Hacıqabul rayonu təhsil sahəsində mühüm irəliləyişlərə nail olub

Qabaqcıl ölkələrin təcrübəsi göstərir ki, təhsilin müasir tələblər səviyyəsində inkişafı böyük məbləğdə investisiya tələb edir. Bu da təsadüfi deyildir ki, son illərdə ölkəmizin maliyyə imkanlarının artması ilə paralel şəkildə təhsilə dövlət büdcəsindən ayrılan vəsaitlər də çoxalır. Məqsəd həm də regionlarda Sovet dövründən qalan, müasir tələblərə cavab verməyən məktəblərin təmiri və bərpası, habelə yenidənqurulmasıdır. Bu problemin həlli - məktəblərdə əsaslı təmir-tikinti işlərinin aparılması, müasir tipli yeni təhsil ocaqlarının tikilib istifadəyə verilməsi hələ 11 fevral 2004-cü il tarixli Azərbaycan Respublikası regionlarının sosial-iqtisadi inkişafı (2004-2008-ci illər) Dövlət Proqramında əksini tapıb.

Bölgələrin sosial-iqtisadi inkişafı sahəsində tədbirlərin davam etdirilməsini nəzərdə tutan "Azərbaycan Respublikası regionlarının 2009-2013-cü illərdə inkişafı Dövlət Proqramı"nda da bir sıra sahələrlə yanaşı, təhsil infrastrukturunun müasirləşdirilməsi məsələsinə xüsusi yer ayrılıb. Proqram çərçivəsində 2010 və 2011-ci illərdə məktəb infrastrukturunun müasirləşdirilməsi tədbirləri davam etdirilib. Ümumilikdə, Hacıqabul rayon Təhsil Şöbəsinin taleyində 32 ümumtəhsil məktəbi, 5 məktəbdənkənar, 3 məktəbəqədər tərbiyə müəssisəsi fəaliyyət göstərir. Rayonun ümumtəhsil məktəblərində 10 mindən çox şagirdin təlim-tərbiyəsi ilə 1000-dən artıq müəllim məşğul olur.

Rayon müəllimlərindən 4 nəfəri "Əməkdar müəllim" adını alıb, 1 nəfər müəllim "Tərəqqi" medalına layiq görülüb, 1 nəfər müəllim elmlər namizədidir. 2010-cu ildə rayonda "Ən yaxşı ümumtəhsil məktəbi" və "Ən yaxşı müəllim" müsabiqələri keçirilib və müsabiqə qaliblərinin sənədləri Təhsil Nazirliyinə göndərilib. "Ən yaxşı ümumtəhsil məktəbi" müsabiqəsinin respublika mərhələsində şəhər 1, 5 saylı və Rəncbər kənd orta məktəblərin direktorları - Ağamalıyeva Cəmilə Balaqardaş qızı, Almazova Gülüstan Bulud qızı və İbrahimov Əlisoltan Hacıbala oğlu, "Ən yaxşı müəllim" müsabiqəsinin respublika mərhələsində Talış kənd orta məktəbinin tarix müəllimi, əməkdar müəllim Əmiraslanov Mehman Bazar oğlu və şəhər 1 saylı orta məktəbin biologiya müəllimi Rəsulova Səbinə Əlibala qızı iştirak ediblər. Şəhər 1 saylı orta məktəbin müəllimi Rəsulova Səbinə 2010-cu ildə "Ən yaxşı müəllim" müsabiqəsinin qalibi olub və ölkə prezidentinin sərəncamı ilə 5000 manat pul mükafatına layiq görülüb.

Rayonda gənclərə qayğı siyasəti də sistemli şəkildə davam etdirilib. Dövlət başçısı cənab İlham Əliyevin "Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cı illər)"nın təsdiq edilməsi haqqında 17 aprel 2006-cı il tarixli 1414 nömrəli sərəncamı rayonun təhsil müəssisələrində istedadlı gənclərlə aparılan məqsədyönlü işləri gücləndirib. Rayonun ümumtəhsil məktəblərində istedadlı şagirdlərin aşkara çıxarılması və uçotunun aparılması, onlarla səmərəli iş sisteminin yaradılması diqqət mərkəzində saxlanılıb.

