20 ölkənin gəncləri Bakıya ayaq açdı

VIII “START” Gənclərin Beynəlxalq Film Festivalı keçirilir

VIII “START” Gənclərin Beynəlxalq Film Festivalı ilə əlaqədar mətbuat konfransı keçirildi. Tədbirdə kinorejissor Elxan Cəfərov, ekspert jurnalist və publisist İlhamiyyə Rza, “START” tələbə filmləri festivalının direktoru Fehruz Şamıyev, media nümayəndələri və başqaları iştirak ediblər.

Qeyd edək ki, festival 28, 29, 30 noyabr tarixlərində Gənclər və İdman Nazirliyi, Mədəniyyət və Turizm Nazirliyi və “Cinema” Gənc Kinematoqrafçılar Mərkəzinin təşkilatçılığı ilə reallaşacaq.

Mətbuat konfransında çıxış edən VIII “START” Gənclərin Beynəlxalq Film Festivalının prezidenti Fehruz Şamıyev bildirdi ki, ilbəil əhatə dairəsini genişləndirən festival bu il bir çox yeniliklərlə yadda qalacaq. “Qafqazın ən böyük qısametrajlı film yarışması olan “STAR”-a bu il Azərbaycan, Türkiyə, Almaniya, Portuqaliya, İspaniya, Polşa, Cənubi Koreya, Pakistan, İran, Rusiya, Gürcüstan, Estoniya, Ukraniya, Serbiya, İslandiya, Qazaxıstan, Qırğızıstan, Özbəkistan, Tacikistan, Belorusiya ümumilikdə isə 20 ölkədən 250-dən çox film göndərilib. Seçim komissiyası festivalın müsabiqə proqramına animasiya, bədii və sənədli film növlərini əhatə edən 87 film daxil edib”.

Onun sözlərinə görə, festivalda daha bir yenilik “Yerli” və “Beynəlxalq” yarışma proqramlarının olmasıdır. “Bununla yerli müəlliflərə şans verilir. Onlar filmlərinin səviyyəsini nəzərə alıb işlərini festivalın “Yerli” müsabiqə proqramına göndəriblər”.

F.Şamıyev qeyd edib ki, müsabiqəyə təqdim olunan yerli və əcnəbi ekran əsərləri Avropanın tanınmış festivallarında mükafat almış kinematoqrafçılar və kino mütəxəssislərindən ibarət münsiflər heyəti tərəfindən qiymətləndiriləcək. Festivalda iki – “Yerli” və “Beynəlxalq” müsabiqə proqramı olduğundan jüri üzvləri də bu proqrama əsasən seçilib. “Yerli”müsabiqədə filmlər 3 nəfərdən ibarət yerli münsiflər heyəti: kinorejissor Elxan Cəfərov, İlqar Safat və “New Baku Post” qəzetinin təsisçisi, jurnalist Tural Əliyev tərəfindən qiymətləndiriləcək. “Beynəlxalq” müsabiqədə isə filmləri 5 nəfərdən ibarət beynəlxalq jüri heyəti seçəcək. Yeniliklərimizdən biri də məhz bu jürinin seçilməsidir. Bu, festivalın tarixində bir ilk olacaq. Belə ki, VIII “START” Gənclərin Beynəlxalq Film Festivalı Azərbaycanın ilk qadın kinorejissoru Qəmər Salamzadəyə ithaf olunduğundan beynəlxalq müsabiqənin münsiflər heyətinin üzvləri də yaradıcı, sənətdə öz sözlərini demiş xanımlardan ibarət olacaq. Onlar Azərbaycanın xalq artisti, Azərbaycan Respublikası Kinematoqrafçılar İttifaqının sədri Şəfiqə Məmmədova, iranlı rejissor, ssenarist Təhminə Milani, ekspert jurnalist, publisist, PR mütəxəssis İlhamiyyə Rza, rusiyalı prodüser Yelena Yatsura, polşalı rejissor Culiya Kolbergerdir.

