Zərdab dinamik tərəqqi və yüksəliş yolundadır

Zərdab rayonunun son illərdə hansı inkişaf yolu keçdiyini regionların sosial-iqtisadi inkişafı ilə bağlı hələ 2004-cü ilin fevralında imzalanmış birinci Dövlət Proqramı çərçivəsində reallaşdırılmış kompleks tədbirlər bir daha təsdiqləyir. Proqram çərçivəsində həyata keçirilmiş tədbirlər respublikanın Kürqırağı rayonlarından olan Zərdabın görkəmini əsaslı şəkildə dəyişib. Proqram çərçivəsində rayonda bir sıra layihələr həyata keçirilib, abadlıq-quruculuq işləri görülüb. Rayonun daha dinamik və sistemli inkişafı isə əsasən, son 4 ilə təsadüf edir.

Bunu müəyyən faktların müqayisəli təhlili nəticəsində bir daha aydın görmək mümkündür. Məsələn, əgər 2007-ci ildə rayonda əsas kapitala yönəldilən investisiyalar 1 milyon 295 min manat təşkil edirdisə, 2010-cu ilin sonuna bu rəqəm 7 milyon 961 min manat təşkil edib. 2011-ci ilin 6 ayında isə əsas kapitala yönəldilən investisiyanın həcmi 15,3 milyon manata çatıb. Ümumi daxili məhsul istehsalı 2007-ci ildəki 37 milyon manatdan 2010-cu ildə 56,0 milyon manata, 2011-ci ilin altı ayında isə 44,9 milyon manata yüksəlib. Rayonun büdcəsi 2007-ci ilə nisbətən 2011-ci ildə 2 dəfə, şəhər təsərrüfatının inkişafına ayrılan vəsaitin həcmi isə 4 dəfə artıb.

Respublikanın hər yerində olduğu kimi, bu gün Zərdab rayonunda sosial problemlərin həlli, o cümlədən insanları narahat edən məsələlərə diqqət və qayğı ön plandadır. Azərbaycan Respublikası regionlarının sosial-iqtisadi inkişafı ilə bağlı 2004-2008 və 2009-2013-cü illəri əhatə edən dövlət proqramlarında nəzərdə tutulan tədbirlərə müvafiq olaraq rayonda geniş tikinti-abadlıq işləri görülür, daxili potensialdan səmərəli istifadə edilir.

2008-ci ildə Zərdabda rayon prokurorluğu üçün yeni müasir tipli inzibati bina tikilib istifadəyə verilib. Bundan başqa, Dəli Quşçu, Dəkkəoba, Çallı, Gəlmə və Qoşaoba kəndlərinin daxili yollarının bir hissəsinə asfalt örtük döşənib. Körpükənd, Qoruqbağı, Məlikumudlu, Əlvənd və Şahhüseynli kəndlərində modul tipli sutəmizləyici qurğular, hər bir kənddə 10 ədəd su bulağı quraşdırılıb, əhali təmiz içməli su ilə təmin edilib. Şəftəhal və Bıçaqçı kəndlərində daha məhsuldar su nasosları istifadəyə verilərək, torpaqların suvarma suyu ilə təminatı xeyli yaxşılaşdırılıb. Heydər Əliyev prospektində yenidənqurma işlərinə başlanılıb, küçələrə yeni asfalt örtük döşənib, 4 ədəd işıqfor və 120 ədəd yeni yol nişanı quraşdırılıb.

2009-cu ildə də işlər eyni ahənglə davam etdirilib. Zərdab Rayon İcra Hakimiyyəti, Əhalinin Sosial Müdafiəsi Mərkəzi üçün yeni inzibati binalar, Heydər Əliyev İdeoloji Mərkəzi tikilib, Böyük Vətən Müharibəsi veteranı Məlik Məhərrəmovun büstü qoyulub. 54 km uzunluğunda Göyçay-Ucar-Zərdab fiber-optik elektron rabitə xəttinin çəkilişi başa çatdırılıb.

Şəhərin Qumlu yaşayış massivinə 6 km uzunluğunda qaz xətti çəkilib. Şəhər mərkəzini "Dədə Qorqud" meydanından Qoşaoba və Təzəkənd kəndləri ilə birləşdirən 2 kilometrə qədər yola asfalt örtük vurulub. 200 yerlik uşaq incəsənət məktəbinin yeni inzibati binası istifadəyə verilib. Alıcanlı, Hüseynxanlı, Xanməmmədli, Gəlmə və Nəzəralılı kəndlərində əhalinin pay torpaqlarının suya olan tələbatını yaxşılaşdırmaq məqsədilə həmin kəndlərdə yeni nasos stansiyalar quraşdırılıb, rayon üzrə 600 km su kanalı lildən təmizlənib. Yuxarı Seyidlər, Məlikli, Gödəkqobu, Məmmədqasımlı və Yarməmmədbağı kəndlərində modul tipli sutəmizləyici qurğular və 50 ədəd su bulağı işə salınıb.

