Regional inkişaf proqramları Şirvanda uğurla icra olunur

Son illər Azərbaycanda iqtisadiyyatın həm sahəvi, həm də regional baxımdan tarazlı inkişafının təmini, əhalinin həyat səviyyəsinin yaxşılaşdırılması, infrastruktur layihələrinin reallaşdırılması istiqamətində mühüm tədbirlər həyata keçirilib. 2009-2013-cü illəri əhatə edən ikinci regional inkişaf proqramı çərçivəsində həyata keçirilən tədbirlər bu baxımdan xüsusi qeyd olunmalıdır. Dövlət Proqramının uğurlu nəticələr verdiyini Şirvan rayonunun son illərdə əldə etdiyi sosial-iqtisadi uğurlar fonunda aydın görmək mümkündür.

2009-cu ildə şəhər üzrə iqtisadiyyatın bütün sahələrində istehsal olunan ümumi məhsul və xidmətlərin həcmi 221 milyon manat təşkil edib və bu da 2008-ci illə müqayisədə 0,1 faiz çoxdur. Ümumi məhsul buraxılışında xüsusi çəkiyə malik olan sənaye sahələrində 186,7 milyon manat məhsul istehsal edilib. Sənayedə istehsal olunan məhsulların 66,6 faizi qeyri-dövlət sektorunda, 33,4 faizi isə dövlət sektorunda istehsal edilib.

Hesabat dövründə şəhərdə 505,7 min ton xam neft və 21 milyon kubmetr qaz istehsal edilib. İstehsal olunan qazın həcmi keçən illə müqayisədə 7,1 faiz çoxdur. 2009-cu ildə Şirvan İstilik Elektrik Stansiyası tərəfindən 2 milyard 573 milyon kilovatt saat elektrik enerjisi istehsal edilib və yaxud istehsalat tapşırığına 103,3 faiz əməl edilib.

Sənaye sahəsində işçilərin orta aylıq əməkhaqqı 2004-cü ilə nisbətən 2 dəfədən çox artaraq 493 manata çatdırılıb. 2009-cu ildə tikinti müəssisələri tərəfindən 3,5 milyon manat həcmində inşaat işləri görülüb. Əhalinin şəxsi vəsaiti hesabına görülən tikinti işlərinin həcmi 1,0 milyon manat təşkil edib. İstifadəyə verilmiş fərdi evlərin ümumi sahəsi 12,9 min kvadartmetr olub. Əsas kapitala yönəldilən vəsaitin həcmi 5,8 milyon manat olub və bunun da 1,5 milyon manatını əsas fondlar təşkil edir.

Rabitə müəssisələri tərəfindən əhaliyə, müəssisə və təşkilatlara 897 min manat həcmində, yaxud ötən ilin müvafiq dövründəkindən 1,7 faiz çox rabitə xidməti göstərilib. Şəhərin 28 may, S.Zeynalov, M.Ə.Rəsulzadə və Naxçıvan küçələrində əhalinin telefona olan tələbatını nəzərə alaraq genişləndirmə işləri aparılıb, 600 cütlük kabel qoyulub. 2009-cu ildə Telekommunikasiya qovşağı tərəfindən 405 ədəd telefon çəkilərək ümumi istifadə 10370-ə çatdırılıb. Hesabat dövründə nəqliyyat müəssisələri tərəfindən 17 milyon 869 min nəfər sərnişin və 300 min ton yük daşınıb.

