Salyanda abadlıq və quruculuq işləri yeni vüsət alıb

Son illərdə həyata keçirilən uğurlu iqtisadi siyasət Azərbaycanın hərtərəfli uğurlarını təmin etməklə, onun dünyadakı nüfuz və mövqelərini gücləndirir. İqtisadi sahədə keçid dövrünün ağır sosial-iqtisadi, mənəvi-psixoloji çətinliklərini geridə qoyan respublikamız sürətlə inkişaf edir, abadlaşır, müasirləşir. Hələ 11 fevral 2004-cü ildə regionların sosial-iqtisadi inkişafı ilə bağlı ilk Dövlət Proqramını imzalayan dövlət başçısı İlham Əliyev bu mühüm sənəddə nəzərdə tutulmuş tədbirlərin 2008-ci ilədək uğurla gerçəkləşdirilməsini təmin edib.

Bunun davamı kimi, 2009-cu il aprelin 14-də imzalanmış ikinci regional Dövlət Proqramı qısa müddətdə iri şəhərlərlə rayonların, qəsəbələrin, kəndlərin inkişafındakı kəskin fərqlərin əhəmiyyətli dərəcədə aradan qaldırılmasına təkan verib. Bunu konkret olaraq Salyan rayonunun timsalında aydın görmək olar. 2011-ci ilin əvvəllərindən başlayaraq müasir tikinti-inşaat meyarları əsasında, yüksək estetik zövqlə həyata keçirilən, vətəndaşlarda yüksək razılıq doğuran genişmiqyaslı abadlıq-quruculuq tədbirləri son dövrlərədək respublikada ümumi inkişafdan geri qalan Salyanın simasını əsaslı dərəcədə dəyişib.

Rayonun yeni rəhbərliyi üzərinə düşən məsuliyyəti düzgün dəyərləndirməklə, fəaliyyətini dövlət başçısı İlham Əliyevin yeritdiyi çevik və səmərəli inkişaf strategiyasının mahiyyətinə uyğun qurmağa, idarəetmədə mütərəqqi prinsipləri tətbiq etməyə, qarşıda duran vəzifələri dəqiq müəyyənləşdirərək vaxtında icrasına nail olmağa çalışır. İlk baxışdan bu da aydın görünür ki, görülən işlər kampaniyaçılıqdan, kosmetik dəyişikliklərdən tamamilə uzaq olub rayonun uzun illərdən bəri həllini gözləyən problem və qayğılarının kompleks həlli məqsədinə hesablanıb.

Ürəkaçan haldır ki, Salyanın bir vaxtlar ürək ağrıdan miskin görkəmindən indi əsər-əlamət qalmayıb: son aylarda əksər inzibati, habelə yaşayış binalarının fasadları müasir görkəm alıb, bir vaxtlar adı şəhər olan Salyan hazırda sözün həqiqi mənasında şəhərə çevrilib. 2009-2013-cü illəri əhatə edən ikinci regional Dövlət Proqramı çərçivəsində həyata keçirilən tədbirlər isə Salyan şəhəri sakinlərinə göstərilən sosial-mədəni infrastrukturun təkmilləşdirilməsinə, vətəndaşların firavan yaşayış tərzinin təmin olunması məqsədinə xidmət edir.

Son aylarda rayonun əksər küçə və meydanlarında yaşıllıqlar salınır, səliqə-səhman yaradılır. Şəhərin bir neçə küçəsində yaşayış binalarının, fərdi evlərin dam örtükləri əsaslı təmir edilir. Prezident İlham Əliyevin 19 aprel 2011-ci il tarixli sərəncamı ilə rayona ayrılmış 2 milyon vəsait hesabına Y.Qasımov küçəsi 4, 6 saylı; X.R.Ulutürk kuçəsi 16, 28, 30 saylı; T.Xəlilbəyli küçəsi 164, 150, 113, 81, 109, 111 saylı kommunal evlərinin fasadlarına gülbaxt üzlük daşı döşənib. Habelə, Ələt-Astara avtomobil yolunun Salyan ərazisindən keçən hissəsində istinad divarı tikilib. Şəhərin Y.Qasımov, X.R.Uluturk, T.Xəlilbəyli, H.Əliyev, Nizami, 20 yanvar küçələrində, habelə Ələt-Astara yolunun şəhər ərazisindən keçən hissəsində yeni işıqlandırma dirəkləri qoyulub, asfaltlaşma işi aparılıb.

