Lənkəranın mədəni-intellektual intibahı yeni vüsət alır

Azərbaycanın qədim yaşayış məskənlərindən, inzibati-iqtisadi mərkəzlərindən biri sayılan Lənkəran son illərdə həm də mədəniyyət və turizmin inkişafı sahəsində diqqətəlayiq nəticələrə imza atıb. Həyata keçirilən kompleks tədbirlər nəticəsində rayonda mənəvi ab-hava yaxşılaşıb, insanların mədəni istirahətinin səmərəli təşkili istiqamətində mühüm tədbirlər həyata keçirilib. Bu baxımdan, "Azərbaycan Respublikası regionlarının sosial-iqtisadi inkişafı Dövlət Proqramı" çərçivəsində həyata keçirilən kompleks tədbirləri xüsusi qeyd etmək lazımdır. 2009-2013-cü illərdə regional inkişafı nəzərdə tutan Dövlət Proqramına müvafiq olaraq Lənkəran Mədəniyyət və Turizm şöbəsi 2011-ci ilin ötən 9 ayı ərzində bir sıra layihələri uğurla reallaşdırıb.

Azərbaycan Respublikası Nazirlər Kabinetinin 2 avqust 2011-ci il tarixli 132 saylı qərarı ilə təsdiq edilərək dövlət mühafizəsinə götürülmüş daşınmaz tarix və mədəniyyət abidələrinin monitorinqi keçirilib. Eyni zamanda, bütün yerli ərazi nümayəndəliklərinə və bələdiyyə orqanlarına onların ərazisində olan abidələr haqqında məlumatlar və onların toxunulmazlığı haqqında xəbərdarlıq məktubları verilib. Rayon ərazisindəki abidələrin sayı, onların adları bir daha dəqiqləşdirilib, onların foto şəkilləri çəkilib, ünvan və koordinatları göstərilib. Bu məlumatlar Mədəniyyət və Turizm Nazirliyinin mədəni irs şöbəsinə təqdim olunub. Tarix-diyarşünaslıq və H.Aslanovun ev muzeyləri üçün onların zəngin eksponatlarını əks etdirən bukletlər Azərbaycan, rus və ingilis dillərində tərtib olunaraq istifadəyə verilib.

Mühüm nəticələrdən biri də "Dairəvi Qala" tarixi abidəsində "Restovrator" MMC - abidələrin bərpası idarəsinin başladığı təmir-bərpa işlərinin yekunlaşmasıdır. Eyni zamanda abidənin ətrafı abadlaşdırılıb. Bu abidənin istifadəyə verilməsi gələcəkdə rayonun turizm sektorunun inkişafına öz töhfəsini verəcək.

Rayona gələn qonaqlara müasir səviyyədə xidmətin göstərilməsi ilə əlaqədar turizm obyektlərinin lisenziyalaşdırılması üçün bütün yerli mehmanxana və mehmanxana tipli obyektlərin rəhbərlərinə xəbərdarlıq məktubları verilib. Aparılan iş nəticəsində Lənkəranda lisenziya almayan mehmanxana və bu tipli obyektlərin fəaliyyəti müvafiq lisenziyalar alınana kimi dayandırılıb.

Ekoturizmin inkişafı xüsusi diqqət mərkəzindədir. Bu məqsədlə kəndlərdə müvafiq məişət şəraitinə malik evlərin aşkarlanması və sahiblərinin razılığı əsasında həmin evlərdə turistlər üçün tələb olunan şərait və xidmətin reallaşdırılması istiqamətində araşdırmalar aparılır. Hirkan Milli Parkında turistlərin gəzintisinin təşkili üçün park rəhbərliyi ilə sıx əməkdaşlıq münasibətləri qurulub.

Mərkəzi Kitabxana və onun filiallarında kitabxana fondlarının yeni latın qrafikalı ədəbiyyatla komplektləşdirilməsi və burada gözdən əlillərin informasiya tələbatını ödəmək məqsədilə respublika Kitabxana Kollektoru ilə müqavilə imzalanıb. Gözdən əlil olanlar üçün xüsusi üsulla nəşr olunmuş kitablar alınıb.

