Ağsu 2011-ci ili də uğurla başa vurur

Son illər regionların sosial-iqtisadi inkişafı istiqamətində reallaşdırılan kompleks tədbirlər sisteminin məntiqi nəticəsi olaraq, Ağsu rayonunun iqtisadiyyatında ciddi dönüş yaranıb, eyni zamanda, burada yeni dövrün tələbləri ilə səsləşən genişmiqyaslı abadlıq-quruculuq işləri həyata keçirilib. Bütün bu cəhətlərinə görə, hazırda Ağsu respublikanın digər müasir şəhərlərinin heç birindən geri qalmır.

Ölkənin hər yerində olduğu kimi rayonda 2009-2013-cü illəri əhatə edən Dövlət Proqramı uğurlu nəticələrlə başa vurulub, sosial infrastrukturun, əhalinin həyat şəraitinin və sosial müdafiəsinin yaxşılaşdırılması, yoxsulluğun səviyyəsinin azaldılması, sahibkarlığın inkişaf etdirilməsi, abadlıq-quruculuq, tikinti-bərpa işlərinin aparılması, yeni iş yerlərinin açılması, nəticədə əhalinin rifah halının yüksəldilməsi sahəsində böyük nailiyyətlər əldə olunub.

2011-ci ilin ötən 9 ayını da Ağsu rayonu üçün uğurlu hesab etmək olar. Bu müddətdə "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda nəzərdə tutulan tədbirlər müvəffəqiyyətlə icra olunub. Kənd təsərrüfatı məhsullarının istehsalı və emalının dəstəklənməsi tədbirləri uğurla davam etdirilib. Rayon iqtisadiyyatının digər sahələri ilə yanaşı, aqrar sektor da dinamik inkişafa başlayıb. Dövlət Proqramında nəzərdə tutulmuş tədbirlərin həyata keçirilməsi üzümçülük, şərabçılıq, quşçuluq məhsullarının istehsalı ilə bağlı yeni müəssisələrin istifadəyə verilməsinə səbəb olub.

Rayon iqtisadiyyatı, əsasən, kənd təsərrüfatı yönümlü olduğundan, ümumi məhsul buraxılışında aqrar bölmənin xüsusi çəkisi 53,4 faiz təşkil edib. Bu göstərici kənd təsərrüfatının bütün sahələrinə, o cümlədən bitkiçiliyə daha diqqət və qayğı ilə yanaşmağı tələb edir. 2010-cu ildə bitkiçilik sahəsi üzrə əldə edilmiş yüksək nəticələr növbəti illərdə göstəricilərin daha da yüksəldilməsinə zəmin yaradıb.

2011-ci ilin məhsulu üçün 30799 ha sahədə taxıl əkilib. Əkin sahələrinə aqrotexniki qulluq göstərilib, "Aqrolizinq" yolu ilə sahələrə 128 ton azot, 3 ton fosfor gübrəsi verilib. Buğda istehsalının artırılmasının stimullaşdırılması və əkin sahələrinin becərilməsi, istifadə olunan yanacaq və sürtkü materiallarının dəyərinin ödənilməsi məqsədilə istehsalçılara dövlət maliyyə yardımının verilməsi təmin edilib. Taxıl biçini optimal müddətdə başa çatdırılmaqla ötən illə müqayisədə 9,5 min ton çox, yəni 66,8 min ton taxıl istehsal edilib. Ötən illə müqayisədə 1 hektardan 3,6 sentner çox məhsul əldə edilməklə, orta məhsuldarlıq 21,7 sentner olub. 2011-ci ildə 52 ha sahədə pambıq əkilib, 01.10.2011-ci il tarixə sahələrdən 14 ton pambıq yığılıb. Pambıq yığımını optimal müddətdə başa çatdırmaq üçün tədbirlər həyata keçirilir.

Mal-qaranın sayı və heyvandarlıq məhsulları istehsalı artıb. 01.10.2011-ci il vəziyyətinə iri buynuzlu mal-qaranın baş sayı 40228, qoyun-keçilərin baş sayı 154166 olub. Bu da nəticə etibarı ilə heyvandarlıq məhsullarının artımına müsbət təsir göstərib, 3665 ton ət (diri çəkidə), 19247 ton süd, 5649 min ədəd ədəd yumurta, 285 ton yun istehsal edilib.

