İstedadlı məcburi köçkün gənclərə dövlət qayğısı...

Erməni təcavüzü nəticəsində öz isti yuvasından didərgin düşən uşaqlar artıq gənclik yaşındadır. Məcburiyyət qarşısında ana yurdunu tərk edən həmin uşaqlar bu gün bir gənc kimi Azərbaycan dövlətinə layiqli vətəndaş olmağa çalışır. Azərbaycan gənci öz tarixini, ulu babalarının keçdiyi həyat yolunu öyrənməli və o yolu özünə əbədi işıq seçməlidir.

Azərbaycan gənclərinin, xüsusən də istedadlı gənclərin Vətən, xalq təəssübü, torpaqlarımızı müdafiə hissi, milli şüuru başqalarına örnək olmalıdır. Azərbaycanda istedadlı gənclər çoxdur. Bu gənclərə də diqqət və qayğı özünü dövlətin ardıcıl olaraq qəbul etdiyi sənədlərdə ehtiva edir. Məsələn, bir neçə il əvvələ boylansaq görərik ki, Azərbaycan Gəncliyi Dövlət Proqramının (2005-2009-cu illər) təsdiq edilməsi haqqında Azərbaycan Respublikasının Prezidenti İlham Əliyev Sərəncam imzalayıb. Həmin sənəddə istedadlı məcburi köçkün gənclərə də dövlət qayğısının artırılması göstərilib. Sənəddə bildirilir: "Qanunda gənclər siyasətinin əsas prinsipləri öz əksini tapmış, gənclərin vətənpərvərlik, azərbaycançılıq, dövlətçilik, dünyəvilik prinsipləri əsasında, Azərbaycan xalqının tarixinə, mədəni irsinə, adət-ənənələrinə, dövlət dilinə və rəmzlərinə, milli-mənəvi və ümumbəşəri dəyərlərə hörmət ruhunda tərbiyə olunması, onların yaradıcılıq potensialının ölkənin inkişafına və ümummilli problemlərin həllinə səfərbər olunması, hüquq və azadlıqlarının hər hansı şəkildə məhdudlaşdırılmasının yolverilməzliyi əsas istiqamətlər kimi müəyyənləşdirilmişdir. Son illər həyata keçirilən tədbirlər gənclərin hərtərəfli inkişafının təmin olunması üçün siyasi, sosial-iqtisadi, təşkilati-hüquqi şərait və təminatların yaradılmasını sürətləndirmiş, onların ictimai-siyasi fəallığının artmasına kömək etmişdir. Eyni zamanda bu sahədə hələ də öz həllini gözləyən bir sıra məsələlər mövcuddur. Yeniyetmə və gənclərin vətənpərvərlik və vətəndaşlıq tərbiyəsinin daha da gücləndirilməsi, gənclərin məşğulluğunun təmin edilməsi, onların sahibkarlıq fəaliyyətinə kömək göstərilməsi, sosial problemlərinin həlli, yaradıcı və istedadlı gənclərə, gənc ailələrə dövlət qayğısının artırılması, o cümlədən onların mənzil şəraitinin yaxşılaşdırılması, gənclərin dövlət quruculuğu işlərinə geniş cəlb olunması və bu kimi məsələlər dövlət gənclər siyasəti çərçivəsində bir sıra tədbirlərin həyata keçirilməsini zəruri edir".

Məlumdur ki, sözügedən dövlət aktının 3.21 bəndində qaçqın və məcburi köçkün gənclərin yaradıcılıq festivalının keçirilməsi, qaçqın və məcburi köçkün gənclərin asudə vaxtının səmərəli təşkil edilməsi, onlar arasında yaradıcı gənclərin aşkar edilməsi və qabiliyyətlərinin inkişaf etdirilməsi barədə Gənclər və İdman Nazirliyinə, Mədəniyyət və Turizm Nazirliyinə, eləcə də Qaçqınların və Məcburi Köçkünlərin İşi üzrə Dövlət Komitəsinə müfaviq tapşırıqlar verilib. Bilirik ki, artıq bu Dövlət Proqramının icrası bir neçə il əvvəl başa çatıb və bu illər ərzində bir sıra yaradıcılıq festivalları, müsabiqələr, qaçqın və məcburi köçkün gənclərin əl işlərindən ibarət sərgilər təşkil olunub. Bundan başqa, neçə-neçə məcburi köçkün gəncin kitabları nəşr edilib.

