"Kişi sözü"nün müəllifinin 60 yaşı oldu

Tanınmış rejissor, əməkdar incəsənət xadimi Cahangir Mehdiyevin 60 yaşı tamam oldu. Bu münasibətlə yanvarın 28-də Kinemotoqrafçılar İttifaqında yubiley tədbiri keçiriləcək. Ömrünün çox hissəsini kinoya həsr etmiş istedadlı sənətkar öz yaradıcılığı dövründə kinoda müxtəlif səpkili, parlaq və tamaşaçı tərəfindən sevilən filmlərə quruluş verib. Bakıda anadan olan Cahangir Mehdiyev 1968-1973-cü illərdə Azərbaycan Dövlət İncəsənət İnstitutunun rejissorluq fakültəsində, 1974-1979-cu illərdə Moskva Kinematoqrafiya İnstitutunda G.Daneliyanın kursunda təhsil alıb. "Diplom işi" adlı qısametrajlı filmlə diplom müdafiəsini edən gənc rejissor həmin filmlə beynəlxalq festivalda "Ən yaxşı tələbə işi" kimi ilk mükafatını alıb.

Təhsilini bitirdikdən sonra 1979-cu ildən "Azərbaycanfilm" kinostudiyasında işləyir. Komediya janrında çəkdiyi "Vah!", "Evlənmək istəyirəm", "Kişi sözü", "Gənc qadının kişisi", "Girişmə, öldürər" və digər filmləri öz dəsti-xətti ilə seçilərək tamaşaçılar tərəfindən rəğbətlə qarşılanır və sevilə-sevilə baxılır. Onun filmləri bir çox beynəlxalq festivallarda Azərbaycanı layiqincə təmsil edib və mükafatlara layiq görülüb. Cahangir Mehdiyev "Mozalan" Studiyasının rəhbəri olub. Azərbaycanın əməkdar incəsənət xadimi fəxri adına layiq görülmüş Cahangir Mehdiyev Kinematoqrafçılar İttifaqı və Professional Kinorejissorlar Gildiyasının üzvü olaraq milli kinematoqrafiyanın ictimai həyatında fəal iştirak edən, gənc kadrların hazırlanmasına və formalaşmasına öz töhfəsini verən bir sənətçidir.

Mövqe.- 2011.-20 yanvar.-S.13.