Cari ilin 9 ayında rayonda fəaliyyət göstərən emal sənayesi müəssisələri xammal tədarükü, emal və satışla məşğul olublar. Həmçinin istehsalı, eləcə də istehsal olunan məhsulların çeşidini artırmaq, daxili və xarici bazarlara keyfiyyətli məhsul çıxarmaq üçün yeni emal xətlərinin quraşdırılması, yeni sexlərin tikintisi və müasir texnologiyanın tətbiqi istiqamətində fəaliyyətini davam etdiriblər. "Az-Qranata" MMC-nin alkoqollu içkilər və şirə emalı zavodunun tikintisində işlər başa çatdırılıb, zavod fəaliyyətə başlayıb. Bundan başqa, "Şaban-Quşçuluq" MMC-də sənaye üsulu ilə 17 min baş quş yetişdirilib və satılıb.

Şəhərin Heydər Əliyev, S.Vurğun, Nizami, Natəvan küçələrinə, Ağsu-Kürdəmir magistral yolunun Qaraqaşlı kənd yaşayış məntəqəsinin ərazisindən keçən hissəsinə və "Xaraba şəhər"ə gedən yolun hərəkət hissəsinə, həmçinin piyada səkilərinə (8,2 km məsafəyə) ümumilikdə, 68580 kvadratmetr asfalt vurulub, görülmüş işlərə 968,0 min manat pul vəsaiti sərf edilib.

Dünya Bankı və Azərbaycan Hökuməti ilə birgə maliyyələşdirilən "Milli Su Təchizatı və Kanalizasiya xidmətləri üzrə "İkinci layihə" çərçivəsində Ağsu şəhərinin su təchizatının yenidən qurulması və kanalizasiya sisteminin yaradılması üçün layihə-smeta sənədləri hazırlanıb. Və tədbirin icrasına başlanılıb. Ağsu şəhərinə 25 kilometr məsafədən bulaq sularının gətirilməsi ilə tikinti işləri başa çatdırılıb. Şəhərdə və Qaraqaşlı kəndində mövcud abonentlər, həmçinin Pirhəsənli kəndinin əhalisi artıq içməli su kimi bulaq suyundan istifadə edir.

Su-Kanal idarəsi içməli su təchizatı sahəsində fəaliyyətini davam etdirərək mövcud istehlakçıların içməli su ilə təchizatının yaxşılaşdırılması məqsədilə səhərin su təchizatı sisteminin müxtəlif istiqamətlərində əsaslı və cari təmir işlərini həyata keçirib. Su-kanal idarəsi tərəfindən hesabat dövrü mənfəətlə başa vurulsa da, bütün iqtisadi göstəricilər üzrə proqnozlar kəsrlə yerinə yetirilib.

Ağsu şəhərində Azərbaycan və 20 yanvar küçələrində, həmçinin Maşadqanli kəndində mövcud fərdi yaşayış evlərinin, inzibati və sosial obyektlərin, əkin sahələrinin və infrastrukturun sel sularından mühafizəsi məqsədi ilə 2011-ci ilin 9 ayında Ağsuçayda 6600 kub m. həcmində 1065,0 min manat dəyərində sahilbərkitmə işləri görülüb.

Hesabat dövründə İnformasiya Kommunikasiya Texnologiyalarının inkişafı diqqət mərkəzində saxlanılıb, rayon mərkəzində və kəndlərdə mövcud ATS-lər rekonstruksiya olunaraq EATS-lə əvəz edilib. Daşdəmirbəyli kəndində montaj tutumu 128 nömrə olan EATS quraşdırılaraq istismara verilib.

Səhiyyə müəssisələrinin təmiri, avadanlıqlarla təchiz olunması və yenilərinin tikintisi istiqamətində işlərə başlanılıb, Mərkəzi Rayon Xəstəxanasının terapiya şöbəsində 27,4 min manat dəyərində, Ərəbuşağı və Kəndoba kənd həkim ambulatoriyalarının binasında 6,0 min manat dəyərində əsaslı, Çaparlı kənd həkim ambulatoriyasında 4,0 min manat dəyərində cari təmir işləri görülüb, 27,8 min manat dəyərində tibbi avadanlıq, 29,4 min manat dəyərində digər maşın və avadanlıqlar, 40,0 min manat dəyərində isə inventar alınaraq şöbələrə paylanıb. Rayonun Ərəbmehdibəy kəndində Feldşer Mama Məntəqəsinin binası əsaslı təmir olunub, müasir inventar və avadanlıqlarla təchiz edilərək cari ilin iyun ayının 23-də kənd sakinlərin istifadəsinə verilib.