Qeyd edək ki, Azərbaycanda qaçqın və məcburi köçkün gənclər Azərbaycan dövlətindən və ictimai təşkilatlardan gördükləri isti münasibəti minnətdarlıqla qarşılayır. Bilirik ki, Azərbaycan Respublikasının "Gənclər Siyasəti Haqqında" Qanununda da, eyni zamanda digər sənədlərdə də gənclərlə bağlı bütün məsələlər qaçqın və məcburi köçkün gənclərə də şamil edilir. Azərbaycan dövləti qaçqın və məcburi köçkün gənclərin milli mənlik şüuruna sahiblənməsi, onlarda vətənpərvərliyin inkişafı, habelə bu gənclərin yüksək təhsil alması üçün şərait yaradır. Bu da bəllidir ki, qaçqın və məcburi köçkün gənclərin dövlət hesabına xaricdə təhsil almaq imkanları da genişlənib. Yadınıza salaq ki, Azərbaycan Respublikasının Prezidenti İlham Əliyev 2011-ci il 14 sentyabr tarixində "Dövlət ali və orta ixtisas müəssisələrində ödənişli formada təhsil alan məcburi köçkünlərin təhsil haqqı ödəməsindən azad edilməsi haqqında" Azərbaycan Respublikası Prezidentinin 2003-cü il 4 avqust tarixli, 1308 nömrəli Sərəncamına dəyişiklik edilməsi haqqında Sərəncam imzalayıb. Bu sənədə əsasən, məcburi köçkün statusu olan ölkə vətəndaşlarının təhsil aldıqları müddətdə təhsil haqqları dövlət büdcəsinin vəsaitilə ödənilir. Bilirik ki, dövlətin üç il əvvəl qəbul etdiyi bu sənəd artıq icra olunur və qaçqın və məcburi köçkün ailələri onu rəğbətlə qarşılayır. Təbii, bu böyük qayğılar içində yaşayan qaçqın və məcburi köçkün ailələrinin yükünü yüngülləşdirib.

Əslən Xocavənd rayonundan olan tarix müəlliməsi Brilliant Allahverdiyeva bizimlə söhbətində bildirdi ki, Azərbaycan dövləti qaçqın və məcburi köçkün gənclərə böyük qayğı göstərir. Bu qayğı da o gəncləri milli vətənpərvərlik ruhunda yetişməsinə, milli mənlik şüuruna bağlı olmasına, tariximizi öyrənməsinə, dövlətimizi, dövlətçiliyimizi sevməsinə və ona xidmət etməsinə səbəb olur. Onun sözlərinə görə, qaçqın və məcburi köçkün rayonlarının gənclərinə milli vətənpərvərlik hissi hər gün təlqin edilir. Brilliant xanımın dediyinə görə, Xocavənd rayon rəhbərliyi, aidiyyəti qurumlar gənclərin tərbiyəsinə xüsusi fikir verir: "Ölkəmizdə son illər görülən işlər gənclərin hərtərəfli inkişafının təmin olunması üçün siyasi, sosial-iqtisadi, təşkilati-hüquqi şərait və təminatların yaradılmasını sürətləndirib, onların ictimai-siyasi fəallığının artmasına kömək edib. Yaradıcı və istedadlı gənclərə, gənc ailələrə dövlət qayğısının artırılması, gənclərin məşğulluğunun təmin edilməsi, onların sahibkarlıq fəaliyyətinə kömək göstərilməsi, asudə vaxtının səmərəli təşkili, gənclərin dövlət quruculuğu işlərinə geniş cəlb olunması, fiziki tərbiyəsi və bu kimi digər məsələlər dövlətin gənclərə böyük önəm verməsindən irəli gəlir".

Onun dediyinə görə, Xocavənd Rayon Gənclər və İdman İdarəsi fəaliyyəti dövründə gənclərin maraqlarına, mənafe və ehtiyaclarına uyğun tədbirlər keçirir. O deyir ki, idarə gənclərlə iş, bədən tərbiyəsi və idman sahələrində dövlət siyasətinin əsas istiqamətlərinə uyğun olaraq bir çox tədbirlər həyata keçirib və keçirməkdə davam edir: "İdman və bədən tərbiyəsinə daha geniş kütlələrin cəlb edilməsi, gənclərin mənəvi-əxlaqi tərbiyəsinin gücləndirilməsi, yaradıcılıq qabiliyyətinin inkişaf etdirilməsinə, ictimai-siyasi fəallığının artmasına kömək göstərilməsi, fiziki tərbiyəsi üçün müvafiq imkanlar yaradılması, onlarda vətənpərvərlik və Azərbaycan dövlətçiliyinə sədaqət hisslərinin yüksəldilməsi və bu kimi digər məsələlər idarənin diqqət mərkəzində olub.