Əhalinin bütün təbəqələrinin müasir informasiya texnologiyalarından istifadəsini reallaşdırmaqməqsədilə Mədəniyyət və Turizm şöbəsi Mərkəzi Kitabxanada müasir kompyuter avadanlıqları ilə təmin olunmuş İnformasiya Resurs Mərkəzi yaradıb. Bu mərkəz, habelə müvafiq ingilis dili kursları rayon sakinlərinə pulsuz xidmət göstərir. Bundan başqa, Lənkəran rayonunun mədəniyyətinin, adət-ənənələrinin, turizm potensialının təbliği və tanıdılması məqsədilə xüsusi internet saytı yaradılıb.

Azərbaycanda 2011-ci ilin "Turizm ili" elan edilməsi və Lənkəran şəhərinin respublikanın folklor paytaxtı elan edilməsi ilə əlaqədar Lənkəran Şəhər Mədəniyyət və Turizm şöbəsi şəhərdə müxtəlif səpkili tədbirlər təşkil edib. Eyni zamanda bununla əlaqədar bir sıra "dəyirmi masa", konfrans, konsert, festival, sərgi və digər tədbirlərin keçirilməsi nəzərdə tutulub. Onu da bildirək ki, 2011-ci il sentyabrın 27-də "Ümumdünya turizm günü" münasibətilə Bakı şəhərində təşkil olunmuş sərgidə Lənkəran sənətkarlarının da əl işləri nümayiş olunub. Sərgidə dulusçuluq sənəti nümunələri ilə yanaşı, ilk dəfə olaraq keramikadan hazırlanmış suvenirlər göstərilib.

Rayonda turizm sektorunun inkişafı sahəsində də bir sıra tədbirlər həyata keçirilib. Belə ki, 2011-ci ilin birinci yarısında iki tam müasir tələblərə cavab verən turizm obyekti istifadəyə verilib. Bütün bunlar rayona gələn turistlərin sayının artmasına səbəb olub. 2011-ci ilin ötən 9 ayında Lənkərana 9 mindən artıq turist gəlib və bu da 2007-ci illə müqayisədə 45 faiz çoxdur.

Mədəniyyət, turizm sektoru ilə yanaşı, Lənkəranda gənclərlə iş, onların fiziki və mənəvi yüksəlişinin təmin olunması istiqamətində də əməli tədbirlər həyata keçirilir. Son illərdə gənclərin hərbi-vətənpərvərlik, vətəndaşlıq tərbiyəsi işinin gücləndirilməsi, onların hərbi xidmətə hazırlanması, əsgər həyatı ilə yaxından tanış olması, Vətənə, xalqa, məhəbbət ruhunun yüksəldilməsi məqsədilə "Şahin" və "Sərhəd" hərbi idman oyunlarının rayon birinciliyi yarışları keçirilib, qaliblər zona və respublika yarışlarında uğurlu nəticələr əldə ediblər. "Gələcəyin əsgəri", "Sərhəddən başlanır Vətən" adı altında gənclərin hərbi hissələrə və 2 dəfə Sovet İttifaqı Qəhrəmanı Həzi Aslanovun ev muzeylərinə ekskursiyaları təşkil edilib. 2 fevral Gənclər Günü və 26 iyun Silahlı Qüvvələr Günü münasibətilə "N" saylı hərbi hissədə əsgərlər üçün bayram şənlikləri keçirilib.

Gənclərin Vətənə məhəbbət ruhunda tərbiyə edilməsi məqsədilə tarixi hadisələrin qeyd edilməsi və Azərbaycan həqiqətlərinin dünyaya çatdırılması üçün müəyyən tarixi günlərdə "dəyirmi masa", konfranslar keçirilib, məktəblilərlə görüşlər təşkil olunub. "26 fevral 1992-ci il Xocalı faciəsinə biganə qalmayın! Elektron-post kampaniyasına sən də qoşul!" şüarı ilə ilk dəfə lənkəranlı gənclərin iştirakı ilə internet aksiyası keçirilib. Aksiyaya qoşulan minlərlə lənkəranlı gənc Xocalı faciəsi ilə bağlı həqiqətləri ABŞ senatorlarına, konqresmenlərinə, dünyanın aparıcı televiziya və qəzetlərinə, Avropa Birliyinə, müxtəlif ölkələrin səfirliklərinə və konsulluqlarına çatdırmaq üçün fəal iş aparıb. Bundan başqa, rayonda Milli Qəhrəman Mübariz İbrahimovun xatirəsinə həsr olunmuş ədəbi-bədii gecə keçirilib.

