REGİONLARIMIZ: YEVLAX

Yevlaxda medianın inkişafı yeni yüksəliş mərhələsində

Müstəqil Azərbaycan demokratik inkişaf yolu seçən respublika kimi mətbuatın dövlət və cəmiyyət həyatındakı roluna mühüm önəm verməklə, onun müstəqilləşməsi, mövcud problemlərinin həlli istiqamətində davamlı tədbirlər həyata keçirir. Bu da təsadüfi deyildir - respublikanın dünya informasiya məkanına daxil olması və informasiyalı cəmiyyətə keçid şəxsiyyətin, cəmiyyətin və dövlətin informasiyaya olan tələbatının daha dolğun ödənilməsinə, kütləvi informasiya vasitələrinin fəaliyyətinin təkmilləşməsinə, müasir dövrün tələblərinə uyğunlaşmasına ehtiyac yaradır.

Bu gün kütləvi informasiya vasitələrinin dinamik inkişafını təkcə paytaxt Bakıda deyil, regionlarda da qabarıq müşahidə etmək olar. Konkret olaraq Yevlax rayonunda fəaliyyət göstərən KİV-lərin fəaliyyətinə nəzərən bunu əminliklə söyləmək olar. Rayon rəhbərliyi "Kür" qəzetinin, o cümlədən 2009-cu ildə regional televiziya kimi fəaliyyətə başlayan "EL TV"-nin fəaliyyətinə böyük diqqət və qayğı ilə yanaşır, onların peşə fəaliyyətinin azad, obyektiv və müstəqil şəkildə həyata keçirilməsi üçün lazımi şərait yaradır.

Son illərdə bütün sahələrdə dinamik inkişaf edən, yeniləşən, müasirləşən Yevlax şəhərinin uğurları bu gün "Kür" qəzetinin səhifələrində də dolğun əksini tapır. Qəzetin baş redaktoru, əməkdar jurnalist Əminə Yusifqızının (Əhmədova) sözlərinə görə, "Kür" qəzeti fəaliyyətini milli mətbuatın tarixi ənənələri, müasir inkişaf meyilləri əsasında qurur, zamanın nəbzini tutaraq Yevlax rayonunun ictimai-siyasi həyatında fəal iştirak etməyə, üzərinə düşən missiyanı ləyaqətlə həyata keçirməyə çalışır.

Baş redaktorun sözlərinə əsasən, Yevlax mətbuatının tarixi Yevlax rayonunun təşkili ilə eyni vaxta təsadüf edir. 1935-ci ilin fevralında Yevlax rayonu təşkil edildikdən sonra rayon icraiyyə komitəsinin ilk qərarlarından biri rayon qəzetinin yaradılması ilə bağlı olub. Kommunist Partiyasının Yevlax rayon firqəsi və rayon İcraiyyə Komitəsinin birgə orqanı olan, adını Yevlax kəndinin yerində salınan yeni və abad şəhərdən alan "Yeni Yevlax" qəzetinin ilk nömrəsi 1935-ci il martın 6-da işıq üzü görüb.

Əminə Yusifqızı bildirdi ki, qəzeti ilk dəfə təşkil edən kollektiv redaktor və 3 müxbirdən ibarət olub. İlk redaktor İbrahim Əliyev, müxbirlər Xasay Vəzirov, Abbas Abbasov və T.Tatarlı o dövrdə rayonun tanınmış ziyalıları olublar. 1936-cı ildən qəzetə AK(b)P Yevlax rayon firqəsinin sədri Əli Bünyadzadə redaktorluq edib. 1938-ci ildə isə mətbu nəşrə Ağamirzəyev redaktor təyin edilib. 1950-ci ildən 1957-ci ilə qədər qəzetin redaktoru Adil Elçiyev, 1959-cu ildən 1962-ci ilin iyununa - "Yeni Yevlax" fəaliyyətini dayandıranadək Bala Yusifov olub.

1935-ci ilin sonunda Yevlaxda redaksiyanın nəzdində ilk mətbəənin əsası qoyulub. "Yeni Yevlax" qəzetinin nəşri 1962-ci ilin iyun ayında dayandırılıb, onun əvəzinə Qasım İsmayılov (Goranboy), Mingəçevir və Yevlax rayonlarının birləşmiş qəzeti olan "Qələbə" nəşrə başlayıb. Bu qəzetin ilk redaktoru Musa Musayev olub. "Qələbə" ilk dəfə Yevlaxda nəşr olunub, az sonra onun redaksiyası Qasım İsmayılov rayonuna köçürülüb. Qəzet bir müddət "Mübariz" adı ilə nəşr olunub və 3 ildən sonra fəaliyyətini dayandırıb.

