Masallı mədəni intibahının yeni mərhələsində

Müasir dövrdə hər bir xalqın dünya miqyasında özünəməxsus yer tutmasını şərtləndirən amillər heç də sırf iqtisadi amillərlə şərtlənmir. Xalqları tanıdaraq məşhurlaşdıran həm də onların milli mədəniyyəti, milli-mənəvi dəyərləridir. Qloballaşma tendensiyasının xalqların milli-mənəvi dəyərlər sisteminə yönəlmiş təhdidləri şəraitində bu məsələlərə əvvəlkindən daha da çox diqqət yetirilməsinin vacibliyi ortaya çıxır.

Bu reallıq nəzərə alınmaqla ölkədə uğurla gerçəkləşdirilən mədəniyyət konsepsiyası təkcə paytaxt Bakıda deyil, ümumən regionlarda da mənəvi-intellektual yüksəlişi təmin edib. Son illərə Masallı rayonunun mədəni həyatındakı yeniliklər bunu bir daha təsdiqləyir. Hazırda rayonda 15 mədəniyyət evi, 28 kənd klubu, 79 kitabxana, tarix-diyarşünaslıq və Heydər Əliyev muzeyləri, rəsm qalereyası, 1 mədəniyyət və istirahət parkı, 26 turist obyekti, 117 tarix və mədəniyyət abidəsi, Uşaq İncəsənət Məktəbi fəaliyyət göstərir.

Rayonun klub və mədəniyyət evlərində 116 bədii özfəaliyyət dərnəkləri fəaliyyət göstərir və bura 2896 nəfər həvəskar istedadlı gənclər cəlb edilib. Həmin kollektivlərdən 2-si "Xalq" kollektivi adını daşıyır. Bunlar rayon mədəniyyət evinin dram kollektivi, Mahmudavar kənd mədəniyyət evinin "Halay" mahnı və rəqs kollektividir.

Respublikanın ictimai-siyasi həyatında baş verən dəyişikliklər və əlamətdar tarixi hadisələr mədəniyyət sahəsində görülən işlərin də canlanmasına təsir göstərib. 2011-ci ildə rayonun mədəni-maarif müəssisələrində yeni il şənlikləri keçirilib, həmçinin 20 yanvar faciəsinin ildönümü ilə bağlı şəhidlərin xatirəsi anılıb. Eyni zamanda, 14-16 fevral tarixlərində "Çal oyna" respublika rəqs kollektivlərinin II Ümumrespublika Müsabiqəsinin zona turu da Masallı rayonunda keçirilib.

Həmin baxış müsabiqədə rayon mədəniyyət evinin "Masallı" rəqs kollektivi və "Halay" folklor xalq kollektivi zona üzrə I yeri tutaraq yekun turunda Bakı şəhərində iştirak etmək hüququ qazanıb. Həmçinin Xocalı faciəsinin ildönümü ilə əlaqədar "Xocalıdan gələn səslər" tamaşası hazırlanıb və rayonda keçirilən tədbirdə nümayiş etdirilib. Bundan başqa, həmin tamaşa rayonun Həsənli, Kalinovka, Şərəfə kəndlərində və qonşu rayonda yerləşən hərbi hissədə də nümayiş olunub.

Azərbaycan xalqının dərin keçmişini, onun folklorunu, adət və ənənələrini əks etdirən, xalqımızın əziz bayramlarından biri olan "Novruz" bayramının təntənəli keçirilməsi də xoş ənənə şəklini alıb. Mahmudavar kənd mədəniyyət evinin "Halay" folklor mahnı və rəqs ansamblı, rayon mədəniyyət evinin "Təravət" instrumental ansamblı, habelə rayon xalq sənətkarlarının əl işləri Bakı şəhərində keçirilən böyük bayram şənliklərində iştirak edərək böyük maraqla qarşılanıb. İstər "Halay" mahnı və rəqs kollektivinin ifaları, istərsə də xalq sənətkarlarının əl işləri sərgisi iştirakçılarını valeh edib.