Rayonun ümumtəhsil məktəblərində istedadlı uşaqları aşkara çıxarmaq, onların bilik, bacarıq və qabiliyyətlərini inkişaf etdirmək üçün müxtəlif tədbirlər həyata keçirilib. Hacıqabul rayonunun ümumtəhsil məktəbləri şagirdləri arasında bilik yarışları, sərbəst olimpiadalar, test yoxlamaları aparmaq üçün qrafiklər tərtib olunub və planauyğun şəkildə həyata keçirilib. Rayon Təhsil Şöbəsi tərəfindən yanvar-aprel aylarında rayonun ümumtəhsil məktəblərinin IX-XI sinif şagirdləri arasında Azərbaycan dili və ədəbiyyatı, Azərbaycan tarixi, coğrafiya, alman və ingilis dilləri üzrə bilik yarışları keçirilib. Aprel ayının əvvəllərində Təhsil Nazirliyinin "Xüsusi istedada malik şagirdlərin aşkara çıxarılması tədbirləri haqqında" əmrinə müvafiq olaraq riyaziyyat, fizika, kimya, biologiya fənləri üzrə istedadlı şagirdlər arasından ən istedadlılarını müəyyənləşdirmək məqsədilə sərbəst olimpiadalar və test yoxlamaları keçirilib. Bundan əlavə, rayonun ümumtəhsli məktəblərinin VII -XI sinif şagirdləri arasında "Uşaqlar bizim gələcəyimizdir", "El igidləri ilə tanınar", "Biz Sizdən öyrəndik qəhrəmanlığı", "Mənim hüquqlarım məni qoruyur" və "Sağlam təbiət sağlam cəmiyyətdir" adlı inşa müsabiqələri keçirilib.

İstedadlı şagirdləri aşkara çıxarmaq məqsədilə rayonun bir ümumtəhsil məktəbində - 8 nömrəli humanitar fənlər təmayüllü tam orta məktəbdə lisey sinif açılıb. VII sinifdən etibarən başlanan lisey-sinifdə şagirdlərin təlim-tərbiyəsilə rayonun ən güclü, peşəkarlıq səviyyəsilə seçilən müəllimləri məşğul olurlar.

Müasir cəmiyyətdə təhsilin vacib komponentlərindən birinə çevrilmiş İKT-nin təhsil müəssisələrinə geniş tətbiqi sahəsində də xeyli iş görülüb. Təhsil Nazirliyinin 11.01.2010-cu il tarixli məktubuna əsasən, "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində 2010-cu ilin yanvar-fevral aylarında və sentyabr ayında 60 nəfər müəllim, eləcə də ümumtəhsil məktəblərindən 110 nəfər, dekabr ayında isə 40 nəfər inzibati idarəetmə heyəti təlim kursundan keçib. 2010-cu ilin mart ayında Təhsil Nazirliyinin "Regionlarda informasiya mədəniyyətinin formalaşdırılması" mövzusunda rayonda keçirdiyi dəyirmi masada rayonun müəllimləri də fəal iştirak ediblər. Bundan başqa, şəhərin 9 məktəbində internet şəbəkəsi qurulub, sürətli internet xəttinə qoşulub.

Müəllimlərin elmi-nəzəri və peşəkarlıq səviyyəsinin yüksəldilməsi istiqamətində də ardıcıl iş aparılıb. Bu məqsədlə rayonun ümumtəhsil məktəblərində nümunəvi dərslər keçirilib, fəal təlim metodlarının tətbiqi ilə bağlı qabaqcıl müəllimlərin iş təcrübəsi öyrənilib və fikir mübadilələri aparılıb. Rayon Təhsil Şöbəsi tərəfindən şəhər 1, 5 və 8 saylı məktəblərdə "İKT-nin tətbiqi ilə nümunəvi dərs günü" keçirilib və bu dərslərdə rayonun ümumtəhsil məktəblərinin 100-ə yaxın müəllim iştirak edib.

