"Bu, əsl kişilərin idmanıdır"

"Vətən uğrunda" ordeninin sahibi, kikboksinq üzrə 14 qat dünya, 5 qat Avropa çempionu Eduard Məmmədovun apasport.az saytına müsahibəsi.

- Hazırda əsasən olimpiya idman növlərinə diqqət daha çoxdur. Siz isə qeyri-olimpiya növü sayılan kikboksinqin inkişaf perspektivlərini necə görürsünüz?

- Bu növ həmişə olduğu kimi, yenə inkişafdadır. Bildiyiniz kimi, Kikboksinq Federasiyasının prezidenti millət vəkili Adil Əliyevdir. O, idmançılarla maraqlanır. Bakı ilə yanaşı, rayonlarda da kikboksinqin inkişafına şərait yaradılıb. Çox dramatik idman növü olmasına baxmayaraq, hazırda gənclərin böyük marağına səbəb olub. Bu, əlbəyaxa döyüşün ən kontakt növüdür. Növlər arasında fərq qoymuram. Demək istəyirəm ki, bu, əsl kişilərin idmanıdır. Çətinliklərin hər birinin öz gözəlliyi var. Yarışlar demək olar, hər həftə keçirilir. Respublika birinciliyi isə ildə bir dəfə baş tutur. Qeyri-olimpiya idman növü olmasına baxmayaraq, bizə qayğı var. Prezidentimiz İlham Əliyev mənim xidmətlərimi mənzil və digər diplomlarla qiymətləndirib.

- Kikboksinqin qeyri-olimpiya idman növü olduğunu yaxşı qabartdınız. Gələcəkdə bu növün Olimpiya Oyunlarının proqramına salınmaq ehtimalı varmı?

- Gəlin, bir qədər keçmişə nəzər salaq. Taekvondonun da olimpiadanın proqramına daxil ediləcəyini heç kim gözləmirdi. Amma oldu. Sonuncu dünya çempionatı 63 ölkədən 800-dən çox idmançının iştirakı ilə keçirildi. Bu, onu göstərir ki, kikboksinqə maraq artır. Bu idman növü 1970-ci ildən sonra yaranıb. Vaxtı gələcək kikboksinq ən populyar idman növünə çevriləcək.

- Azərbaycan idmanında tutduğunuz mövqeni necə izah edə bilərsiniz?

- Əməkdar idman ustasıyam. 14 dəfə dünya çempionu olmaqla yanaşı, həm də 5 dəfə qitə birincisi adına layiq görülmüşəm. Hələ döyüşürəm. Düzdür, axırıncı dünya çempionatında cavan uşaqlar yarışırdılar. Mən isə artıq 33 yaşındayam. Hamı deyir ki, sən nə yaxşı ki, indiyə kimi döyüşürsən. İdmanı sevdiyimdən indiyədək peşəkar rinqdəyəm. Necə deyərlər, hələ motor çəkir.

- Qarşıda sizi nə kimi yarışlar gözləyir?

- Gələn ilin fevralında keçiriləcək "Dünya Kəməri" döyüşlərinə çağırılmışam. Həmin yarışda Ermənistan millisinin kapitanı Zurab Faroyan da qüvvəsini sınayacaq. Bundan öncəki yarışlarda onu 2 dəfə məğlubiyyətə uğratmışam. Deyərdim ki, çox güclüdür. Həvəskar rinqdə üstələdiyim rəqiblərlə bu dəfə peşəkar səviyyədə döyüşməliyəm. Görüş hər biri 3 dəqiqə olmaqla, 5 raunddan ibarətdir. Düzdür, hazırda zədəm var. Fevrala qədər bütün problemləri aradan qaldırmağa çalışacağam. İnşallah, əsas məqsədim "Dünya Kəmər"ini Azərbaycana gətirməkdir.

- Azərbaycanda peşəkar boks, kikboksinq gecələrinə az-az rast gəlirik. Buna səbəb nədir?

- Əlbəttə ki, bu iş baş tutsa, sevinərik. Çünki bu da inkişaf üçün bir təkandır. Peşəkar idman gecəsi idman, gözəllik, şounu bir yerə toplayan sahədir. Bu, təkcə döyüş deyil. Fikrimcə, biz buna doğru gedirik.

- Azərbaycanda sizin nəticələri təkrarlaya biləcək idmançı varmı?

- Mən döyüşməklə yanaşı, həm də "Neftçi" İdman Sağlamlıq Mərkəzində məşqçi kimi çalışıram. Tələbələrim var. 2-3 nəfər var ki, onlar arasında seçim aparıram. Görək həmin nəticələri qazanmağı kim daha çox istəyəcək. Qarşıdakı yarışlardan sonra bu barədə daha ətraflı danışmaq olar. Amma ürəyimdən bir hiss var ki, yaxşı davamçım yetişəcək.

- İdmanın başqa növlərinə maraq göstərirsinizmi?

- Futbola böyük marağım var. Milli komandanın iştirakı ilə keçirilən oyunlara baxıram. Hiss olunur ki, axır zamanlar futbola qayğı artıb. Arzulayardım ki, milli komandamız nəticələri bir qədər də yaxşılaşdırsın. Futbolla yanaşı, boksa və cüdoya fikir verirəm. Bizim növ olimpiadaya daxil olmasa da, digər idmançıların olimpiadadan medalla dönməsini arzulayıram. Kənardan dəstək olacağıq.

- "Neftçi" klubuna azarkeşlik etdiyinizi bilirik. Son vaxtlar bu komandanın qələbələri hakimliklə bağlanır. Buna münasibətiniz necədir?

- Qaliblər mühakimə olunmurlar. Hazırda "Neftçi" son çempiondur. Əgər udubsa, deməli, güclüdür. Əgər bacarırsansa, sən də ud. Bu, mənim şəxsi fikrimdir.

- Peşəkar idmançıların, futbolçuların şou-biznesə qatılmasına, özünü bu sahədə sınamasına münasibətiniz necədir?

- Çox yaxşı. Özümü də tez-tez belə tədbirlərə dəvət edirlər. Dünən "Xəyal Prodokşın" məni ilin idmançısı seçdi. Vəhdət yaxşıdır. Şou-biznesdə çoxlu dostlarım var. Bu, bütün dünyada olan praktikadır. Şou-biznes nümayəndələri ilə idman ictimaiyyəti arasında dostluq var. Bir idmançı bütün günü ancaq idmanla məşğul ola bilməz.

Mövqe.- 2011.- 25 noyabr.- S. 15.