"Səməd Vurğun təsviri sənətdə" rəsm sərgisi açılıb

Dekabrın 14-də "Qız Qalası" rəsm qalereyasında "Səməd Vurğun təsviri sənətdə" sərgisinin açılış mərasimi və eyni mövzuda fotoalbomun təqdimatı keçirilib. Sərgi Səməd Vurğunun ev-muzeyinin yaradılmasının 35 illiyinə həsr olunub. Ev-muzeyin direktoru, S.Vurğunun nəvəsi Aygün Vəkilova bildirib ki, sərgidə Səttar Bəhlulzadə, Maral Rəhmanzadə, Tahir Salahov, Mikayıl Abdullayev, Arif Hüseynov, Oqtay Sadıqzadə, Nəcəfqulu İsmayılov, Kamil Xanlarov, Elmira Şahtaxtinskaya, Asəf Cəfərov, Nadir Əbdürrəhmanov, Qafar Sarıvəlli və digər görkəmli Azərbaycan rəssamlarının 50-dən çox sənət əsəri nümayiş etdirilir. Aygün Vəkilova deyib ki, Səməd Vurğunun 2011-ci ildə keçiriləcək 105 illiyi ərəfəsində muzeyin fondlarında qorunan eksponatlar bərpa və konservasiya edilərək çərçivələnib.

Tədbirdə Mədəniyyət və Turizm Nazirliyinin aparat rəhbəri Firudin Qurbanov, Xalq rəssamı Arif Hüseynov, Bakı Şəhər Mədəniyyət və Turizm İdarəsinin rəisi Əlikram Əliyev, tənqidçi-ədəbiyyatşünas Qurban Bayramov və başqaları Səməd Vurğunun yaradıcılığından, xalqın öz şairinə ehtiramından söhbət açıblar. Sərgiyə, eyni zamanda şairin ailə üzvləri - Yusif və Vaqif Səmədoğlularının, Vurğun Vəkilovun rəsmləri də daxil edilib. Sərgidə nümayiş etdirilən tablolar "Azpoliqraf" nəşriyyatında çapdan çıxmış "Səməd Vurğun təsviri sənətdə" fotoalbomunda nəşr olunub. Mədəniyyət və turizm naziri Əbülfəs Qarayevin ön söz yazdığı fotoalbomu şairin ev-muzeyinin direktoru Aygün Vəkilova tərtib edib.

Mövqe.- 2010.-16 dekabr.- S.13.