İdarə yeniyetmə və gənclərin Vətənə məhəbbət, Azərbaycan xalqının tarixinə, milli-mənəvi dəyərlərinə hörmət ruhunda tərbiyə olunması, onların hərbi xidmətə hazırlıq səviyyəsinin yüksəldilməsi, Azərbaycanın görkəmli sərkərdələrinin, Milli Qəhrəmanların, Vətənimizin müdafiəsi zamanı şücaət göstərmiş vətəndaşların gənclərə tanıtdırılması, xalqımızın ümummilli lideri Heydər Əliyev ideyalarının gənclər arasında təbliğ edilməsi, gənclərin mənəvi-əxlaqi tərbiyəsinin gücləndirilməsi istiqamətlərində geniş tədbirlər həyata keçirib. Bu illər ərzində yeniyetmə və gənclərin iştirakı ilə Azərbaycanın tarixində mühüm əhəmiyyət kəsb edən əlamətdar günlər, bayramlar təntənəli şəkildə qeyd olunub, xalqımızın yaddaşında dərin izlər buraxmış 20 Yanvar, 31 Mart, Xocalı və Qaradağlı soyqırım və faciələrinin ildönümlərinə həsr olunmuş anım mərasimləri, toplantılar keçirilib, orta ümumtəhsil məktəblərində fotosərgilər, ədəbi-bədii kompozisiyalar, bir sıra hadisələrin canlı şahidləri ilə yeniyetmə və gənclərin görüşü təşkil olunub. Bu tədbirlər zamanı azadlıq və müstəqillik uğrunda mübarizə tariximizə nəzər salınmış, Azərbaycanın suverenliyi, ərazi bütövlüyü uğrunda canlarını fəda etmiş insanların əziz və unudulmaz xatirələri yad edilib, erməni təcavüzkarlarının azərbaycanlılara qarşı törətdikləri cinayətlər barədə yeniyetmə və gənclərə ətraflı məlumatlar verilib, onlara xalqımızın tarixini yaddan çıxarmamaq, bu şərəfli mübarizə tarixi ilə həmişə qürur duymaq, Vətənə gərəkli vətəndaşlar kimi yetişmək, milli-mənəvi dəyərlərimizə, adət-ənənələrimizə həmişə hörmət bəsləmək tövsiyə olunub".

B.Allahverdiyeva bildirdi ki, Azərbaycan Respublikasının Gənclər və İdman Nazirliyi tərəfindən "Azərbaycan Gəncliyi Dövlət Proqramına (2005-2009-cu illər)" uyğun olaraq keçirilən qaçqın və məcburi köçkün uşaq və gənclər arasında yaradıcılıq festival-müsabiqələrində xocavəndli istedadlar həmişə fərqlənib: "Məqsədi qaçqın və məcburi köçkün uşaq gənclərin yaradıcılıq qabiliyyətinin daha da artırılması və asudə vaxtının səmərəli təşkil olunmasından ibarət olan festival-müsabiqələr yaradıcılığın 3 növü - rəsm sənəti və dekorativ tətbiqi sənət, musiqi sənəti, şeir sənəti üzrə keçirilib.

2006-cı ilin noyabr ayında keçirilən "Qaçqın və məcburi köçkün yeniyetmə və gənclər arasında I Respublika yaradıcılıq festival-müsabiqəsi"nin final mərhələsində musiqi sənəti (17-25 yaş) üzrə Qurbanov Mircəfər Mircəlal oğlu uğurlu çıxış edərək 1-ci yerə layiq görülüb. 2007-ci ilin oktyabr ayında keçirilən II Respublika müsabiqəsinin final mərhələsində isə şeir sənəti (12-16 yaş) üzrə Salakətin kənd orta məktəbinin şagirdi Həşimov Elmin Füzuli oğlu 2-ci yeri tutaraq diplomla təltif olunub, qiymətli hədiyyə ilə mükafatlandırılıb.

19-21 oktyabr 2009-cu il tarixdə keçirilən "Qaçqın və məcburi köçkün uşaq və gənclər arasında III yaradıcılıq festival-müsabiqəsi"nin yekun mərhələsində Xocavənd 4 saylı orta məktəbinin şagirdi Abdullayeva Sevil İlqar qızı I yaş kateqoriyası (12-18) şeir sənəti nominasiyasında I yerə, yenə də həmin yaş kateqoriyası üzrə şeir nominasiyasında Salakətin kənd orta məktəbinin şagirdi Qədimli Zinarə Səfər qızı III yerə, II yaş kateqoriyası (19-25) üzrə rəsm sənəti nominasiyasında Cahangirov Tural Ramiz oğlu III yerə sahib oldular. Qaliblər və fərqlənənlər Gənclər və İdman Nazirliyinin diplomları ilə təltif olunub, qiymətli hədiyyələrlə mükafatlandırılıb. Uşaqların uğurları çoxdur. Bütün bu uğurların başında milli şüurun inkişaf etdirilməsi, vətənpərvərlik hisslərinin yüksəldilməsi durur. Bizim gənclər çox istedadlı və vətənpərvərdir".

İradə SARIYEVA

Bakı xəbər.-2014.-22 yanvar.-S.15.