Hazırda bayraq meydanının müasir memarlıq üslubunda yenidən qurulması işinə start verilib. Bundan başqa, "Heydər bulağı", "20 yanvar", "31 mart azərbaycanlıların soyqırımı", "1941-1945-ci il Böyük Vətən Müharibəsi" abidə komplekslərinin ətrafına 1811 kvadratmetr gülbax ağ lay daşı döşənib.

Dövlət başçısı cənab İlham Əliyevin 28 sentyabr 2011-ci il tarixli "Salyan rayonunun sosial-iqtisadi inkişafının sürətləndirilməsinə dair əlavə tədbirlər haqqında" sərəncamı ilə rayonun 10 min nəfər əhalisinin yaşadığı 6 yaşayış məntəqəsini birləşdirən Kursəngi-Yolustu avtomobil yolunun tikintisi məqsədilə Azərbaycan Respublikası Prezidentinin Ehtiyat Fondundan Salyan rayon İcra hakimiyyətinə ilkin olaraq 3 (üc) milyon manat vəsait ayrılıb. Hazırda Kursəngi-Yolustu avtomobil yolunun tikintisinə başlanılıb və tikinti işləri sürətlə davam etdirilir.

Salyan sakinlərinin rahat, firavan yaşayışının təmini baxımından infrastrukturun müxtəlif sahələr üzrə yeniləşdirilməsinə, kommunal xarakterli problemlərin həllinə də xüsusi diqqətlə yanaşılır. Ötən dövrdə rayonda elektrik təchizatı, su və kanalizasiya sisteminin yenidənqurulması, yolların əsaslı bərpası, sosial-infrastrukturunun müasirləşdirilməsi istiqamətində mühüm tədbirlər görülüb. Rayon əhalisinin 2011-2012-ci illərdə müntəzəm şəkildə elektrik enerjisi, təbii qaz və içməli su ilə təmini başlıca vəzifə kimi qarşıya qoyulub və bu istiqamətdə bir sıra tədbirlər həyata keçirilir. Payız-qış aylarında enerji probleminin yaranmaması üçün rayonun elektrik paylayıcı şəbəkələrində, transformatorlarda, habelə qaz xətlərində təmir işləri aparılır. ARDNŞ-in də yaxından iştirakı ilə 2011-ci ildə rayon əhalisinin təbii qazla təminatının yaxşılaşdırılması sahəsində əsaslı tikinti-quraşdırma və yenidənqurma işlərinə başlanılıb.

Pambıqkənd, Bəşirbəyli, Yolüstü kəndlərinin, habelə Heydər Əliyev Fondunun hesabına Plasmas yaşayış massivində kimsəsiz, imkansız şəxslər və Qarabağ əlilləri üçün tikilmiş 168 evdən ibarət yeni şəhərciyin qazlaşdırılması istiqamətində tədbirlər davam etdirilir. Eyni zamanda, hazırda rayonun Kür ətrafı və digər küçələri də normal təbii qazla təmin olunur. Salyanın uzun illər qazsız qalmış Parça Xələc, Seyidan, Piratman və Gəncəli kəndlərinin qaz təchizatının üçün işlər davam etdirilir.

Azərbaycan və Yaponiya hökumətləri arasında "Kiçik şəhərlərdə su təchizatının və kanalizasiya sistemlərinin təkmilləşdirilməsi" kredit layihəsi çərçivəsində Salyan şəhərinin su və kanalizasiya sistemlərinin yenidən qurulması üçün 70 milyon manat vəsait nəzərdə tutulub. Rayonun yeni rəhbərliyinin səyləri ilə son aylarda layihənin reallaşdırılması prosesi sürətlənib. Hazırda layihə-smeta sənədləri hazırlanır və yaxın aylarda işə başlanılacaq.

