Əbülfəs Qarayev Türkiyəyə gedib

Nazir ”M.F.Axundzadə İli” çərçivəsində keçirilən tədbirlərə qatılıb.

Mədəniyyət və Turizm Naziri Əbülfəs Qarayevin başçılıq etdiyi nümayəndə heyəti böyük mütəfəkkir, Azərbaycan milli dramaturgiyasının banisi, görkəmli ictimai xadim və maarifçi Mirzə Fətəli Axundzadənin anadan olmasının 200 illiyinin TÜRKSOY çərçivəsində qeyd edilməsi və 2012-ci ilin həmin təşkilat tərəfindən “M.F.Axundzadə İli”nin elan edilməsi ilə əlaqədar dünən Türkiyənin Ankara şəhərində TÜRKSOY təşkilatının qərargahında keçiriləcək rəsmi açılış mərasimində iştirak edib.

Tədbirdə həmçinin Türkiyənin Mədəniyyət Naziri Ərtoğrul Günay, TÜRKSOY təşkilatının Baş katibi Düssen Kaseinov, Gürcüstanın mədəniyyət və abidələrin qorunması naziri cənab Nikolaz Rurua, AMEA-nın alimləri və digərləri iştirak ediblər. Tədbir zamanı M.F.Axundzadə yaradıcılığına aid kitabların TÜRKSOY təşkilatına təqdim olunması və ədibin həyat və yaradıcılığına həsr edilmiş “Sabahın elçisi” adlı filmi nümayiş etdirilib.

Qeyd edək ki, “M.F.Axundzadə İli”-nin TÜRKSOY-a daxil olan bütün üzv ölkələrdə yüksək səviyyədə keçirilməsi məqsədi ilə müvafiq tədbirlər həyata keçirilməkdədir.

Cəvahir Səlimqızı

Mərkəz.- 2012.- 27 yanvar.- S. 11.