Azərbaycanın üç böyük ədibi şərəfləndirildi

Bu il Azərbaycanın üç böyük ədibinin – dünya ədəbiyyatı xəzinəsinə misilsiz incilər vermiş mütəfəkkir şair Nizami Gəncəvinin 870, milli dramaturgiyamızın banisi Mirzə Fətəli Axundzadənin 200 və görkəmli satirik şair Mirzə Ələkbər Sabirin 150 illik yubileyləri dövlət səviyyəsində qeyd olunacaq.

Prezident İlham Əliyevin imzaladığı müvafiq sərəncamlara əsasən, Mədəniyyət və Turizm Nazirliyinə Təhsil Nazirliyi, Azərbaycan Milli Elmlər Akademiyası, Yazıçılar Birliyi və digər əlaqədar qurumlarla birlikdə hər üç yubileyə həsr olunmuş tədbirlər planı hazırlayaraq həyata keçirmək tapşırılıb. Mədəniyyət və Turizm Nazirliyində N.Gəncəvi, M.F.Axundzadə və M.Ə.Sabirin yubileylərinin yüksək səviyyədə qeyd olunması ilə bağlı tədbirlər planı müzakirə olunub. Mədəniyyət və Turizm naziri Əbülfəs Qarayevin sədrliyi ilə keçən iclasda nazirin birinci müavini Vaqif Əliyev, Təhsil nazirinin müavini Qulu Novruzov, Yazıçılar Birliyinin sədri, Xalq yazıçısı Anar, AMEA-nın vitse-prezidenti, Milli Azərbaycan Tarixi Muzeyinin direktoru Nailə Vəlixanlı, Mədəniyyət və Turizm Nazirliyinin Nəşriyyat, Reklamın Təşkili və İnformasiya şöbəsinin müdiri Vaqif Bəhmənli, nazirliyin məsul şəxsləri, mədəniyyət müəssisələrinin rəhbərləri iştirak ediblər.

İclası Mədəniyyət və Turizm naziri Əbülfəs Qarayev açaraq ölkə başçısı İlham Əliyevin Azərbaycanın üç görkəmli ədibinin yubileyləri haqqında imzaladığı sərəncamların əhəmiyyətini vurğulayıb, bu sənədlərin dövlət tərəfindən ədəbi irsimizə, mədəniyyətimizə göstərilən diqqət və qayğının bariz nümunəsi olduğunu bildirib.

Qeyd olunub ki, dövlət başçısının sərəncamlarına əsasən dahi Azərbaycan şairi və mütəfəkkiri Nizami Gəncəvinin anadan olmasının 870, milli dramaturgiyamızın banisi, görkəmli ictimai xadim və maarifçi Mirzə Fətəli Axundzadənin anadan olmasının 200 və böyük şair, bədii-ictimai fikir tariximizdə yeni ədəbi məktəbin banisi, görkəmli maarifpərvər Mirzə Ələkbər Sabirin anadan olmasının 150 illiyi ilə bağlı geniş tədbirlər, bir sıra layihələr həyata keçiriləcək.

İclasda yubiley tədbirləri ilə bağlı müzakirələr aparılıb, müxtəlif təkliflər səslənib. Qərara alınıb ki, böyük ədib və mütəfəkkirlərin yaradıcı irsini təbliğ etmək məqsədi ilə əsərləri nəşr olunsun, çap məhsulları Azərbaycanda və beynəlxalq kitab sərgilərində nümayiş etdirilsin, səyyar sərgilər təşkil edilsin. Yubileylərlə bağlı Bakıda beynəlxalq elmi konfransların təşkili, tanınmış elm və ədəbiyyat araşdırıcıları bu konfranslara dəvət olunması, ölkəmizdə fəaliyyət göstərən bütün dövlət teatrlarında, habelə türkdilli ölkələrdə, MDB məkanında dramaturqun əsərlərinin tamaşaya qoyulması, respublikamızın rayonlarında tədbirlər keçirilməsi, hər üç ədibin doğulduğu məkanlara – Gəncə, Şəki və Şamaxıya turist səfərlərinin təşkil olunması və s. təkliflər səslənib.

İclasda yubileylərin yekun tədbirlərinin vaxtı da müzakirə olunub. Qərara alınıb ki, M.Ə.Sabirin yubileyi ilə bağlı yekun tədbir may ayının sonu – iyunun əvvəlində, N.Gəncəvinin yubileyi ilə bağlı yekun tədbir sentyabrın axırı – oktyabrın əvvəllərində keçirilsin, M.F.Axundzadənin yubileyinə isə noyabrda təntənəli şəkildə yekun vurulacaq.

Cəvahir SƏLİMQIZI

Mərkəz.- 2012.- 28 yanvar.- S. 11.