2011-ci ilin I yarısında rayonda Qarabağ müharibəsi əlilləri və şəhid ailələri üçün 16 mənzilli yaşayış binası, 8 saylı Ərazi Dövlət Nəzarəti İdarəsinin inzibati binası, Abadkənd və Parça Xələc kəndlərində yeni poçt şöbəsi tikilərək istifadəyə verilib. XIX əsrin tarixi abidəsi olan Cümə məscidində əsaslı təmir-bərpa işləri başa çatdırılıb. Heydər Əliyev Fondunun dəstəyi ilə Uşaqların Texniki Yaradıcılıq Mərkəzi və Uşaq Kitabxanası üçün yeni bina tikintisi başa çatdırılıb. Habelə, Fövqəladə Hallar Nazirliyinin xətti ilə Kür çayının daşması zamanı ziyan çəkmiş ailələr üçün əlavə olaraq şəhər ərazisində 59, Qaraçala qəsəbəsində, Çuxanlı, Kərimbəyli və Qarabağlı kəndlərində 11 evin tikintisi başa çatdırılıb.

Yeni iş yerlərinin yaradılması, iş axtaran və işsiz vətəndaşların, xususilə gənclərin məşğulluğunun gücləndirilməsi işi rayon rəhbərliyinin diqqət mərkəzindədir. Rayonda fəaliyyət göstərən idarə, müəssisə, təşkilat və özəl strukturların rəhbərləri ilə müntəzəm əlaqə saxlanılır, boş iş yerləri barədə məlumatlar toplanır və vətəndaşlara təklif olunur. Bu ilin birinci yarısında əhalinin işlə təmini istiqamətində müvafiq tədbirlərin həyata keçirilməsi nəticəsində 751 iş yeri yaradılıb və bunun da 303-u daimidir.

Xüsusi vurğulamaq istərdim ki, Salyanda tarixən aqrar sektorun inkişafı diqqət mərkəzində olub, əhalinin faydalı məşğulluğu da əsasən, bu sahənin hesabına təmin edilib. Rayonun ümumi əkin sahəsi 36958 hektar təşkil edir. Həmin əkin sahələrinin 35625 hektarı suvarılandır. 2010-cu ilin payızında 16531 hektarda taxıl əkinləri aparılıb, bunun 6335 hektarını buğda əkin sahələri, 10196 hektarını arpa əkin sahələri təşkil edib. 2011-ci ildə 2010-cu ilə nisbətən taxıl əkin sahələri 688 hektar az olub. Bu il 16531 hektar taxıl sahəsindən 48438,2 ton taxıl istehsal olunub.

Rayonun yeni rəhbərliyi rayonda sahibkarlığın, xüsusən də fermer təsərrüfatlarının inkişafına diqqət və qayğı ilə yanaşır. Şübhəsiz, bu da təsadüfi deyil - Salyanda yeni iş yerlərinin açılmasında, əhalinin faydalı məşğulluğunun təminatında, yerli xarakterli problemlərin həllində iş adamlarının rolu yüksək dəyərləndirilir. Sahibkarlarla müntəzəm danışıqlar aparılır, onların rayon iqtisadiyyatına sərmayə qoyması əməli fəaliyyətlə təşviq edilir. Rayonda yaradılmış sağlam biznes mühiti vaxtı ilə müxtəlif səbəblərdən buradan getməyə məcbur olmuş iş adamlarını geri dönməyə, rayonda mühüm layihələr həyata keçirməyə sövq edir.

Azərbaycanın 20 illik müstəqillik tarixinin möhtəşəm izləri bu gün Salyan rayonunda özünü daha qabarıq göstərir. Rayonun 2011-ci ilin ötən dövründə əldə etdiyi nailiyyətlər isə ünvanlı və məqsədyönlü olmaqla, hər bir sakinin sosial rifah halının yüksəldilməsi, mənafeyinin qorunması məqsədini önə çəkir. Salyan sakinləri inanırlar ki, dövlət başçısı İlham Əliyevin diqqət və qayğısı nəticəsində rayonun narahatlıq doğuran bütün problemləri ən qısa zamanda uğurlu həllini tapacaq.

(ardı var)

Tərlan Nəsirli,

Bakı-Salyan-Bakı

Mövqe.- 2011.- 11 noyabr.- S.10; 13.