Həvəskar rəssamların və tətbiqi sənət ustalarının əl işlərindən ibarət sərqi açılıb

Rusiya Kulturologiya İnstitutunda Dünya Azərbaycanlılarının Həmrəylik Gününə həsr olunmuş həvəskar rəssamların və tətbiqi sənət ustalarının əl işlərindən ibarət sərgi açılıb. Sərgini Azərbaycan Mədəniyyət və Turizm Nazirliyi, Nazirliyin Elmi-Metodiki Mədəniyyətşünaslıq Mərkəzi və Rusiya Kulturologiya institutu təşkil edib. Rusiya Kulturologiya İnstitutunun direktoru, sənətşünaslıq doktoru, professor, Rusiyanın Əməkdar İncəsənət xadimi, Rusiya Elmlər Akademiyası Elmi Şurasının üzvü Kiril Razloqov çıxış edərək tədbirin xalqlarımız arasında mədəni dialoqun genişləndirilməsində əhəmiyyətini qeyd edib.

Azərbaycan Elmi-Tədqiqat Mədəniyyətşünaslıq İnstitutunun direktoru, fəlsəfə elmləri doktoru, professor Vilayət İsmayılov mədəniyyət sahəsində Azərbaycan-Rusiya əlaqələrindən danışıb. O, xüsusi vurğulayıb ki, Rusiyanın aparıcı kulturologiya institutunda Azərbaycan rəssamlarının sərgisinin açılması ölkələrimiz arasında humanitar sahədə əlaqələrin fəal inkişaf etməsindən xəbər verir. Rusiya Fəlsəfə Cəmiyyətinin beynəlxalq məsələlər üzrə müşaviri, fəlsəfə elmləri namizədi, AMEA-nın Fəlsəfə, Sosiologiya və Hüquq institutunun baş elmi işçisi Ariz Gözəlov incəsənətin qloballaşan dünyada mədəniyyətlərin dialoqunun ayrılmaz hissəsi olduğunu söyləyib. Sərgidə rəssamlarımızın Azərbaycana həsr olunmuş əsərləri nümayiş etdirilir. Tətbiqi sənət ustalarının əl işləri isə Azərbaycanın nəsildən-nəslə ötürülən zəngin ənənələrindən xəbər verir.

Mövqe.- 2010.- 31 dekabr.- S. 13.