Vədinə xilaf çıxdın, Yaşar Nuri…

Deyirdin, hələ çox rollar oynayacağam, amma…

Xalq artisti, sevilən sənətkar Yaşar Nuri aramızdan getdi

Hər dəfə Türkiyəyə müalicəyə gedəndə «Mən qayıdacağam», -deyirdin. Sonuncu dəfə də belə oldu, vəd verdin. Qayıtdın da, amma az vaxt keçdi. Ölümünlə bizi pərişan etdin. Hər zaman bizlərə bəxş etdiyin gülüşü, təbəssümü dodağımızdaca dondurdun. Vədinə beləmi əməl etdin, sevimli sənətkar?Axı biz sizi ayrı cürə gözləyirdik. Deyə-gülə… Yadınızdadır, axırıncı dəfə Bakıya qayıdanda, Kino günü-Aqil Abbasın «Dolu» filminin təqdimatına gəlmişdiniz. Şirin zarafatlarınızla zalı canlandırdınız. Hələ səhnədə və kinoda çox rollar yaradacağınızı söylədiniz. Hamımızı inandırdınız. Amma əcəl aman vermədi. Sizə ünvanlanacaq suallarım çox idi, Sizdən hələ nə qədər müsahibələr almaq niyyətindəydim. O səs üçün, o sözlər üçün yaman qəribsəmişəm, Yaşar Nuri! Heç bilmirəm nədən başlayım, nədən qurtarım, bu nagahani ölüm xəbəri yamanca sarsıtdı məni.

O türk həkimlərinə ümidimiz böyük idi, amma, ömrü yazan Allahdır. Nə xoşbəxt ki, sizə iki ömür yazdı. Biri Allah bəndəsi Yaşar Nuri ömrü, biri də sənətkar ömrü. Elə özünüz də həmişə deyirdiniz ki, aktyorlar iki ömür yaşayır. Birinci ömrü başa çatsa da, ikinci ömrü əbədi olur. Siz birinci ömrünüzü başa vurdunuz, amma əbədi ömrünüz hələ də davam edir və davam edəcək də. Səsiniz də yaşayır. Vücudunuz, ruhunuz da. Biz yenə də Sizinlə görüşəcək, qarşılaşacağıq. Siz yenə də bizi şirin zarafatlarınız, incə yumorunuzla dodağımıza təbəssüm qonduracaqsınız. Siz qarşımıza gah Elçin müəllim kimi çıxacaqsınız, bizə vəd verib oynamadığınız rollara görə «Bağışla» deyəcəksiniz. Biz sizinlə tez-tez “Ömrün yolları”nda qarşılaşacağıq, “Yollar görüşəndə…”, salamlaşacağıq, “Qatarda” söhbətləşəcək, “Evləri köndələn yar” – oxuyub “Kökdən düşmüş piano” birlikdə çalacağıq.

Amma hələ ki, yoxluğunuzu həzm etmək iqtidarında deyilik. Xəbər saytlarının, televiziyaların bar-bar bağırdığı «Azərbaycan xalq artisti, Akademik Milli Dram Teatrının aktyoru, Azərbaycan kino və teatrında əvəzsiz rolların ifaçısı Yaşar Nuri uzun sürən xəstəlikdən sonra 61 yaşında vəfat edib. Aktyorun ailəsindən verilən məlumata görə xalq artisti noyabrın 22-də səhər saatlarında dünyasını dəyişib»-xəbərinin şokunu yaşayırıq.