Rayonun ümumtəhsil məktəblərinin IX və XI siniflərində müntəzəm olaraq hər ay test yoxlamaları aparılıb. İl ərzində Azərbaycan dili, ədəbiyyat, tarix, Azərbaycan tarixi, riyaziyyat, fizika, kimya, biologiya, coğrafiya, xarici dil fənləri üzrə məktəblərin keyfiyyət göstəriciləri təhlil olunub. Həmin fənlər üzrə məktəblərin reytinq cədvəli tərtib olunub, yüksək, orta və zəif göstəricisi olan məktəblər müəyyən edilib.

Şəhər 3, 4, 5 və 8 saylı orta məktəblərin I, II və III siniflərində müəllimlərin nümunəvi dərsləri təşkil edilib, həmin dərslərdə rayon məktəblərinin I, II və III sinif müəllimləri, o cümlədən xarici dil və informatika müəllimləri, IV sinif müəllimləri və məktəb rəhbərləri iştirak ediblər. 2010-cu ilin noyabr ayında məktəb rəhbərləri fənn kurikulumlarının öyrənilməsi və tətbiqi istiqamətində "Fənn kurikulumlarının tətbiqi: problemlər, vəzifələr", "Fənlər üzrə qiymətləndirmənin aparılması yolları" və "II siniflərdə şagird nailiyyətlərinin qiymətləndirilməsi haqqında" mövzularında seminar-müşavirələr keçirilib.

Rayonun ümumtəhsil məktəblərində V-XI siniflər üzrə fənn kurikulum layihələrinin müzakirəsi təşkil edilib, müəllimlərin rəy və təklifləri öyrənilərək RTŞ-də ümumiləşdirilib, daha sonra Təhsil Nazirliyinə göndərilib. Rayonun ümumtəhsil məktəblərində imtahana hazırlıq işləri də uğurla davam etdirilib. Belə ki, XI siniflərdə test yoxlamaları aparmaq üçün rayon Təhsil Şöbəsində test bankı hazırlanıb. Rayonun bir çox məktəblərinin XI siniflərində test yoxlamaları aparılıb və nəticəsi məktəb rəhbərləri ilə müzakirə olunub. Eləcə də seçmə yolla rayonun ümumtəhsil məktəblərinin IV siniflərində təhsil nəticələrini müəyyənləşdirmək məqsədilə test yoxlamaları keçirilib.

Ümummilli lider Heydər Əliyevin anadan olmasının 87-ci ildönümü ilə bağlı rayonun ümumtəhsil məktəblərinin şagirdləri arasında "Heydər Əliyev və müstəqil Azərbaycan" mövzusunda rəsm müsabiqəsi keçirilib və qalib şagirdlərin rəsm işləri Təhsil Nazirliyinə təqdim olunub. Rayon ümumtəhsil məktəblərinin VII-XI sinif şagirdləri arasında "Heydər Əliyev və müstəqil Azərbaycan" və "Müstəqil Azərbaycan dövlətinin və Yeni Azərbaycan Partiyasının banisi" mövzularında inşa yazı müsabiqələri keçirilib. "Heydər Əliyev və müstəqil Azərbaycan" inşa müsabiqəsinin rayon mərhələsinin qalibi, şəhər 5 saylı orta məktəbin şagirdi Fatma Məmmədova həmin müsabiqənin respublika mərhələsində IV yeri tutub.

