vacibliyini qeyd edib.

Gələn il Azərbaycanda II Ümumdünya Mədəniyyətlərarası Dialoq Forumunun keçiriləcəyini diqqətə çatdıran Nazir Qazaxıstanın nümayəndə heyətini bu tədbirə dəvət edib.

Qazaxıstanın mədəniyyət və informasiya naziri Darxan Mınbay iki ölkənin xalqları arasında tarixi bağlardan söz açıb, tarixi irs və adət-ənənələrin, bugünkü əlaqələrimizin bizi birləşdirdiyini vurğulayıb. Azərbaycanda son illər beynəlxalq əhəmiyyətli tədbirlərin həyata keçirildiyini yüksək qiymətləndirən qonaq, bir dost kimi ölkəmizin uğurlarına hər zaman sevindiklərini bildirib.

TÜRKSOY-un fəaliyyətindən də söz açan Darxan Mınbay qeyd edib ki, türk ölkələri olaraq adət-ənənələrimizi, mədəniyyətimizi qorumaqla xalqlarımızın mədəni inkişafına töhfə verməliyik. Qonaq Astananın 2012-ci ildə "Türk Dünyası Mədəniyyət Paytaxtı" və "MDB ölkələrinin mədəniyyət paytaxtı" elan edilməsi çərçivəsində keçirilən tədbirlərdən də danışıb.

Görüşdə iki ölkə arasında mədəni əlaqələrin daha da genişlənməsinin zəruriliyi vurğulanıb, Azərbaycanda Qazaxıstan Respublikasının Mədəniyyət Günlərinin də bu mərama xidmət etdiyi bildirilib.

Cəvahir Səlimqızı.

Mərkəz.- 2012.- 21 noyabr.- S.- 14.