Gənclər Təşkilatları dövlətçiliyin müdafiəsində

Ötən gün “Kanal 13” internet televiziyasında yayımlanan “Bütöv Azərbaycanın səsi” proqramının qonaqları Azərbaycanda fəaliyyət göstərən gənclər təşkilatlarının sədrləri idi. Tural İsmayılovun aparıcılığı ilə yayımlanan proqramda, Azərbaycan Gənclərinin Avropaya İnteqrasiya Təşkilatının sədri Gülsel Səfərova, sədr müavini Nərgiz Eyvazova, “Gənc Liderlər” Uşaq və Gənclər Təşkilatının sədri Fərid Şahbazlı, Dünya Azərbaycanlıları Konqresi Gənclər Təşkilatının sədri Seymur Həsənli ölkə daxilində son baş verən hadisələrlə bağlı gəncliyin mövqeyini ortaya qoydular. “Dövlətçiliyə dəstək” adlanan proqramda ilk söz DAK Gənclər Təşkilatının sədri Seymur Həsənliyə verildi.

“Mən gəncləri, mətbuat orqanlarını bir o qədər də təlaşa düşməməyə dəvət edirəm. Çünki, baş verən hadisələr daha öncəki zamanlarda da olub. Bu bir dalğadır, qısa müddətlik zamana hesablanıb. Nəticəsi də olmayacaq. Ona görə olmayacaq ki, onun heç bir sosial dayağı yoxdur. Dağıdıcı fəaliyyət göstərən belə qurumları maliyyələşdirən və həvəsləndirən fondlar Azərbaycanın inkişaf etməsini istəmirlər. Onlar heç bunun marağında belə deyillər. Sadəcə belə oyunları qurmaqla öz iqtisadi mənfəətləri üçün nələrisə gerçəkləşdirə biləcəklərinə inanırlar. Unutmaq olmaz ki, bura hər hansı bir ərəb ölkəsi deyil. Azərbaycan dövləti kifayət qədər güclüdür. Problemsiz ölkə yoxdur. Eləcə də Azərbaycan. Biz bu problemlərin həlli üçün prezidentimizin ətrafında sıx birləşməliyik” deyə Seymur Həsənli bildirib.

Sonra AGAT sədri Gülsel Səfova gəncləri dövlətlə iqtidar anlayışını səhv salmamağa çağırıb. “Bəzi gənclərin belə təxribatlara uyması məndə sadəcə acı təəssüf doğurur. Belə gənclər hələ iqtidarla, dövlət anlayışları arasında fərqin nədən ibarət olduqlarını bilmirlər. Öncə bir kitab oxuyub elmini inkişaf etdirmək lazımdır. Xaricdə yaşayan bir sıra gənclərimizin bu sahədə fəaliyyəti də bizi rahatsız edir. Çünki, Azərbaycandan xaricdə yalnız Azərbaycan anlayışı olmalıdır. Siyasi fəaliyyət yalnız ölkə daxilində, o da sağlam şəkildə aparılmalıdır. Azərbaycan iqtidarı avrointeqrasiyanı özü üçün priotet xətt kimi seçib. Avrointeqrasiya milli dəyərlərdən imtina, dövlətçiliyə qarşı çıxmaq demək deyil. Hər bir gənc atdığı addımda çox diqqətli olmalıdır.”

“Gənc Liderlər” Uşaq və Gənclər Təşkilatının sədri Fərid Şahbazlı isə sosial şəbəkələrdə aparılan işlərə toxundu. “Bir sıra şəxslər müxtəlif sosial şəbəkələrdə saxta profillər yaradırlar. Məqsədləri görüntü olaraq təxribatçı fəaliyyətlərinə don geyindirməkdir. Biz isə prezidenti dəstəkləyən virtual aksiya təşkil etmişik. Hər kəsin şəxsi məlumatlarını belə toplayırıq.

Azərbaycanda bir milyon insanın hüququ pozulub. Öz torpaqlarından ayrı düşüb. Niyə xarici təşkilatlar və onların əlaltıları olan ölkə içi siyasi qüvvələr məcburi köçkünlərin hüququnun bərpası üçün bir addım atmır? Azərbaycanda konstruktiv müxalifət var. Onlar proseslərlə bağlı olaraq öz təkliflərini hökumətə təqdim edirlər və təklifləri də nəzərə alınır. Yəni ortaya konsepsiya qoymaq lazımdır. Söz qəhrəmanı olanların heç bir zaman sosial bazası olmayacaq. Necə ki, biz bunu son keçirilən aksiyalarda gördük”

Digər iştirakçı, AGAT sədr müavini Nərgiz Eyvazova isə təşkilatlarının gördüyü işlərdən danışdı. “İndi bizə məktublar yazırlar və müxtəlif məsələlərlə bağlı irad bildirirlər. Amma real işə gələndə hər kəs sinəsini geri çəkir. Biz xarici dillərdə bəyanatlar verəndə, hər kəsi dəstəyə çağıranda, müxtəlif virtual aksiyalar keçirəndə sizlər niyə susurduz? Niyə biganə qalırdız?”

Sonda gənclər müxtəlif istiqamətlərdə müzakirə apararaq belə qərara gəldilər ki, yaxın günlərdə əksər gənclər təşkilatlarının iştirakı ilə dövlətçiliyin müdafiəsinə dair mətbuat konfransı keçirsinlər.

Mövqe.- 2011.- 6 aprel.- S. 8.