2009-cu ildə şəhərin sənaye müəssisələrində də xeyli yenidənqurma və abadlıq işləri görülüb. "Telemexanika" zavodunda tikinti-bərpa və yenidənqurma işləri davam etdirilib. Zavod hesabat ilini uğurla başa vurub, burada proqnoz planının yerinə yetirilməsi 157 faiz təşkil edib. Eyni zamanda, zavodun tam yararsız olan 2,3,4 saylı korpusları yüksək səviyyədə təmir edilib. Zavodun işçilərinə 150 nəfərlik yeməkxana xidmət göstərir və burada işçilər 50 faiz güzəştlə yeməklə təmin olunurlar. Naxçıvan küçəsindən başlayaraq zavoda qədər və zavoddaxili yollar asfaltlaşdırılıb. Zavodun ərazisi boyunca 480 metr hasar çəkilib, istehsalat korpuslarının 32 min kubmetr dam örtüyü əsaslı təmir edilib. Eyni zamanda, alətlər sexi yeni əraziyə köçürülüb, 144 kvadratmetr sahəsi olan yeni qablaşdırma sahəsi tikilərək istifadəyə verilib. Müasir tələblərə cavab verən avadanlıqlar quraşdırılıb, sahəsi 1339 kvadratmetr olan texniki göstəricilərin sınaq sahəsinin tikintisi davam etdirilib. Zavodda 40 nəfər yeni iş yeri açılıb.

"Araz" zadovu isə hesabat ilində plan tapşırığına 100,5 faiz əməl edərək 2 növ xüsusi təyinatlı məhsul istehsalına başlayıb. 2009-cu ildə 41 min manat həcmində eyni adlı məhsul dövlət sifarişinə uyğun olaraq lazımi ünvana çatdırılıb. İstehsal olunan məhsulun 10 faizi xüsusi təyinatlı, 90 faizi isə texniki təyinatlıdır. 2009-cu ildə 41 min manat həcmində eyni adlı məhsul dövlət sifarişinə uyğun olaraq lazımi ünvanlara çatdırılıb. İstehsal olunan məhsulun 10 faizi xüsusi təyinatlı, 90 faizi texniki təyinatlı olub. 2009-cu ildə zavodun istehsal sahələrində 800 min manat dəyərində yeni avadanlıqlar quraşdırılıb. Müdafiə Sənayesi Nazirliyi üçün ayrılmış 154 ha torpaq sahəsində "Araz" zavoduna məxsus 7-ci istehsal sahəsinin tikintisi davam etdirilib.

Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda nəzərdə tutulan emal sənayesinin inkişaf etdirilməsi tədbirlərinin icrası ilə əlaqədar Şirvan şəhərində bir sıra işlər görülüb, pambıq emalı xeyli artırılıb. 2009-cu ildə Şirvan pambıq emalı zavodu tərəfindən 4870 ton xam pambıq emal olunub, 1680 ton mahlıc və 2718 ton çiyid istehsal edilib.

Əhalinin içməli suya olan tələbatının ödənilməsi istiqamətində 2009-cu ildə Su Kanal İdarəsi tərəfindən bir sıra işlər həyata keçirilib. Əhalinin içməli suya olan tələbatının ödənilməsi və kanalizasiya sistemi ilə bağlı mövcud problemlərin həlli regionların sosial-iqtisadi inkişafı Dövlət Proqramında da öz əksini tapıb. Su Kanal İdarəsi tərəfindən 2009-cu ildə satılmış içməli suyun dəyərinin 79,6 faizi həcmində yığılması təmin edilib.

Regionların sosial-iqtisadi inkişafı Dövlət Proqramına uyğun olaraq 2009-cu ildə Səhiyyə Nazirliyi tərəfindən Doğum evində müasir standartlara cavab verən əsaslı təmir işləri aparılıb. Eyni zamanda əhaliyə göstərilən səhiyyə xidmətlərinin səviyyəsinin yüksəldilməsi üçün uşaq yoluxucu xəstəlikləri şöbəsi, cərrahi şöbə və cərrahi blok əsaslı təmir edilib. Səhiyyə müəssisələrinin maddi-texniki bazası xeyli möhkəmləndirilib, poliklinikanın kabinetləri müasir avadanlıqlarla təmin edilib. Təcili yardım stansiyasına isə 4 ədəd müasir tipli "Mersedes" markalı ambulanslar alınıb.

