Həyat eşqi vücudlarından böyük olanlar…

Əlil Uşaq və Yeniyetmələrin İnteraktiv Tamaşaların IV Milli Festivalı keçirildi

Dünən Rəşid Behbudov adına Mahnı Teatrında Əlil Uşaq və Yeniyetmələrin İnteraktiv Tamaşaların IV Milli Festivalının açılış mərasimi oldu. Tədbirin təşkilatçıları “Müşfiq” Əlil Uşaqlara Yardım İctimai Birliyi, “Müstəqil Həyat” İnkişaf və Dəstək Mərkəzidir. Öyrəndik ki, layihənin əsas məqsədi əlil uşaqlar arasında istedadları aşkara çıxarmaq və onlara özlərini tam qabiliyyətli vətəndaşlar kimi hiss etməyə yardım göstərməkdir.

Qeyd edək ki, festivalda Azərbaycanın müxtəlif rayonlarında fəaliyyət göstərən 10 əlil uşaq və gənclər təşkilatları iştirak edirdi.

Hər bir təşkilatı təmsil edən istedadlar Azərbaycan və dünya ədəbiyyatından seçib səhnələşdirdikləri tamaşalarla aiditoriya qarşısına çıxdılar. İlk olaraq, Sumqayıtda yerləşən Sağlamlıq İmkanları Məhdud olan Uşaqlar Üçün Xüsusi Tipli Məktəbin yaradıcı uşaqları öz məharətlərini nümayiş etdirdilər. Hə, yadımdan çıxmamış onu da deyim ki, Rəşid Behbudov adına Mahnı Teatrında anşlaq idi və hətta yer tapmadıqları üçün tamaşaları ayaqüstə seyr edənlər də vardı.

Uşaqlar Abdulla Şaiqin «Tıq-tıq xanım» nağılı əsasında hazırladıqları səhnə əsəri ilə festival iştirakçılarının qarşısına çıxdılar. Onu da biləsiniz ki, səhnəarxası həyəcanlı görünsələr gə, oyun zamanı balaca «aktyorlarımızın» üzündə həyəcandan əsər-əlamət görmədik. Hər bir uşaq sanki 10 il səhnədəymiş kimi təbii, səmimi oyun nümayiş etdirdi. Hətta bir anlıq mənə elə gəldi ki, Dövlət Kukla Teatrının səhnəsində peşəkarların təqdimatında «Tıq-tıq xanım» tamaşasını seyr edirəm. Tamaşa bitən kimi, salonu alqış səsləri bürüdü, biz də balaca aktyorlarımızı həm təbrik, həm də sorğu-sual etdik. Oyunundan məmnun qalan 13 yaşlı Həsənəliyev İsmayıl festivala böyük coşğu ilə hazırlaşdığını söylədi: «İnsanlar qarşısında çıxış etmək, tamaşa göstərmək mənim üçün böyük xoşbəxtlikdir. Həmişə arzusunda olmuşam ki, mən teatr tamaşalarında oynayım, məni alqışlasınlar. Bu gün arzum reallaşdı». İsmayıl onu da söylədi ki, böyüyəndə Rasim Balayev kimi aktyor olacaq.

14 yaşlı Nəzərov Rasimin isə həyəcandan dili söz tutmadı. Utandığından yanaqları allanan bu balaca aktyorun heç olmasa, arzusunu eşitmək istədik. Oyunu barədə dili söz tutmasa da, arzusunu paylaşdı: «Allah mənə və bütün yaşıdlarıma cansağlığı qismət eləsin, heç vaxt xəstə olmayaq. Anam deyir ki, canın sağ olsa, qalan hər işin öhdəsindən özün gələrsən».