1965-ci ildə Yevlax rayonunun yenidən təşkili ilə əlaqədar olaraq şəhər və rayon qəzetlərinin nəşri yenidən bərpa olunduğundan Yevlaxda "Təşəbbüs" qəzeti fəaliyyətə başladı. Qəzetin ilk sayı 1965-ci il iyunun 22-də işıq üzü görüb, bu mətbu orqanın ilk redaktoru İsrail Rzayev olub. O, 30 il müddətində əyalət mətbuatının ən parlaq nümunələrindən olan "Təşəbbüs"ə inamla rəhbərlik edib.

1991-ci ildə "Təşəbbüs" qəzetinin fəaliyyətinə xitam verilib. Bundan sonra isə əsası "Yeni Yevlax"la qoyulan Yevlax mətbuatının sələfi kimi 1992-ci il yanvarın 1-dən "Kür" qəzeti nəşrə başlayıb. Həmin ildən də qəzetə 1976-cı ildən "Təşəbbüs"də fəaliyyətə başlamış Əminə Yusifqızı rəhbərlik edir. Azərbaycanın tanınmış jurnalistlərindən olan Əminə Yusifqızı mətbuatda uzun illər səmərəli fəaliyyətinə görə "Qızıl Qələm" mükafatına, H.B.Zərdabi və Məhsəti Gəncəvi adına mükafatlara layiq görülüb. 1991-ci ildən respublikanın əməkdar jurnalistidir. 2005-ci ildə Azərbaycan Respublikası Prezidentinin sərəncamı ilə "Tərəqqi" medalına layiq görülüb.

"Kür" qəzeti Yevlaxın ictimai-siyasi həyatını səhifələrində parlaq şəkildə əks etdirən mətbuat orqanı kimi hazırda çiçəklənmə, intibah dövrünü yaşayır. Qəzetin baş redaktoru Əminə Yusifqızı bunu rayon rəhbərliyinin xüsusi diqqət və qayğısı ilə izah edir, kollektivin fəaliyyətinə verilən qiyməti yüksək dəyərləndirir. Onun sözlərinə görə, "Kür" bu gün zamanın tələblərinə cavab verir, dövlət maraqlarına, dövlətçilik prinsiplərinə sadiqlik nümayiş etdirir. Qəzetin xalqa, dövlətçiliyə bağlılığı, dəyişməz ideya-siyasi xətti, nəinki rayonda, ümumən ölkədə cərəyan edən hadisələrə operativ yanaşma tərzi ilə seçilir.

Qəzet bu gün Yevlaxın ictimai, siyasi, iqtisadi və sosial həyatında yaxından iştirak edir. Mətbuat orqanının səhifələrində son illərdə rayonda həyata keçirilən irimiqyaslı abadlıq və quruculuq işləri geniş əksini tapır. "Kür" regionların sosial-iqtisadi inkişafı dövlət proqramları çərçivəsində görülən işləri də yüksək dəyərləndirir.

Qəzet hazırda region mətbuatı üçün görünməmiş sayda - 7200 tirajla çap olunur. Bu göstəriciyə görə qəzet regional mətbuat orqanları sırasında ilk yerdə dayanır. "Kür" maddi-texniki bazasına, kadrların peşəkarlıq səviyyəsinə görə də seçilir. Qəzetin əməkdaşlarının orta aylıq əmək haqqı hazırda 500 manata çatır. Redaksiya yeni avtomobillə, müasir kompüterlərlə və digər avadanlıqlarla təmin olunub. Bu da təsadüfi deyil ki, "Kür"ün kollektivi son 7 ili qəzetin mövcudluq tarixinin "qızıl dövrü" kimi dəyərləndirirlər.

"Kür" qəzeti fəaliyyətində region çərçivəsindəki məlumatları öz səhifələrində işıqlandırmaqla kifayətlənmir. Qəzet ictimai maraq doğuran müxtəlif mövzulara toxunur, oxucu auditoriyasının əhatəliliyini nəzərə alır. Cəmiyyət həyatının ən müxtəlif sahələri ilə bağlı yazıların mövzu əhatəliliyi, məzmunluluğu, dəqiqliyi, faktoloji zənginliyi xüsusilə təqdirəlayiqdir. Qəzeti vərəqləyən hər bir vətəndaş burada müstəqillik tariximizlə bağlı bütün lazımi məlumatları, faktları əldə edə bilir. Azərbaycanın uğurlarına sevinən qəzet ölkədəki prosesləri obyektiv işıqlandırmağa, qazanılan nailiyyətlər barədə oxuculara məlumat verməyə çalışır.