2011-ci ilin 9 ayında rayonda məktəblərin əsaslı təmiri istiqamətində müəyyən işlər görülüb. Heydər Əliyev Fondunun vəsaiti hesabına 2010-cu ildə tikinti işləri başa çatdırılıb. 220 şagird yerlik Qaraqoyunlu kəndində orta məktəb binası cari dərs ilində istifadəyə verilib, məktəb binasının su, istilik və enerji təminatı sahəsində işlər başa çatdırılıb.

Şəhər 3 saylı tam orta məktəbinin binası əsaslı təmir olunaraq yeni tədris ilində istifadəyə verilib. 27 oktyabr 2011-ci il tarixdə smeta dəyəri 950,0 min manat olan 180 şagird yerlik Ləngəbiz kənd tam orta məktəbi üçün yeni binanın tikintisinə başlanılıb. 4 saylı şəhər tam orta məktəbinin binası əsaslı təmir olunub, binanın dam örtüyü tamamilə dəyişdirilib. Caparlı kənd tam orta məktəbinin binasında smeta üzrə 21700,00 manat dəyərində əsaslı (binanın dam örtüyü tamamilə yenidən qurulması), 33000,00 manat dəyərində cari təmir işlərinin aparılmasına başlanılıb.

Təməli 29 oktyabr 2009-cu ildə ildə ölkə prezidenti tərəfindən qoyulmuş 3000 yerlik müasir tipli stadionun tikintisi başa çatdırılıb. Bundan başqa, Ağsu rayonunun kəndlərində də abadlıq-quruculuq, tikinti-bərpa işləri davam etdirilib, Çiyni kəndində kənd stadionun tikintisi başa çatdırılaraq istifadəyə verilib.

2011-ci ilin 9 ayında da rayon ərazisində mədəniyyət obyektlərinin tikintisi üzrə nəzərdə tutulan tədbirlərin icrası davam etdirilib. Təməli 29 oktyabr 2009-cu ildə qoyulmuş Uşaq-Gənclər Bədii Yaradıcılıq Məktəbinin tikintisi başa çatdırılıb. Rayonun Çiyni kəndində 100 oturacaq yerlik Mədəniyyət Evinin tikintisi də başa çatdırılaraq istifadəyə verilib.

Dövlət Proqramı icra olunduğu dövrdə Bico kəndində 200, Gəgəli kəndində 480, Padar kəndində 240, Ərəbmehdibəy kəndində 240, Növcü kəndində 380, Pirhəsənli kəndində 360, Çiyni kəndində 320, Ağarx kəndində 264, Cəlayır kəndində 220 şagird yerlik orta, Xəlilli kəndində 192 şagird yerlik əsas və Bəyimli kəndində 100, Qaraməmmədli və Axundlu kəndlərinin hər birində 30 şagird yerlik ibtidai məktəb binaları tikilib, müasir inventar və avadanlıqlarla təchiz edilərək istifadəyə verilib.

Bu müddətdə Musabəyli kənd orta məktəbi üçün 60 şagird yerlik 3, Qaraqoyunlu orta məktəbi üçün 80 şagird yerlik 4, Qaradağ əsas məktəbi üçün 80 şagird yerlik 4, Kövlüc kənd əsas məktəbi üçün 40 şagird yerlik 2 əlavə sinif otağı, Gəgəli kənd orta məktəbi üçün idman zalı tikilib. 1 saylı Ağsu şəhər məktəb liseyi əsaslı təmir olunub. Dövlət Proqramının icra olunduğu müddətdə ümumilikdə 3056 şagird yerlik 13 yeni məktəb binası və 4 məktəbdə 260 şagird yerlik 13 əlavə sinif otağı tikilib.

2004-2008-ci illərdə səhiyyə və digər sosial obyektlərin bərpası və tikintisi böyük uğurla aparılıb. Belə ki, rayon Mərkəzi xəstəxanasının reanimasiya, cərrahiyyə, qanköçürmə, genekologiya, infeksion xəstəliklər, təcili tibbi yardım, məhkəmə tibbi ekspertiza və potoloji anotomiya şöbələri, əməliyyat bloku əsaslı təmir edilərək müasir avadanlıqlarla təchiz edilib.