Rayonun mədəniyyət xadimləri tarixi və əlamətdar günlərdə vətənin keşiyində duran əsgər və zabitləri də unutmur. Gənclər təntənəli şəkildə hərbi xidmətə yola salınır, həmçinin qonşu rayonda yerləşən hərbi hissələrdə müxtəlif konsertlər, tamaşalar göstərilir. Novruz bayramı ilə əlaqədar özfəaliyyət kollektivləri müxtəlif hərbi hissələrdə konsert proqramı ilə çıxış edərək tamaşalar göstəriblər.

2011-ci ilin ötən 9 ayında əlamətdar və tarixi günlər rayonun bütün mədəni-maarif müəssisələrində təntənəli şəkildə qeyd edilib, foto-stendlər, sərgilər nümayiş olunub. May ayında rayonun bütün mədəni-maarif müəssisələrində ulu öndər Heydər Əliyevin anadan olmasının 88-ci ildönümü ilə əlaqədar tədbirlər keçirilib. Həmin tədbirlərdən ənənəvi "Yaz" festivalı daha maraqlı və məzmunlu olub. 1200 nəfərdən çox istedadlı yeniyetmə və gəncin iştirak etdiyi bu festivalı 5 janr üzrə 3 turdan ibarət keçirilib. I və II turun qalibləri III yekun turunda, ən yaxşı və istedadlılar isə yekun turunda fəxri fərman və diplomla mükafatlandırılıblar.

"Evrovizion-2011" mahnı yarışmasında Azərbaycan iştirakçılarının I yer tutması münasibəti ilə mayın 15-də rayon mərkəzindəki Nizami parkında təntənəli bayram konserti keçirilib, tədbirdə 1500-dən çox adam iştirak edib. 28 may Respublika Günü rayon Bayraq meydanında, 15 iyun "Qurtuluş günü" Heydər Əliyev parkında geniş və təntənəli bayram konserti ilə başa çatıb. 14-18 iyun tarixində Bakı şəhərində keçirilən ənənəvi "Azərbaycan doğma diyar" devzi ilə keçirilən azsaylı xalqların festivalında rayonun "Halay" folklor xalq mahnı və rəqs kollektivi uğurla təmsil edərək Mədəniyyət və Turizm Nazirliyinin fəxri fərmanı ilə təltif olunublar.

Muzeylər günü ilə əlaqədar "Heydər Əliyev və muzeylərimiz" mövzusunda tədbir, axşam saatlarında isə bayram konserti keçirilib. Mayın 17-də isə Hişkədərə kəndində Tarix diyarşünaslıq muzeyində özfəaliyyət kollektivləri konsert proqramı ilə çıxış ediblər. 18 mayda isə hər iki muzeydə "Açıq qapı" günü keçirilib.

2011-ci ilin Turizm ili elan edilməsi ilə bağlı rayonda müəyyən tədbirlər proqramı hazırlanaraq həyata keçirilib. Aprel ayının 26-dan 30-dək Bakı şəhərində keçirilən 10-cu turizm sərgisində rayonu 5 turist obyekti ("İsti su", "Dəmirağac", "Dəştvənd", "Zirvə", "Baba bulağı") təmsil ediblər. Həmin sərgidə rayonunun turist obyektləri haqqında bütün məlumatlar, həmçinin rayon haqqında məlumatlar, rayon sənətkarlarının əl işləri, (dulusçuluq, toxunma materialları və s.) həmçinin tarix və mədəniyyət abidələri haqqında məlumatlar, turistlərə göstərilən bütün xidmətlər və marşrutlar öz əksini tapıb.