Müəlliflərin ekran əsərləri “Ən yaxşı bədii film”, “Ən yaxşı sənədli film”, “Ən yaxşı cizgi filmi”, “Ən yaxşı eksperimental film” və “Ən yaxşı film- Qran Pri” uğrunda yarışacaq.

Festivalın beynəlxalq jüri heyətinin üzvü ekspert jurnalist, publisist, PR mütəxəssis İlhamiyyə Rza münsiflər heyətinin xüsusi incəliklə və maraqlı seçildiyinə diqqət çəkdi. “Kino festivalın münsiflər heyətində jurnalist də, aktyor da, prodüser də olmalıdır. Fikrimcə, filmi ictimai və həlli baxımından qiymətləndirmək üçün ona hərtərəfli baxış mütləqdir. Festivalın işinə uğurlar arzulayıram. Ümid edirəm ki, sondakı nəticələr bizim hamımızın gözləntilərini doğruldacaq”.

Kinorejissor İlqar Safat festivalın kino çəkməyə yeni başlayan rejissorlar üçün xüsusi əhəmiyyət kəsb etdiyini vurğulayıb. “Biz vaxtilə belə festivallardan məhrum idik. Sevinirəm ki, indi bu səpkili festivallar var. Belə festivallar gənclərə əlaqələrin qurulmasına, xarici kino prosesləri ilə tanış olmağa şərait yaradır”.

“Mən çox sevinirəm ki, festivalda məhz gənclərin işləri nümayiş olunacaq. Bu o deməkdir ki, gənclərin kinoya , festivala həvəsi var və bu həvəs ildən ilə artır”, -deyə Elxan Cəfərov bildirib.

Məlumat üçün bildirək ki, “START” Gənclərin Beynəlxalq Film Festivalı ilk dəfə olaraq 2004-cü ildə “Cinema” Gənc Kinematoqrafçılar Mərkəzi tərəfindən təsis edilib. Azərbaycanın ilk peşəkar rejissoru Səməd Mərdanovun adını daşıyan festival növbəti illərdə digər ölkələrin tələbələrini də özünə cəlb etməklə əhatə dairəsini daha da genişləndirdi. Çünki “START”-ın təşkilatçı və təsisçilərinin məqsədi regionda (Yaxın Şərq, MDB) ən mötəbər tələbə film festivalının məhz Azərbaycanda keçirilməsinə nail olmaq idi. Beləliklə, artıq 2005-ci ildən festival beynəlxalq xarakter daşımağa başlayıb. 2011-ci ildən “START” həm də gənc kinematoqrafçıların da festivalı olub. Hazırda kinoforumda tələbələrlə yanaşı yaşı 35-ə qədər olan gənc rejissorlar da həvəslə iştirak edir.

Bu ildən isə festivalın saytı filmfestival.az adı altında fəaliyyət göstərir. İki dildə istifadəçilərin öhdəsinə verilən sayt festival haqda informasiyanın tez yayılmasına, daha çox tələbə və gəncin festivalda iştirakına şərait yaradır.

Minimum güzəşt və maksimum istedad devizi ilə bu il səkkizinci dəfə baş tutacaq festivalın məqsədi kino sahəsində tələbələrin əsərlərinin baxışını və müzakirəsini keçirmək, aralarında ən istedadlılarını müəyyən etmək, gənc müəlliflərə dövlət qayğısını və diqqəti artırmaq, onları həvəsləndirmək və bu sahədə dünya praktikasında baş verən proseslərlə tanış etməkdir. Bununla yanaşı hər il Azərbaycanda gənc kinematoqrafiyanı və onun problemlərini diqqət mərkəzinə gətirən festival əsasən azərbaycanlı tələbələrin kinoda gələcək istiqamətlərini dəqiqləşdirməsinə imkan verir. “START” həm də yerli tələbə rejissorların əcnəbi həmkarları ilə əlaqələr qurmasında start nöqtəsidir.

Cəvahir Səlimqızı

Mərkəz.- 2012.- 28 noyabr.- S.- 14.