Sözügedən məktəbin Azəbaycan dili və ədəbiyyat müəlliməsi Leyla Məmmədova da uşaqların qabiliyyət və bacarıqlarından ağızdolusu danışdı: «Allah bu uşaqlara elə böyük istedad nəsib edib ki, baxanda heyran qalırsan. Özü də sizə deyim ki, bu uşaqların həyat eşqi vücudlarından qat-qat böyükdür. Onların sadəcə, dəstəyə, nəvazişə, diqqətə ehtiyacaları var. Nə yaxşı xeyirxah insanlar var və onlar bu cür festivallar təşkil edir, əlil uşaqları sevindirir».

Qeyd edim ki, festivalda nümayiş olunan bütün tamaşalar ürəklə hazırlandığından baxımlı və maraqlı idi. Bakı Şəhər İcma Əsaslı Reabilitasiya Mərkəzinin (UAFA) təmsilçilərinin nümayiş etdirdikləri «Dostluq» (nağılın bədii rəhbəri İntiqam Soltandır), Müstəqil Həyat İnkişaf və Dəstək Mərkəzinin «Əlilliyin dərki», (müəllifi Aydın Xəlilov), Gəncə İcma Əsaslı Realibitasiya Mərkəzinin «Bala arı» (müəllifi Əli Səmədli), «Müşfiq» Əlil Uşaqlara Yardım İctimai Birliyinin Masallı filialının «Xocalıdan gələn səslər» (müəllifi İbadulla Hüseynzadə), hansı birini sayım, bütün mərkəzlərin təqdim etdiyi tamaşaların hamısı sürəkli tamaşaçı alqışlarına layiq görüldü. Bu isə o demək idi ki, əlil uşaqların hazırladıqları tamaşalar peşəkarlıq baxımından heç də böyüklərin, həm də sağlam insanların hazırladıqları səhnə əsərlərindən geri qalmır.

Qeyd edək ki, festivalda cəmiyyətə ismarış xarakterli tamaşalar da oynanıldı. İbrətamizliyi ilə seçilən həmin tamaşalardan təsirlənən, kövrəlib gözləri dolanlar da oldu. Məsələn, bu qəbildən olan Mingəçevir Şəhər Uşaq və Ailələrə Dəstək Mərkəzinin təmsilçilərinin təqdim etdiyi «Bizdən utanmayın, imtina etməyin, əziz böyüklər» tamaşası salonda böyük əks-səda doğurdu. Qeyd edək ki, tamaşanın müəllifi Elnarə Yusifova idi.

Yeri gəlmişkən, festivalın təşkilatçılarının da təəssüratlarını paylaşdıq. «Müstəqil həyat» İnkişaf və Dəstək Mərkəzinin sədri Aydın Xəlilovun festivalla bağlı fikirləri belə oldu: «Biz dünya təcrübəsinə arxalanaraq çalışırıq ki, hər festivala Azərbaycanda əlilliyi olan uşaq və gənclərin inkişafında rol oynayan, onların cəmiyyətə inteqrasiya sahəsində fəaliyyət göstərən müxtəlif reabilitasiya mərkəzləri, eləcə də ictimai birlikləri cəlb edək. Onlar da öz növbələrində təşkilat nəzdində yaradılmış istedadlı uşaqlardan ibarət incəsənət kollektivlərinin geniş aiditoriya qarşısında çıxışlarını təqdim edirlər. Bu ənənə hər il davam etdiriləcək».

…Sonda onu da diqqətinizə çatdıraq ki, Əlil Uşaq və Yeniyetmələrin İnteraktiv Tamaşaları IV Milli Festivalı ilk dəfə olaraq 2006-cı ildə keçirilib. Əlilliyi olan insanların iştirakı ilə keçirilən və cəmiyyət tərəfindən böyük maraqla qarşılanan tədbirin elə bu səbəbdən də hər ilin dekabrında təşkili nəzərdə tutulub. Gözəl! Çünki həm savab, həm də xeyirxah bir missiyadır.

Səlimqızı Cəvahir

Mərkəz.- 2009.- 17 dekabr.- S. 11.