Sevindirici haldır ki, Masallı Rayon İcra Hakimiyyəti başçısının 13 may 2011-ci il tarixli şura yığıncağında rayonda fəaliyyət göstərən turist obyektlərində xidmətin vəziyyəti, mövcud problemlər və qarşıda duran vəzifələr geniş müzakirə olunaraq qərar qəbul edilib. Həmin müzakirədə bir çox turist obyektlərinin sahibləri və rəhbərləri də iştirak ediblər. Şura yığıncağından keçən müddət ərzində turizmin inkişafı və təşviqi sahəsində xeyli işlər görülüb. Rayon mədəniyyət və turizm şöbəsi 25 may 2011-ci il tarixində keçirilən yığıncaqda bütün turist obyektlərinin rəhbərliyinin iştirakı təmin edilib, onlar dinlənilib, qarşıda duran əsas vəzifələr müəyyən edilib. Ən yaxşı turizm obyektlərinin sahiblərinə rayon mədəniyyət və turizm şöbəsi tərəfindən qiymətli hədiyyələr verilib, Beynəlxalq Sertifikatlar təqdim edilib.

Ümumilikdə, 2011-ci ilin doqquz ayı ərzində turist obyektləri 14286 nəfər turist qəbul ediblər. Onlardan 510 nəfəri xarici vətəndaşlar olublar. Hazırda fəaliyyət göstərən 31 turist obyektindən 26-nın lisenziyası var, 5 turist obyekti isə yeni tikilir.

İl ərzində, rayon Mərkəzi Kitabxanasında 22 iyul "Mətbuat günü", 1 avqust "Azərbaycan dili və əlifbası günü" ilə əlaqədar "dəyirmi masa"lar keçirilib. Rayonun nüfuzlu kollektivlərindən olan "Halay" folklor mahnı və rəqs ansamblı cari ilin avqust ayının 12-dən 22-dək Macarıstanda keçirilən Ümumdünya Folklor Festivalında iştirak edib. Bir çox Ümumdünya festivallarında uğurlara imza atan kollektiv bu dəfə də böyük zəfərlər qazanıb.

Azərbaycanın dövlət müstəqilliyinin 20 illiyinə həsr olunmuş tədbirlər də uğurla həyata keçirilir. Bu mövzuya həsr olunmuş stend və guşələr hazırlanaraq rayonun mədəniyyət müəssisələrində nümayiş etdirilir. Bundan başqa, 29 sentyabr Olimpiya Mərkəzində 1200-dən çox tamaşaçının iştirak etdiyi bayram konserti tamaşaçılar tərəfindən alqışlarla qarşılanıb. Rayon Mədəniyyət və turizm şöbəsinin kollektivi qarşıya qoyulan məsələlərin həllində rayon rəhbərliyinin, Mədəniyyət və Turizm Nazirliyinin yaxından köməyini hiss edir.

Masallı Tarix-Diyarşünaslıq Muzeyi də burada ilk dəfə olanlarda yüksək təəssürat doğurur. Muzeyin əsas fondunda 6927 eksponat mövcuddur. Muzeyin ekspozisiyasını miladdan öncə IV minillikdən başlamış, müasir dövrümüzə qədər olan müxtəlif eksponatlar təşkil edir. Muzeyin fondu və kolleksiyaları nəqqaşlıq, qrafika, heykəltəraşlıq, tətbiqi incəsənət, arxeoloqiya, numizmatika, etnoqrafiya, fotoşəkillər, sənədlər bölmələrindən ibarətdir. Muzeyin fondunu artırmaq üçün hər il muzey əməkdaşları kəndlərə ezam olunaraq materiallar əldə edirlər. Muzey Masallı rayonunun təbiətinin, arxeologiyasının, etnoqrafiyasının, bölgənin geyim və bəzək əşyalarının nümayişində və tanınmasında böyük rol oynayır.

(ardı var)

Tərlan NƏSİRLİ,

Bakı-Masallı-Bakı

Mövqe.- 2011.- 15 oktyabr.- S. 10.