Bundan başqa, 2010-cu ildə rayonun ümumtəhsil məktəblərində ali məktəblərə qəbulla bağlı məqsədyönlü iş aparılıb. XI sinif şagirdləri arasında rəy sorğusu keçirilib. Şagirdlərin ali məktəblərə hazırlığının daha mütəşəkkil qurulması üçün ayda bir dəfə "Araz" hazırlıq kurslarının xəttilə sınaq imtahanı keçirilib, nəticələri təhlil olunub. Həmin il rayonun ümumtəhsil məktəblərinin məzunlarından respublikanın müxtəlif ali məktəblərinə 291 nəfər sənəd verib. Sənəd verənlərdən 85 nəfəri respublikanın müxtəlif ali məktəblərinə qəbul olunub.

Azərbaycan Respublikası Prezidentinin sərəncamına əsasən, 2010-cu ilin "Ekologiya ili" elan edilməsilə bağlı Ekoloji Tərbiyə və Təcrübəçilik Mərkəzinin xətti ilə "Ən yaşıl məktəb" müsabiqəsi keçirilib. Eləcə də rayon Təhsil Şöbəsi tərəfindən Tədbirlər Planı hazırlanıb, "Ekologiya ili" çərçivəsində Ekoloji Tərbiyə və Təcrübəçilik Mərkəzinin xəttilə rayonun ümumtəhsil məktəblərində müxtəlif mövzularda "dəyirmi masa"lar, disputlar, viktorinalar, rəsm və foto müsabiqələri keçirilib.

Rayonun ümumtəhsil məktəblərində şagirdlərin hərbi-vətənpərvərlik tərbiyəsi istiqamətində də ardıcıl iş aparılıb. Böyüməkdə olan nəslin vətənə sədaqət ruhunda tərbiyə edilməsinə xüsusi diqqət yetirən Hacıqabul rayon Təhsil Şöbəsi 15-25 fevral tarixlərini hərbi-vətənpərvərlik dekadası elan edib və bununla bağlı tədbirlər planı hazırlanıb. Dekada ərzində rayonun bütün təhsil müəssisələrində müxtəlif səpkidə tədbirlər - inşa müsabiqəsi, bilik yarışları, şeir, mahnı və rəsm müsabiqəsi, "dəyirmi masa"lar, kitab müzakirəsi, milli qəhrəmanlarımız haqqında söhbətlər keçirilib. Hərbi-vətənpərvərlik mövzusunda bülletenlər buraxılıb, rayon şəhidlərinin doğum və ölüm günləri qeyd edilib.

Bundan başqa, rayonun ümumtəhsil məktəblərində "Cəsurlar" və "Şahin" hərbi idman oyunlarının həm məktəb, həm də rayon turu keçirilib, qalib komandaların zona və respublika mərhələsində iştirakı təmin olunub. Bundan başqa, Hüquqşünas Qadınlar Assosiasiyasının "İnsan alveri qurbanlarına hüquqi yardım" layihəsinə əsasən, rayonun ümumtəhsil məktəblərinin IX-XI sinif şagirdləri arasında "İnsan alveri mənim gözümdə" mövzusunda inşa yazı müsabiqəsi keçirilib. 2 saylı tam orta məktəbin IX sinif şagirdi Mövsümova Gülşən müsabiqədə II yeri tutub, şəhər 1 nömrəli tam orta məktəbin X sinif şagirdi Qasımova Sevinc həvəsləndirici yerə layiq görülüb və qiymətli hədiyyələrlə mükafatlandırılıb.

Bundan başqa, rayonun yüzlərlə müəllim və şagirdlərinə Qadın, Ailə, Uşaq Problemləri Komitəsinin göndərdiyi "Öz hüquqlarını bil və qoru", "Körpələri yaşamaq şansından məhrum etməyin", "İnsan alverinə birlikdə son qoyaq" adlı disklər nümayiş etdirilib, baxılan filmlərlə əlaqədar şagirdlərlə fikir mübadiləsi aparılıb.