Azərbaycan Prezidenti İlham Əliyevin 22 dekabr 2008-ci il tarixli sərəncamı ilə 2009-cu ilin "Uşaq ili" elan edilməsi ilə bağlı rayonda uşaqların asudə vaxtlarının səmərəli təşkili, müasir rəqs növlərinin inkişaf etdirilməsi istiqamətində tədbirlər həyata keçirilib. "Uşaqlar bizim gələcəyimizdir!" adlı bayram şənliyi, "Qarabağ uşaqların gözü ilə" mövzusunda rəsm müsabiqəsi keçirilib.

Azərbaycan Respublikasının Məşğulluq Strategiyasının həyata keçirilməsi üzrə Dövlət Proqramının (2007-2010-cu illər) təmin edilməsi ilə əlaqədar gənclər arasında idarəetmə, "SV" yazma və müraciət etmə qaydalarına dair seminar keçirilib. "Acsess Bank"ın Lənkəran filialının və "Atəşgah" Sığorta Şirkətinin Lənkəran filialının vakant yerlərinə işə qəbul məqsədilə işsiz gənclərlə görüşlər təşkil edilib. Bu görüşlərin və aparılan işlərin nəticəsində 6 nəfər gənc müxtəlif yerlərdə işlə təmin olunub.

2010-cu ildə Lənkəran şəhər "Gənclər Evi"nin açılışı da rayonun ictimai-siyasi həyatında əlamətdar hadisələrdən olub. Ötən dövr ərzində "Gənclər Evi"nə gənclərin cəlb olunması və onlarla faydalı iş aparılması istiqamətində çoxsaylı tədbirlər reallaşdırılıb. İstedadlı və və yaradıcı gənclərə qayğının artırılması, onların qabiliyyətlərinin inkişaf etdirilməsi üçün əlverişli şəraitin yaradılması, intellektual səviyyənin təmin edilməsi, gənc istedadları aşkar edib üzə çıxarmaq, gənclərin asudə vaxtlarını səmərəli keçirmək məqsədilə bu illər ərzində bir sıra tədbirlər keçirilib. Belə ki, gənclərin asudə vaxtının səmərəli təşkili üçün 2 fevral Gənclər Günü münasibəti ilə tələbə gənclər üçün hər il bayram şənlikləri keçirilib. Lənkəran Şəhər Mədəniyyət Evi ilə birlikdə "Biz də varıq!" şüarı altında 500 nəfərdən artıq gəncin iştirakı ilə açıq havada musiqili-əyləncəli konsert təşkil olunub. Şənliklə rayonun bir sıra istedadlı gəncləri öz bacarıqlarını nümayiş etdiriblər. Bundan əlavə, onlarda teatr mədəniyyətinin inkişaf etdirilməsi, habelə gənclərin asudə vaxtının səmərəli təşkili məqsədilə "Gənclər teatrı sevir" adlı teatr günü təşkil olunub. Nümayiş olunan tamaşa 300-ə yaxın gəncdə böyük maraq doğurub.

Fəal gənclər üçün hər il Yardımlı, Lerik rayonlarına və ərazidə yerləşən "Xan evi", "Mayak", "Babək qalası" tarixi abidələrinə səhayətlər təşkil edilib. 2009-cu ildə "Azərbaycan-Türkiyə gənclərinin dostluq düşərgəsi"nin rəsmi açılışı və düşərgə iştirakçıları ilə görüş keçirilib. Bir qrup gəncin "Azərbaycanımızı tanıyaq!" adı altında Yardımlı rayonuna dağ gəzintisi təşkil edilib.

Ümumiyyətlə, bu gün Lənkəran şəhəri təkcə iqtisadi deyil, mədəni-intellektal səviyyədə də uğurlara imza atır. Bütün bunların nəticəsi kimi insanların təkcə yaşam tərzi, məişəti deyil, ümumən psixologiyası, həyata baxışı da dəyişir, müasirləşir. Lənkəran sakinləri inanırlar ki, respublika rəhbərliyinin həyata keçirdiyi siyasət rayonun hərtərəfli inkişaf və tərəqqisini daha da sürətləndirəcəkdir.

Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən maliyyələşdirilən "Regionların sosial-iqtisadi inkişafının təşviq edilməsi" layihəsi çərçivəsində çap olunub.

Tərlan NƏSİRLİ,

Bakı-Lənkəran-Bakı

Mövqe.- 2011.- 22 oktyabr.- S. 10.