Azərbaycan Aşıqlar Birliyi tərəfindən 50-dən çox tədbir kecirilib

Dekabrın 29-da Azərbaycan Aşıqlar Birliyində 2010-cu ilin yekunlarına həsr edilmiş iclas keçirilib. Tədbirdə çıxış edən Azərbaycan Aşıqlar Birliyinin sədri, Xalq şairi Zəlimxan Yaqub bütün sənət adamlarını, o cümlədən aşıqları Dünya Azərbaycanlılarının Həmrəyliyi Günü və Yeni il bayramı münasibətilə təbrik edib və onlara uğurlar arzulayıb. Bildirib ki, cari ildə qurumun təşəbbüsü və təşkilatçılığı ilə 50-dən çox tədbir keçirilib. Azərbaycan aşıq sənəti dünyanın bir çox ölkələrində yüksək səviyyədə təbliğ olunub. Bu tədbirlər silsiləsində ölkəmizdə keçirilmiş Birinci Beynəlxalq Aşıq Festivalının xüsusi yeri vardır. Azərbaycanda ilk dəfə təşkil edilmiş festivala 8 ölkəni təmsil edən sənətkarlar qatılıb.

Prezident İlham Əliyevin dəstəyi ilə reallığa çevrilən bu festival milli aşıq sənətimizin beynəlxalq aləmdə tanıdılması və təbliği, mədəniyyətimizin inkişafında aşıq sənətinin rolunun artırılması, Azərbaycan aşıqlarının və aşıq-ozan sənətinin yayıldığı ölkələrin sənətkarlarının bir araya gətirilməsi üçün böyük imkanlar yaradıb. "Ulu öndərimiz Heydər Əliyevin xalq yaradıcılığına bəslədiyi həssas münasibətə sadiq qalaraq aşıq sənətinin inkişafı, dünyada tanıdılması üçün əlimizdən gələni edirik. Bu gün aşıq sənətinin inkişafı Azərbaycanın birinci xanımı, Heydər Əliyev Fondunun Prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın səyləri sayəsində yeni mərhələyə qədəm qoyub. Muğam sənətindən sonra aşıq sənətinin də YUNESKO-nun "Bəşəriyyətin Qeyri-maddi Mədəni İrsinin Reprezentativ Siyahısı"na daxil edilməsi bunun əyani ifadəsidir".

Bildirilib ki, Birlik tərəfindən 2011-ci il "Aşıq Ələsgər ili" elan edilib və böyük sənətkarın 190 illik yubileyi münasibətilə ölkəmizin bütün bölgələrində silsilə tədbirlər təşkil ediləcək. Tədbirdə çıxış edən professorlar Qəzənfər Paşayev, Məhərrəm Qasımlı və başqaları Aşıqlar Birliyinin fəaliyyətini yüksək qiymətləndirib və qurumun bütün əməkdaşlarına uğurlar ar-zulayıblar.

Mövqe.- 2010.- 31 dekabr.- S. 13.