"Gələcək nəsillərlə üz-üzə" III ümumrespublika inşa müsabiqəsində şəhər 8 saylı tam orta məktəbin şagirdi Ələkbərova Aysel I yerə, şəhər 9 saylı tam orta məktəbin şagirdi Allahyarov Ağacan II yerə layiq görülüb və qiymətli hədiyyələrlə mükafatlandırılıblar. Rayonun ümumtəhsil məktəblərində uşaqları zərərli vərdişlərdən çəkindirmək və asudə vaxtlarını səmərəli təşkil etmək məqsədilə müxtəlif mövzularda "dəyirmi masa"lar, rayon İdman Gənclər İdarəsi ilə birgə "Sağlam həyat tərzi və idman" devizi altında müxtəlif tədbirlər həyata keçirilib. Eləcə də 20 yanvar, 26 fevral Xocalı faciəsi, 31 mart Azərbaycanlıların soyqırımı günü ilə bağlı rayonun ümumtəhsil məktəblərində müxtəlif səpkili tədbirlər həyata keçirilib. Novruz bayramı münasibətilə rayonun ümumtəhsil məktəblərində bayram şənlikləri keçirilib, rayon tədbirində şəhər məktəblərinin müəllim və şagird kollektivi, uşaq bağçaları iştirak ediblər.

Bundan başqa, 1 İyun Uşaqları Beynəlxalq Müdafiə günü ilə bağlı rayon Təhsil Şöbəsi tərəfindən şənlik təşkil edilib, fənn olimpiadaları, inşa, rəsm və şeir müsabiqələri, idman və şahmat yarışlarında, respublika miqyaslı müxtəlif müsabiqələrdə fərqlənən şagirdlər fəxri fərman və qiymətli hədiyyələrlə təltif olunublar.

2010-cu ildə rayonun məktəbdənkənar müəssisələrinin uğurları da böyük olub. Uşaq Gənclər İdman Məktəbinin boks bölməsinin yetirmələri - Elnur Nəcəfov idman məktəblərinin II Respublika oyunlarında II yerə, Azərbaycan Respublikası birinciliyində Mətin İsmayılov I yerə, Azad Hüseynov və Fəxri Rəhmanov III yerə, Təhsil İdman məktəblərinin birinciliyində Elçin Nəcəfov və Azad Hüseynov I yerə, Fəxri Rəhmanov III yerə, yeniyetmələr arasında S.Süleymanovun şərəfinə həsr edilmiş boks üzrə Açıq Respublika birinciliyində Mətin İsmayılov və Elsevər Əzizov II yerə, Məhəmməd Heydərov III yerə layiq görülüblər. Bununla yanaşı "Təhsil" Respublika İdman Mərkəzinin yeniyetmələr arasında keçirilən boks üzrə Açıq Respublika birinciliyində Əzizov Elsevər və Nəcəfov Elman I yeri, Heydərov Məhəmməd III yeri tutublar. "Təhsil" Respublika İdman Mərkəzinin 1992-1993-cü il təvəllüdlü yeniyetmələr arasında keçirilən boks üzrə açıq respublika birinciliyində Hüseynov Fuad və Ağarəhimov Alxan I yeri tutaraq qızıl medala layiq görülüb, Hüseynov Vüsal isə II yeri tutub. Respublika spartakiadasında İsmayılov Mətin I yeri, Hüseynov Azad və Rəhmanov Fəxri II yeri tutublar.

2011-ci il ərzində də rayonun təhsil müəssisələrində istedadlı gənclərlə məqsədyönlü iş aparılıb, onların istedad və qabiliyyətlərinin üzə çıxarılması sahəsində işlər davam etdirilib. Rayonun ümumtəhsil məktəblərinin şagirdləri arasında 2011-ci ilin 9 ayı ərzində fənlər üzrə olimpiadanın rayon turu keçirilib. 9 nəfər şagird respublika turunda iştiraka vəsiqə alaraq mart ayında respublika turunda iştirak ediblər. Olimpiadanın respublika turunda iştirak edən şagirdlərdən 1 nəfəri III yerə, 3 nəfəri isə IV yerə layiq görülüb. 2010-/2011-ci dərs ilində 2 adda - "Ən yaxşı ümumi təhsil müəssisəsi" və "Ən yaxşı müəllim" müsabiqələri keçirilib və müsabiqə qaliblərinin sənədləri Təhsil Nazirliyinə göndərilib.