Şəhər mərkəzinə - "Heydər Əliyev" prospektinə, "Ramiz Kərimov", "1 May", "Babək İsmayılov", "Şəhriyar", "Azadlıq", "Cəfər Cabbarlı", "Azərbaycan" küçələrinə təzə asfalt örtük döşənib. 3, 4 və 5 saylı kommunal yaşayış binalarının dam örtüyü təzələnib. Rayonda 6 yeni məktəb binası tikilib istifadəyə verilib, 4 məktəbin istilik sistemi bərpa olunub. Şəhər 3 saylı orta məktəbin, 1 və 2 saylı uşaq bağçalarının binaları əsaslı təmir edilib.

2010-cu ildə Kür, Göyçay və Türyançay çayları rayonu çox ciddi sınağa çəksə də, dövlət başçısı cənab İlham Əliyevin diqqət və qayğısı, rayon rəhbərliyinin çevik və yüksək təşkilatçılıq qabiliyyəti sayəsində Zərdab təbii fəlakətdən itkisiz qurtara bilib. Dövlət başçısının göstərişinə əsasən, 2010-cu ilin yazında baş vermiş təbii fəlakət nəticəsində ziyan çəkmiş 51 ailəyə şəhərin daha təhlükəsiz "32 hektar" adlanan ərazisində yeni evlər tikilib və istifadəyə verilib.

2010-cu ildə insanların 1 əsrdən çox arzusunda olduqları məsələ həllini tapıb 26 kilometrlik Zərdab-Mollakənd yoluna asfalt döşənib. Zərdab-Otmanoba yolu istiqamətində, 15-ci məhəllədə 5 kilometr və Təzəkənd kəndinin qalan 3 kilometr hissəsində qaz xəttinin çəkilişi aparılıb. Qaravəlli kəndində yeni qaz xətti artıq istifadəyə verilib. Şəftəhal və Aşağı Seyidlər kəndlərinin daxili yollarına 2 kilometrədək təzə asfalt örtük vurulub. Şəhər mərkəzində yollara 55 min kvadratmetr asfalt örtük döşənib.

Şəhərin mərkəzində nümunəvi məhəllələrin salınmasına başlanılıb, 5 binanın dam örtüyü dəyişdirilib. Köhnə çörək zavodunun binasında yenidən qurulan və 60 nəfərə qədər insanın işlə təmin olunacağı nəzərdə tutulan süd məhsulları emalı zavodunda işlər davam etdirilib. 2010-cu ildə, həmçinin ümumi ərazisi 5 hektara qədər olan "Heydər Əliyev parkı"nda yenidənqurma işləri davam etdirilib. Parkda sahəsi 1600 kvadratmetr olan möhtəşəm Heydər Əliyev Mərkəzinin tikintisinə başlanılıb.

2010-cu ildə rayonda Telemetrik Seysmik Stansiya inşa olunub. Bundan savayı, 13 nəfər Qarabağ əlilinə fərdi yaşayış evi tikilib. Milli Təhlükəsizlik Nazirliyinin rayon şöbəsinin inzibati binasında işlər davam etdirilib. Ailə, Qadın və Uşaq Problemləri üzrə Dövlət Komitəsinin xətti ilə rayonda Uşaq və Ailələrə Dəstək Mərkəzi yaradılıb, 4 nəfər gənc mütəxəssis burada işlə təmin olunub. Alıcanlı, Dəli Quşçu, Qaravəlli, İsaqbağı kəndlərində, Bəyimli qəsəbəsində modul tipli sutəmizləyici qurğuların tikintisinə hazırlıq görülüb, 2 kənddə və 1 qəsəbədə bu işlərə başlanılıb. Alıcanlı kəndində artıq su qurğusu əhalinin istifadəsinə verilib. Ümumiyyətlə, bu gün Zərdabın 13 kəndini əhatə edən 19769 nəfər əhali təmiz içməli su ilə təmin olunur.

