Sənətçilərimiz İranda möhtəsəm proqramla çıxıs ediblər

İranda keçirilən Azərbaycan Mədəniyyəti Günləri çərçivəsində Tehran şəhərindəki "Niyavəran" mədəniyyət sarayında möhtəşəm konsert proqramı nümayiş etdirilib. Azərbaycan Dövlət Kamera Orkestrinin müşayiəti ilə Əməkdar artist Samir Cəfərov dahi bəstəkar Üzeyir Hacıbəylinin "Arşın mal alan" musiqili komediyasından mahnılar oxuyub. Azərbaycan Dövlət Mahnı və Rəqs Ansamblının rəqs qrupu "Toy", "İgidlər" və "Çobanlar" rəqslərini ifa ediblər. Tamaşaçılar Samir Cəfərov və Anar Şuşalının ifasında böyük şairimiz Səməd Vurğunun sözlərinə bəstələnmiş "Azərbaycan" mahnısını ayaqüstə, hərarətli alqışlarla qarşılayıblar. Azərbaycan Mədəniyyəti Günləri çərçivəsində sentyabrın 29-da Tehranda "Qırxıncı qapı" bədii filmi nümayiş etdirilib və sənətçilərimiz növbəti konsert proqramı ilə tamaşaçıların görüşünə gəliblər.

Mövqe.- 2010.-30 sentyabr.- S. 13.