Bico kənd xəstəxanası və Ərəbuşağı kənd ambulatoriyası əsaslı, Mərkəzi xəstəxanada poliklinika, Ləngəbiz kənd feldşer-mama məntəqəsi, Bozavand kənd həkim ambulatoriyası və Uşaq xəstəxanası cari təmir olunub. Kalva kəndində 10 çarpayılıq yeni xəstəxana binası tikilib, inventar və avadanlıqlarla təchiz olunaraq istifadəyə verilib.

2004-2008-ci illərdə Ağsu şəhərində Qarabağ müharibəsi əlilləri və şəhid ailələri üçün hər biri 16 mənzildən ibarət 2 ictimai yaşayış, Daşdəmirbəyli kəndində kitabxana binası, DSMF Ağsu rayon şöbəsi, Yüksək Gərginlikli Elektrik şəbəkəsi, rayon Prokurorluğu, rayon Məhkəməsi, 87 saylı Ağsu İsmayıllı Seçki Dairəsi Dairə Seçki Komissiyası, Ağsu rayonu üzrə Maliyyə idarəsi, Su-Kanal idarəsi, Əmək və Əhalinin Sosial Müdafiəsi Nazirliyinin yerli orqanları üçün inzibati binalar, 4 saylı Ərazi Vergilər İdarəsi üçün kompyuter terminalı, Ağsuçayın üzərində piyada körpüsü, Qəhrəmanlar parkı, müasir tipli Avtovağzal Kompleksi, Kalva, Bico və Gəgəli kənd poçt şöbələri tikilərək istifadəyə verilib.

Mədəniyyət sarayının genişləndirilməsi məqsədilə yenidənqurma işləri başa çatdırılıb, Saray müasir avadanlıqlarla təchiz olunmaqla istifadəyə verilib. Rayonun Qaraqaşlı kəndinin ərazisində şəhərin və Ağsu-İsmayıllı sərhədlərində rayonun adını bildirən yeni stellalar tikilib. Şəhərin M.Hüseyn kəndində yerləşən 4 və 5 nömrəli 2 ictimai yaşayış binalarında bərkitmə işləri aparılıb, 50 mənzilli, 5 mərtəbəli ictimai yaşayış binasının tikintisi başa çatdırılıb. Bakı-Qazax magistral yolunun Ağsu şəhərindən keçən hissəsində, Vidadi küçəsinin bağlanğıcında (hündürlüyü 65 metr) Azərbaycan Respublikasının Dövlət bayrağı ucaldılıb.

Şəhərin baş meydanında ulu öndərin adını daşıyan 2 mərtəbəli muzeyin, Heydər Əliyevin abidəsinin, Ağsu aşırımında Heydər Əliyev Seyrəngahının, "Azərdəmiryolbank"ın Ağsu filialının, Fövqəladə Hallar Nazirliyinin Yanğından Mühafizə Xidməti üçün inzibati binanın, alkoqollu içkilər və meyvə şirələri istehsal edən zavodun, Ağsu aşırımında rayonun, Pirhəsənli kəndi ərazisində şəhərin adını bildirən stellaların və onlarla digər ticarət, iaşə, məişət və servis xidməti obyektlərinin tikintisi başa çatdırılıb. Bunlardan başqa, "Kapitalbank"ın Ağsu rayon filialında, Ağsu rayon İcra hakimiyyətinin inzibati və Telekommunikasiya Qovşağında əsaslı təmir işləri görülüb. Poçt xidmətlərinin keyfiyyəti yüksəlib, əhaliyə göstərilən xidmət növlərinin sayı artırılıb. Mərkəzi poçt şöbəsi müasir avadanlıqlarla təchiz edilib.

2004-2008-ci illərdə rayonun elektrik təsərrüfatında da bir sıra işlər görülüb. Rayon Paylayıcı Elektrik Şəbəkəsinin "Ağsu" yarımstansiyasının gücünün artırılması məqsədilə 7,5 MVA gücündə transformator 16 MVA gücündə transformatorla əvəz edilib. 63 ədəd 10/04 kv-luq transformator yarımstansiyasında əsaslı təmir işləri aparılıb, 164 ədəd ağac və 209 ədəd dəmir beton dirəklər yenisi ilə əvəz edilib. Şəhərin elektrik təsərrüfatında yenidənqurma işlərinə başlanılıb, bu məqsədlə 1045 ədəd elektrik dayaqları yeni dəmir beton dayaqlarla əvəz edilib, 46,9 km elektrik verilişi xətti SİP kabellə əvəz edilib.