2011-ci il də zərdablılar üçün uğurla başlanılıb. "Heydər Əliyev prospekti"ndə və ulu öndərin adını daşıyan parkda yenidənqurma işləri davam etdirilib. Yeni istifadəyə verilən "Heydər Əliyev Mərkəzi" gənclərin ideoloji istinadgahına çevrilib. Şəhərin küçələrinə, "Heydər Əliyev parkı"na Türkiyə Respublikasından gətirilmiş 6 və 9 metr hündürlüyündə 100-ə qədər müasir tipli elektrik dirəkləri quraşdırılıb. Üzərində milli ornamentlərimiz təsvir olunan parkın giriş qapısı yenidən qurulub. Heydər Əliyev Mərkəzinin ətrafında 2400 kvadratmetr sahəyə mərmər döşənib, ətrafı yaşıllaşdırılıb, yeni oturacaqlar quraşdırılıb. Şəhər mərkəzində küçələrə yeni asfalt örtük vurulması işi davam etdirilib. Ümumilikdə, son 3 ildə şəhərin küçə və dalanlarına 110 min kvadratmetrdən çox təzə asfalt döşənib.

2011-ci il may ayının 6-sı tarixi isə Zərdabın tarixində əlamətdar günlərdən olub. Həmin gün dövlət başçısı Zərdaba səfər edib, "Heydər Əliyev parkı", parkda inşa olunmuş "Heydər Əliyev Mərkəzi" ilə tanış olmuş, insanlarla səmimi söhbət edib. Cənab İlham Əliyev ictimaiyyətlə görüşündə qazlaşdırma, elektrik enerjisi ilə təchizat, su, kanalizasiya xətlərinin, kənd yollarının çəkilişinə böyük ehtiyacın olduğunu vurğulayıb. Ölkə rəhbərinin rayona səfərinin sevincini yaşayan zərdablılar mayın 11-də daha bir şad xəbər eşidiblər. Həmin gün Azərbaycan Prezidenti İlham Əliyev bir sıra rayonların, o cümlədən Zərdab rayonunun sosial-iqtisadi inkişafının daha da sürətləndirilməsinə dair əlavə tədbirlər haqqında sərəncam imzalayıb. Sərəncamla Azərbaycan Respublikası Prezidentinin Ehtiyat Fondundan Zərdab rayonunun sosial-iqtisadi inkişafının sürətləndirilməsi məqsədilə 2 milyon manat vəsait ayrılıb.

Dövlət başçısının bu diqqət və qayğısı nəticəsində 2011-ci ildə rayonda aparılan tikinti-quruculuq işlərinin sürəti artıb, keyfiyyəti xeyli yaxşılaşıb. Qısa müddətdə şəhər ərazisində 42 metr hündürlüyündə Bayraq meydanı tikilib, 14 iyul 2011-ci il tarixdə - ümummilli liderin siyasi hakimiyyətə gəlişinin 42-ci ildönümü ərəfəsində istifadəyə verilib. Şəhərin 4 yol adlanan ərazisində, Zərdabın girişində, "Heydər Əliyev prospekti"ndə Türkiyə Respublikasında hazırlanan, hündürlüyü 10,5 metr, eni 23 metr olan, Avropa standartları səviyyəsində hazırlanmış, üzərində ulu öndərin portreti, dövlət rəmzləri, müxtəlif tablolar, minlərlə rəngli işıq lampaları olan müasir tipli giriş qapısı quraşdırılıb.

2011-ci ilin ötən dövründə "Heydər Əliyev parkı"nda 2 ədəd fontan quraşdırılıb, parkda abadlıq və yaşıllaşdırma işləri, işıq sisteminin yeniləşdirilməsi davam etdirilib. Heydər Əliyev prospekti boyunca divarlar müasir üslubda üzlənib. Hazırda rayonda abadlıq işləri uğurla davam etdirilir. Heydər Əliyev parkında "Gənclər evi" tikilir. Fövqəladə Hallar Nazirliyinin Dövlət Yanğından Mühafizə Xidmətinin rayon yanğından mühafizə hissəsi üçün yeni inzibati binanın tikintisi işləri başa çatmaq üzrədir. Rayonun 4 yol adlanan ərazisində yolun kənarlarında hasarlar hörülür və müasir üslubda üzlənir.

Bir sözlə, bu gün Zərdab rayonu ulu öndər Heydər Əliyevin müəyyən etdiyi sabitlik və tərəqqi kursu ilə inamla irəliləyir. Bu kursun ən layiqli davamçısı - Prezident İlham Əliyevin diqqət və qayğısı ilə Zərdab şəhəri, rayonun əksər kəndləri simasını tanınmaz dərəcədə dəyişir. Yeniləşmə və yüksəliş davamlı, ürəkaçandır. İnsanlar sabaha dərin inam və ümidlə yaşayır, bu amallar uğrunda əzmlə çalışırlar.

Tərlan NƏSİRLİ,

Bakı-Zərdab-Bakı

Mövqe.- 2011.- 9 oktyabr.- S. 10.