Prezident İlham Əliyevin 28 iyun 2011-ci il tarixli sərəncamı ilə Hacıqabul şəhər 5 nömrəli tam orta məktəbi 2010-2011-ci il tədris ilində keçirilmiş "Ən yaxşı ümumi təhsil müəssisəsi" müsabiqəsi qaliblərindən olub və 10000 (on min) manat məbləğində birdəfəlik pul mükafatı ilə mükafatlandırılıb. Bundan başqa, ümummilli lider Heydər Əliyevin anadan olmasının 88-ci ildönümü ilə bağlı rayonun ümumtəhsil məktəblərinin şagirdləri arasında "Heydər Əliyev və müstəqil Azərbaycan" mövzusunda rəsm müsabiqəsi keçirilib. Rayon mərhələsində müxtəlif yaş qruplarından olan şagirdlərin rəsm işlərindən 1-ci yer tutanlar respublika müsabiqəsinə göndərilib. Bundan başqa, Heydər Əliyevin anadan olmasının 88-ci ildönümünə həsr olunmuş inşa müsabiqəsinin rayon turunda I yer tutan Talış kənd tam orta məktəbin XI sinif şagirdi Nəcəfquluzadə İsmayıl respublika turuna vəsiqə alıb. O, inşa müsabiqəsində fəal iştirak edib və III yerə layiq görülüb.

2011-ci ildə də İKT-nin təhsil müəssisələrinə tətbiqi ilə bağlı xeyli iş görülüb. Dərslərdə informasiya-kommunikasiya texnologiyalarından səmərəli istifadə olunmasının təmini məqsədilə mart ayında şəhər 5 nömrəli tam orta məktəbdə "İKT-nin tətbiqi ilə nümunəvi dərs günü" keçirilib və rayonun digər ümumtəhsil məktəblərindən 50 nəfərdən çox müəllim dərslərdə iştirak edib. Aprel-may aylarında şəhər 1, 8, 9 nömrəli və Muğan qəsəbə tam orta məktəblərində də İKT-nin tətbiqi ilə bağlı "nümunəvi dərs günü" keçirilib. Həmin tədbirlərdə, bütövlükdə 150 nəfərdən çox müəllim iştirak edib.

2011-ci ildə ali və orta ixtisas məktəblərinə sənəd qəbulu internet vasitəsilə aparılıb. Bu məqsədlə şəhər 5 nömrəli tam orta məktəbdə sənəd qəbulu komissiyası təşkil olunub, ərizələrin elektron variantda qəbulu üçün hər cür şərait yaradılıb. 2011-ci ildə rayon üzrə respublikanın dövlət və özəl ali təhsil müəssisələrinə 295 nəfər sənəd verib. Onlardan 245 nəfəri məhz 2010-2011-ci dərs ilində rayonun orta məktəblərini bitirən məzunlar olmuşlar. 2010-2011-ci dərs ilində rayonun tam orta məktəblərini 454 nəfər şagird bitirib. Rayon üzrə müxtəlif ali məktəblərə 86 nəfər qəbul olunub.

Ali məktəblərə qəbulun ən yüksək göstəriciləri Rəncbər kənd tam orta məktəbində - 12 nəfər olub. Ali məktəbə qəbul olunanlardan 10 nəfəri 500-dən yuxarı bal toplayıb. Bunlar şəhər 5, 8 saylı, habelə Rəncbər, Qarasu, Qubalı, Navahı, Atbulaq kənd və Navahı qəsəbə 1 saylı tam orta məktəbləri bitirən şagirdlərdir. Ali məktəbə qəbul olunanlardan 3 nəfəri isə 600-dən yuxarı bal toplayıb. Qəbul imtahanlarında Talış kənd tam orta məktəbinin şagirdi Nəcəfquluzadə İsmayıl 672 bal toplayaraq Prezident təqaüdünə layiq görülüb. Şəhər 8 saylı humanitar fənlər təmayüllü məktəb-liseyin şagirdi Almazova Nərmin 670 bal, Rəncbər kənd tam orta məktəbin şagirdi Mənsimov Məhəmməd 619 bal toplayıb.