Qəzet jurnalistika prinsiplərinə ciddiliklə riayət etdiyindən, onun səhifələrində əksini tapmış faktlar mötəbərliyi ilə seçilir. Ölkənin beynəlxalq arenada qazandığı nailiyyətlər, hüquqi, demokratik və dünyəvi dövlət quruculuğu, sosial-iqtisadi inkişaf məsələləri "Kür" qəzetinin müntəzəm işıqlandırdığı mövzulardandır. Ermənistan-Azərbaycan, Dağlıq Qarabağ münaqişəsi ilə bağlı həqiqətlər, bu istiqamətdə həyata keçirilən dövlət siyasətinin tarixi və müasir gerçəkliklər fonunda şərhi, qaçqın və məcburi köçkünlərin acınacaqlı həyat tərzi, azərbaycanlıların soyqırımı, erməni terrorizmi və bu qəbildən olan digər mövzular da qəzet üçün hər zaman aktualdır.

Bu gün "Kür" qəzeti təkcə insanların ictimai-siyasi həyatla bağlı ən dolğun, obyektiv informasiya mənbəyi deyil, həm də sadə yevlaxlıların inamla, güvənc hissi ilə qapısını döydükləri ünvandır. Müxtəlif strukturların biganəliyi, laqeydliyi ilə üzləşən vətəndaşlar zaman-zaman "Kür"ə müraciət edir, problemlərinin obyektiv işıqlandırılmasını istəyirlər. Qəzet vətəndaşların qanuni mənafelərinə toxunan, işinin öhdəsindən gələ bilməyən dövlət qurumları ilə üz-üzə gəlməkdən də çəkinmir, onları tənqid atəşinə tutur. Bir sözlə, "Kür"çülər ictimaiyyətin uzun illər ərzində formalaşmış inam və etibarını qoruyub saxlamağa çalışırlar.

Nəinki Yevlax rayonunun, ümumən bölgənin informasiya ilə operativ təminatında 2008-ci ildə fəaliyyətə başlayan regional televiziyanın - "EL TV"-nin də xidmətlərini xüsusi qeyd etmək olar. Təkcə Yevlaxda deyil, Mingəçevir, Goranboy, Ağdaş, Ucar, Şəmkir, Gəncə, Göyçay, İsmayıllı, Daşkəsən, Samux, Naftalan, Tovuz, Oğuz, Qax, Qəbələ rayonlarında yayımlanan "ELTV" böyük tamaşaçı auditoriyaya malikdir. Televiziyanın yerləşdiyi bina ilə yanaşı, onun maddi-texniki bazası, avadanlıqları da ən müasir tələblərə cavab verir. Televiziyanın icraçı direktoru İqbal Məmmədəliyevin sözlərinə görə, "EL TV" bu gün hazırladığı verilişlərin səviyyəsinə görə respublikanın heç bir kanalından geri qalmır.

Regional teleşirkətin üçmərtəbəli binası dövlət vəsaiti hesabına tikilib. Burada 40 iş otağı, 2 studiya və 576 kvadratmetrlik çəkiliş pavilyonu var. Burada 86 əməkdaş çalışır və orta aylıq əmək haqqı 300 manat təşkil edir. Teleşirkət ən müasir rəqəmsal çəkiliş avadanlığı və lazımi inventarla təmin olunub. Şirkətə sutkada 16 saat efir vaxtı ayırılıb. "İnfo" Xəbərlər proqramı bazar günü istisna olmaqla, hər gün üç dəfə saat 09:00, 11:00, 13:00, 15:00, 17:00-da və 19:30-da canlı, 00.00 və 08:00-də bülleten kimi yayımlanır. Saat 19.30-da proqramın əsas buraxılışında ayrıca "İnfo idman" bölümü ölkədə və dünyada baş verən idman yeniliklərindən xəbər verir. Şənbə günü əsas xəbər buraxılışının sonunda "İqtisadiyyat xəbərləri" bloku həftə ərzində dünya və ölkə iqtisadiyyatında olan yenilikləri 10 - 15 dəqiqə ərzində tamaşaçılara çatdırır. Gün ərzində Aran - Qərb regionunda, ölkədə və eləcə də dünyada baş verən ən mühüm hadisələri işıqlandırır. Yayımlanan süjetlər əhəmiyyətlilik dərəcəsinə görə sıralanmaqla əsas xəbər buraxılışının xronometrajı 30 dəqiqədir.

Bir sözlə, bu gün Yevlax rayonu təkcə sosial-iqtisadi uğurları ilə deyil, müasir və operativ kütləvi informasiya vasitələri ilə öncüllər sırasındadır. Rayon KİV-i də onlar üçün yaradılmış şəraiti yüksək qiymətləndirməklə yanaşı, üzərilərinə düşən missiyanı ləyaqətlə həyata keçirməyə çalışır.

Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən maliyyələşdirilən "Regionların sosial-iqtisadi inkişafının təşviq edilməsi" layihəsi çərçivəsində çap olunub.

Tərlan NƏSİRLİ,

Bakı-Yevlax-Bakı

Mövqe.- 2011.- 4 oktyabr.- S. 10.