Misralarının
ardından boylanan şair
Xətri əziz
Vahid Əziz, doğum gününüz mübarək!
Şair
var, şeirlərindən çox özü
görünür. Bir misrası belə yadda qalmayıb, amma
gecə-gündüz tribunalardan düşmür. Belələrinə
kağız oğrusu deyərdim.
Şair
də var, özündən çox sözü
görünür. O da belələrindəndir, özünü
qabağa verənlərdən yox, şeirləri ilə ürəkləri
oxşayan, həm də ovsunlayanlardandır. Onu sevməmək
sadəcə mümkün deyil. Bu gün doğum
günüdür. Mübarək olsun! Şeirləri ilə
dünyanı işığa qərq edən, misraları ilə
nisgilli könüllərə məlhəm olan, ürəklərdən
tikan çıxaran gözəl insan, gözəl şair,
gözəl dost Vahid Əzizi deyirəm. Gözəlləri
görəndə «yaşını gizlətməyə»
çalışan, «şair şorgöz olmur, gözəlbaz
olur»-deyib də özünü gözəllərə sevdirən
Vahid Əzizi… Lütfən bu xoş sözləri şairin
doğum günü şərəfinə söylədiyim
tost kimi qəbul etməyin. İçdən gələn, səmimi
sözlərimdir…
Hərdən istəyirəm bir
xata yapam,
Gizlədəm yaşımı
gözəl görəndə.
Hərdən axtarıram
özümü tapam,
Payız bağlarında xəzəl
görəndə…
Amma
biz Sizi hər zaman şeirlərinizdə tapa bilirik.
Özünüz tez-tez görünməyi xoşlamasanız
da, misralarınızın ardından boylanırsınız və
istəsəniz də, istəməsəniz də bizimlə bərabərsiniz.
Elə biri mən, hər
gün evimdə, kitab rəfimi bəzəyən «Alça
çiçəyinə bənzəyən ömür»
kitabınızın üz qabığındakı fotonuzla
salamlaşır, şeirlərinizlə söhbətləşirəm.
Çox sevdiyim və tez-tez xatırladığım bu
şeirinizi söyləyirəm.
- Bilməz idim, daşım belə
ağırdı,
Bəxtim belə biçarədir,
fağırdır,
Gedəcəyəm, göylər məni,
çağırdı
Daha yerdə qalmaq olmur, əzizim!
Vahid
müəllim, insan bəzən yer üzünün nadanlıqlarından
bezib, göy üzünə köç etmək istəyir. Hətta
ən sakit, ən səbirli, ən dözümlü Allah bəndəsi
belə «boğaza yığılanda» bu dünyaya üsyan etmək,
bəzən də hönkürmək istəyir. Elə mən
də…
Mən hönkürmək istəyəndə
-
Suya girmək istəyirəm,
Mən hönkürmək istəyəndə
-
Yer süpürmək istəyirəm,
Mən hönkürmək istəyəndə
-
Bərk tüpürmək istəyirəm.
Amma
doğum gününüzdə bu nadanlıqlardan, bu
çirkablardan danışıb qanınızı qaraltmaq
istəmirəm. İnşallah, bir gün oturub, dostyana dərdləşərik,
ürəyimizi boşaldarıq. Axı siz həm də ən
səmimi dostsunuz. Həm də mənim ən səmimi
müsahibimsiniz. Sevinirəm ki, illər bu səmimiyyətə
zərrə də olsun, kölgə salmayıb.
Çarə olmaz vaxt belini əyənə,
Bəla gələr gül
xətrinə dəyənə,
“Vahid Əziz vəfasızmış” – deyənə
“Sənə qurban bu Əzizdi” deyəsən…
Sevən
ürəklərin, nisgilli
könüllərin, duyan
qəlblərin simsarı,
həmişə, hər
yerdə, hər zaman xətri əziz olan Vahid Əziz, doğum gününüz
mübarək! Sevənləriniz
əskik olmasın, xətriniz həmişə
belə əziz olsun, qələminizin mürəkkəbi heç
zaman qurumasın!
Beləcə…
İllərin üstünə bir
il də
gəldi,
Zirvədə qar üstə qonan qar kimi.
İnsan olmasaydım, çiçəkləyərdim,
Hər bahar fəslində ağaclar kimi.
Yaşınızın üstünə
yaş gəlməsindən
asılı olmayaraq, həmişə belə cavan, şux, şövqlü olasınız!
Cəvahir Səlimqızı
Mərkəz.- 2012.- 24 noyabr.- S.14.