Proqram çərçivəsində həyata keçirilən tədbirlər şəhərin simasını əsaslı şəkildə dəyişib. 2009-cu ildə şəhər ərazisində aparılan tikinti-quraşdırma, abadlıq, yenidənqurma işlərinin həcmi artırılıb, yeni binalar inşa edilib, park, xiyaban və küçələr abadlaşdırılıb, məhəllələr salınıb. Şəhərin "Heydər Əliyev meydanı"nın cənub hissəsində Şirvan memarlıq məktəbinin ənənələrini özündə əks etdirən, müasir tələblərə cavab verən Heydər Əliyev mərkəzi tikilib. Ərazisi abadlaşdırılıb, dekorativ bəzək kolları və güllər əkilib. Ərazidə müasir işıqlandırma sistemi quraşdırılıb. Xüsusilə gecə işıqlanması binanın memarlıq görkəmini zənginləşdirib.

"Heydər Əliyev meydanı"nda 36.356 manat dəyərində 2 ədəd "İşıqlı fontan" kompleksi istifadəyə verilib, 50 kvadratmetr tamet tavalar, 70 kvadratmetr "ağlay" üzlük daşları yenisi ilə əvəz olunub. Burada 22 metr hündürlükdə Azərbaycan Respublikasının Dövlət Bayrağı ucaldılıb. M.Ə.Rəsulzadə prospektində sahəsi 2,8 ha olan 1500 yerlik "Şirvan Ticarət Mərkəzi"nin tikintisi başa çatdırılıb. Şəhərin 28 May küçəsində şəhid ailələri, Qarabağ müharibəsi, 20 yanvar və Çernobıl əlilləri üçün inşa edilmiş 16 mənzilli 4 mərtəbəli yaşayış binası və Ədliyyə Nazirliyinin Şirvan Regional Ədliyyə İdarəsinin inzibati binası istismara yararlı vəziyyətə gətirilib.

Regionların sosial-iqtisadi inkişafı dövlət proqramı çərçivəsində təməli 2009-cu ildə Prezident İlham Əliyev tərəfindən qoyulmuş Cənub Elektrik Stansiyasında tikinti-quraşdırma işləri davam etdirilib. Elektrik stansiyasının tikintisində maşın zalının 1,2,3 və 4 saylı qaz və 1,2 saylı buxar turbinlərində bünövrə armokarkasları layihəyə uyğun quraşdırılaraq qəliblənib. Əsas binanın divaraltı armokarkasları qurulub və qəlibləmə işləri başa çatdırılıb. 3-cü və 4-cü qazanlarda betonlama işləri qurtarıb, qazan avadanlıqlarının quraşdırılması üçün quraşdırıcılara təhvil verilib. 1-ci və 2-ci qazanların bünövrəsində 1,2 metr səviyyəsində betonlama işləri qurtarıb, üst hissələrinin armokarkası qəliblənərək betonlamaya hazırlanıb. Stansiyanın 110, 220 və 330 kv-luq qapalı paylayıcı qurğuları obyektinin bünövrəsində betonlama, xarici divar, arakəsmə və örtük tavasının armokarkasları, rigellərində armatur işləri qurtarıb, qəlibləmə işləri davam etdirilir. Stansiya avadanlıqlarını quraşdırmaq üçün yükqaldırma qabiliyyəti 650 ton olan tırtıllı kran alınaraq tikinti meydançasında quraşdırılıb. Sənaye axıntı sularının nizamlayıcı hovuzu obyektində torpaq və beton işləri görülüb.

Sahil nasosları obyektində torpaq işləri görülüb, spunt vurma işlərinə başlanılıb. Yeni stansiya üçün inşa olunan inzibati bina və yeməkxanada betonlama işləri tam qurtarıb, elektrik, xarici və daxili divarlarda suvaq işləri görülüb. "Cənub" Elektrik Stansiyasının tikintisində çalışacaq mütəxəssislərin yaşaması üçün şəhərin M.Füzuli adına Mədəniyyət və İstirahət Parkının ərazisində inşa olunan qonaq şəhərciyində tikinti-quraşdırma işləri qurtarıb.

(ardı var)

Tərlan NƏSİRLİ,

Bakı-Şirvan-Bakı

Mövqe.- 2012.- 8 fevral.-S.10.