Rayonun ümumtəhsil məktəblərində şagirdlərin hərbi-vətənpərvərlik tərbiyəsi istiqamətində ardıcıl iş aparılıb. Böyüməkdə olan nəslin vətənə sədaqət ruhunda tərbiyə edilməsinə xüsusi diqqət yetirən Hacıqabul rayon Təhsil Şöbəsi 21-26 fevral tarixlərini hərbi-vətənpərvərlik həftəsi elan edib və bununla bağlı tədbirlər planı hazırlayaraq həyata keçirib.

Bundan başqa, rayonun ümumtəhsil məktəblərinin VII-XI sinif şagirdləri arasında "El igidləri ilə tanınar" mövzusunda inşa müsabiqəsi keçirilib. Eyni zamanda rayonun ümumtəhsil məktəblərində "Cəsurlar" və "Şahin" hərbi idman oyunlarının həm məktəb, həm də rayon turu keçirilib.

Martın 30-da rayon Təhsil Şöbəsi rayon İcra Hakimiyyəti ilə birlikdə 31 Mart Azərbaycanlıların soyqırımı günü ərəfəsində "Tarixi Azərbaycan həqiqətləri" mövzusunda elmi-praktik konfrans keçirib. Bundan başqa, 1 İyun Uşaqların Beynəlxalq Müdafiəsi Günü ilə bağlı Hacıqabul Rayon İcra Hakimiyyətinin yaxından köməkliyilə böyük bir şənlik təşkil edilib. Fənn olimpiadaları, inşa, rəsm və şeir müsabiqələri, idman və şahmat yarışlarında, respublika miqyaslı müxtəlif müsabiqələrdə fərqlənən şagirdlər fəxri fərman və qiymətli hədiyyələrlə təltif olunublar.

Hacıqabul rayon təhsil müəssisələrinin maddi-texniki bazasının möhkəmləndirilməsi istiqamətində də bir sıra işlər görülüb. 2011-2012-ci dərs ili ərəfəsində bu istiqamətdə işlər davam etdirilib. Hazırda regionların sosial-iqtisadi inkişafı Dövlət Proqramı çərçivəsində Tağılı kənd tam orta məktəbi üçün 80 şagird yerlik məktəb binasının tikintisi gedir. Bundan başqa, Kolanı kənd tam orta məktəbində əsaslı təmir işləri aparılır və məktəb üçün 60 şagird yerlik yeni korpusun tikintisinin dekabr ayında təhvil verilməsi nəzərdə tutulur. Bundan başqa, Rəncbər kənd tam orta məktəbində əsaslı təmir və bərpa-gücləndirmə işləri aparılıb, eyni zamanda həmin məktəbdə 200 şagird yerlik əlavə tədris korpusunun tikilməsinin layihə-smeta sənədləri hazırlanıb. 2 saylı "Gündüz" uşaq- bağçasında əsaslı təmir işlərinin layihə-smeta sənədləri hazırlanıb və bu günlərdə bağçada əsaslı təmir işlərinə başlanılacaq. Tikildiyi vaxtdan indiyə kimi - son 35 ildə əsaslı təmir olunmamış Atbulaq kənd tam orta məktəbinin binası Daxili İşlər Nazirliyi tərəfindən əsaslı təmir edilib.

(ardı var)

Tərlan Nəsirli

Bakı-Hacıqabul-Bakı

Mövqe.-2012.- 27 yanvar.-S.10;14.