Ağsu Magistral Qaz Kəmərləri idarəsi nəzdində yeni Ağsu rabitə ötürücü stansiya istifadəyə verilib. Rayonun qaz təsərrüfatında cari təmir işləri görülüb. Şəhərin Heydər Əliyev küçəsi və ona yaxın küçələrdə olan mövcud abonentlərin qaz təchizatının yaxşılaşdırılması üçün 3900 p/m, orta təzyiqli qaz kəməri çəkilib, 9 ədəd qaz tənzimləyici şkaf quraşdırılıb. Şəhərin Vidadi küçəsində 60 mənzilli 2 yaşayış binasına qaz vermək üçün 460 p/m yeni qaz kəməri çəkilib.

Rayonun Padar kəndinin qaz təsərrüfatında təmir-bərpa işləri aparılıb, 200 abonentin qaz xəttinə sayğac quraşdırılaraq kəndə qaz verilişi bərpa olunub. Əvvəllər qazlaşdırılmayan Dilman kəndində qaz təsərrüfatının tikintisi başa çatdırılaraq kəndə qaz veriib. Rayonun dağlıq ərazisində yerləşən Xatman, Hacman, Kalva və Suraxanı kəndlərinin qazlaşdırılması təmin olunub. Daşdəmirbəyli, Bozavand və Kəndoba kəndlərinin təbii qaz təsərrüfatında təmir-bərpa işləri həyata keçirilib. Rayon üzrə 3747 ədəd qaz sayğacı quraşdırılıb. Şəhər əhalisinin içməli su təchizatının yaxşılaşdırılması məqsədilə bir sıra küçə, məhəllə və ictimai yaşayış binalarına 4875 p/m su kəməri çəkilib. Şəhərin Heydər Əliyev küçəsində 2580 p/m magistral su xətti tamamilə yenisi ilə əvəz edilib.

Yeni tikilmiş DSMF Ağsu rayon şöbəsinin və rayon Prokurorluğunun inzibati binalarına, Qəhrəmanlar parkına, məscidə və 100 fərdi abonent üçün yeni su xətti çəkilib. 17 büdcə, 15 ticarət və xidmət obyektinə, 400 fərdi abonentin mənzilinə su sayğacı quraşdırılıb. İlxıçı, Çaparlı, Pirhəsənli, Qaravəlli, Qaraqaşlı, Qiyaslı, Rəhimağalı, Şahbəyli, Ərəbuşağı və Növcü kəndlərinin hər birində bir ədəd subartezian quyusu qazılıb istifadəyə verilib. Eyni zamanda, Mənzil İstismar idarəsi tərəfindən ictimai yaşayış binalarının kanalizasiya sistemində əsaslı və cari təmir işləri aparılıb, 8 ədəd ictimai yaşayış binasının dam örtüyü təmir edilib. Bu işlərə ümumilikdə 45,5 min manat vəsait xərclənib.

Bundan başqa, 4 saylı Ağsu şəhər, Çaparlı kənd orta, Gəgəli və Qiyaslı kənd əsas məktəblərində əsaslı, təhsil şöbəsinin əsas binasında, Daşdəmirbəyli, Ərəbuşağı, Ülgüc, Nuran kənd orta, Padar kənd əsas, Şahbəyli, Rəhimağalı, Bənəcik kənd ibtidai məktəblərində cari, Ləngəbiz, Qaraqoyunlu, Musabəyli kənd və 2 saylı şəhər orta, Göydəlləkli, Qaravəlli kənd əsas, Hacıqədirli kənd ibtidai məktəblərində cari təmir işləri aparılıb. 2004-2008-ci illərdə rayonun ümumtəhsil məktəblərinə 211 ədəd kompyuter verilib, mebel və avadanlıqlarla təchiz edilib.

Ümumiyyətlə, 1 oktyabr 2003-cü il tarixdən 01.01.2009-cu il tarixədək rayonda fəaliyyətə başlayan yeni və bərpa edilmiş müəssisələrdə, aparılan abadlıq-quruculuq işlərində və digər mövsümi işlərdə 5916 nəfər işlə təmin olunub və bunlardan 3109 nəfəri daimi işlə təmin olunanlardır.

(ardı var)

Tərlan Nəsirli

Mövqe.-2011.- 26 noyabr.- S. 10.