Polşada Azərbaycan rəssamının sərgisi keçirilib

Azərbaycan Respublikasının Polşa Respublikasındakı səfirliyinin təşkilatçılığı ilə Varşavada Azərbaycan Rəssamlar İttifaqının üzvü, rəssam və fotoqraf Həmid İbadullayevin "Gecə-gündüz" adlı sərgisi keçirilib. Sərginin açılışında Polşanın müxtəlif hökumət qurumları və yerli ictimaiyyətin nümayəndələri, incəsənət xadimləri iştirak ediblər. Səfir Həsən Həsənov tədbiri giriş sözü ilə açaraq, Azərbaycanın mədəniyyəti, rəssamlıq ənənələri, qədim tarixi barədə ətraflı məlumat verib. Mərasimdə "Azərbaycan mənzərələri" videoçarxı göstərilib və tədbir Vaqif Mustafazadənin musiqisinin sədaları altında davam edib. Sonda polyak Voytek Kvapisinski milli alətimiz olan tarda kiçik konsert proqramı ilə çıxış edib. Sərgi iştirakçılar tərəfindən böyük maraqla qarşılanıb.

Mövqe. - 2010.- 15 dekabr.- S.13.