Elə isə gəlin sizli-bizli sənətkarın ömür yoluna nəzər salaq…

Yaşar Nuri 1951-ci il sentyabr ayının 3-də Bakıda tanınmış aktyor Məmmədsadıq Nuriyevin ailəsində dünyaya gəlib. Səhnəyə ilk dəfə on bir yaşında ADMKT-də “Toy kimindir?” (dramaturq Məhərrəm Əlizadə) tamaşasında Tapdıq rolunda çıxıb. Məktəbli vaxtlarında dövlət televiziyasının “Yelkən” verilişinin aparıcılarından olub. Bundan başqa o, “Buratino”, “Qaranquş”, “Pioner” uşaq verilişi-teatrlarında müntəzəm iştirak edib. Müxtəlif dram dərnəklərinə gedib, 26-lar adına məddəniyyət sarayı xalq teatrının tamaşalarında çıxış edib. 10 yaşından Azərbaycan televiziyasında uşaq verilişlərində çəkilən və teatr səhnələrində uşaq rollarını ifa edən aktyor 1968-ci ildə Bakıdakı 173 nömrəli orta məktəbi bitirib Azərbaycan Dövlət İncəsənət İnstitutunun dram və kino aktyorluğu fakültəsinə daxil olur. Orada kurs rəhbərləri, tanınmış səhnə xadimləri Rza Təhmasib və Əliheydər Ələkbərovdan aktyorluq sənətinin incəliklərini öyrənib. 1972-ci ildə institutu bitirdikdən sonra 1 il orduda xidmət edib və institutun tədris teatrında aktyor işləyib. 1974-cü il dekabr ayının 1-də Akademik Milli Dram Teatrının baş rejissoru Tofiq Kazımovun dəvətilə bu kollektivin aktyor truppasına qəbul olunub. Teatr aktyoru kimi görkəmli sənətkar olan Yaşar Nuri həm də məşhur kino ustası idi. Onun böyük populyarlıq qazandığı çoxlu ekran obrazları var. Əlliyə yaxın bədii filmə çəkilib, Azərbaycan Dövlət Televiziyasında hazırlanmış yüzdən çox tamaşada, bədii kompozisiyada, satirik səhnəciklərdə iştirak edib. Onun əsasən baş rolları ifa etdiyi teletamaşalar televiziyanın fondunda daimi sənət nümunələri kimi qorunur. Bunlardan Ramiz Həsənoğlunun hazırladığı Ruhəngiz Qasımovanın, Hüseyn Cavidin “Topal Teymur”, Aslan Qəhrəmanovun əsərləri əsasında Tariyel Vəliyevin lentə aldığı “Səni axtarıram”, “Bağışla”, “Səndən xəbərsiz” trilogiyası, İslam Səfərlinin “Göz həkimi”, Əbdürrəhim bəy Haqverdiyevin əsərləri əsasında “Ac həriflər” və s. televiziya tamaşalarını misal göstərmək olar.

Aktyor nəinki televiziya, həmçinin radio və kinostudiyanın dublyaj sektoru ilə də əməkdaşlıq edib, radioda “Sabahınız xeyir”, “Gülüş axşamı” yumoristik verilişlərinin, radio tamaşalarının iştirakçısı olub. “Azərbaycanfilm” kinostudiyasında isə saysız hesabsız yerli filmləri səsləndirib, əcnəbi filmləri dublyaj edib.Yaşar Nuri cəsarətli aktyor kimi qəliz rəqs nömrələrini, muğam və ya estrada, yaxud aşıq musiqisi üzərində qurulan satirik, dramatik, psixoloji, komik, qroteskli, karnaval estetikasına uyğun obrazların ifasında uğur qazana bilirdi.

Dünən Azərbaycan Dövlət Dram Teatrında xalq artisti Yaşar Nuri ilə vida mərasimi keçirilib. Vida mərasiminə Mədəniyyət və Turizm naziri Əbülfəs Qarayev, nazirliyin nümayəndələri, tanınmış mədəniyyət incəsənət xadimləri, aktyorlar qatılıblar.

Azərbaycan Dövlət Dram Teatrında keçirilən anım mərasimi zamanı Yaşar Nurinin oynadığı ən məşhur rolların dilindən parçalar səsləndirilib. Mədəniyyət və Turizm naziri Əbülfəs Qarayev Yaşar Nurinin oyandığı misilsiz obrazlardan, teatr sənətindəki uğurlardan söz açıb. Yaşar Nurinin Azərbaycan mədəniyyətinin əvəzolunmaz sənətkarı olduğunu söyləyən Əbülfəs Qarayev bildirib ki o, əsl sənət fədaisidir. Əbülfəs Qarayev Prezident İlham Əliyevin adından mərhumun ailəsinə və yaxınlarına başsağlığı verib.

Daha sonra çıxış edən xalq artistinin yaxın dostu Firəngiz Mütəllimova göz yaşlarını saxlaya bilməyib. O deyib ki, 34 ildir ki, Yaşar Nuri ilə çiyin-çiyinə çalışır: “Yaşar deyəndə Firəngiz, Firəngiz deyəndə Yaşar yada düşür. Mən saat 7-dən şokdayam. Yaşar mənim nəfəsim, canım, görən gözüm, arxam, dayağım, hər şeyim idi. Ən son srağagün onunla danışmışdım. Mən bu gün Yaşar haqqında son söz deyə bilmirəm. Yaşarın böyüklüyü qarşısında baş əyirəm”.

“Mərkəz”in kollektivi də bütün Azərbaycan xalqı kimi sənətkarın ölümündən sarsılıb. Allah rəhmət eləsin!

Cəvahir Səlimqızı

Mərkəz.- 2012.- 23 noyabr.- S.- 14.