Göyçay iqtisadi rayonu sürətli inkişaf yolundadır

LAYİHƏNİN İSTİQAMƏTİ: “Regionların sosial-iqtisadi inkişafının təşviq edilməsi”

İnkişaf dinamikası get-gedə daha mütəhərrik hala gələn müasir Azərbaycanda sosial-iqtisadi sferada əldə olunan nailiyyətlərin miqyası mütəmadi olaraq genişlənməkdədir. Bu hal ölkə üzrə müəyyən olunmuş iqtisadi rayonlar üzrə də özünü qabarıq formada büruzə verir. Sözügedən sürətli tərəqqinin əsas ünvanlarından biri də Göyçay rayonudur.

Ötən ilin sosial-iqtisadi yekunları da burada dinamik tərəqqidən xəbər verir. Belə ki, ötən il ümumi məhsul buraxılışının həcmi 2,5 faiz artaraq 215,1 milyon manat olub. Sosial və iqtisadi sahələrin inkişafı üçün bütün maliyyə mənbələrindən əsas kapital 38,7 milyon manat investisiya yönəldilib. Tikinti quraşdırma işlərinə sərf olunan vəsaitin həcmi əvvəlki illə müqayisədə 3,7 faiz artıb. İnvestisiyanın 90 faizi istehsal təyinatlı obyektlərin tikintisinə sərf olunub. Hesabat ilində kənd təsərrüfatında ümumi məhsul istehsalının həcmi 2,7 faiz artaraq 91,4 milyon manata yüksəlib.

Göyçay rayonunda meyvəçilik və tərəvəzçiliklə məşğul olan fermerlər və fərdi təsərrüfat sahibləri ötən il bol məhsul əldə ediblər. Ötən il rayonda 1132 hektar sahədən 27 min 731 ton tərəvəz, 5205 hektar meyvə bağından isə 65 min 598 ton məhsul tədarük olunub. İstehsal olunan meyvə-tərəvəz məhsullarının 65 faizi Rusiya bazarlarına göndərilib, qalanı isə Göyçayda yerli əhaliyə və ölkəmizin müxtəlif bölgələrində satılıb.

2012-ci ildə quruculuq-abadlıq işləri də davam etdirilib. Heydər Əliyev və M.Ə.Rəsulzadə prospektlərində çoxmərtəbəli yaşayış binalarının fasad hissələri müasirləşdirilib, dam örtükləri dəyişdirilib. Regionların sosial-iqtisadi inkişafı Dövlət Proqramına uyğun olaraq Göyçay rayonunda məktəb və uşaq bağçaları üçün yeni binaların inşası və ya onların əsaslı təmiri, maddi-texniki bazanın gücləndirilməsi istiqamətində mühüm işlər görülür. Təhsil Nazirliyinin sifarişi ilə hazırda rayonun Ulaşlı-Şıxlı kənd məktəbi üçün 220 və Şəkili kənd məktəbi üçün 80 yerlik yeni binanın inşası sürətlə davam etdirilir. Artıq binaların hörgü işləri başa çatdırılıb, dam örtüyü, qapı-pəncərələr quraşdırılıb. Məktəb binalarının yeni dərs ilində istifadəyə verilməsi nəzərdə tutulur.

Qeyd edək ki, bu il Göyçayın Çərəkə və Ləkçiplaq kəndlərində 360 yerlik yeni məktəb binaları tikilib, 70 yerlik Göyçay şəhər 12 nömrəli uşaq bağçasının ikimərtəbəli binası əsaslı təmir olunaraq istifadəyə verilib. Son illər regionların sosial-iqtisadi inkişafı Dövlət Proqramı çərçivəsində və Heydər Əliyev Fondunun təşəbbüsü ilə Göyçayda 9 yeni məktəb binası istifadəyə verilib, 8 təhsil ocağı əsaslı şəkildə yenidən qurulub. Göyçay rayonunda müasir istilik sistemi ilə qızdırılan orta məktəb binalarının sayı ildən-ilə artır.

Hər il Göyçayda yeni inşa edilən və ya əsaslı təmir olunan məktəb binalarında müasir istilik sistemləri quraşdırılır. Bu günədək rayonun 18 məktəbində müasir tipli qazanxana, yeni istilik sistemi inşa edilib. Qış mövsümünə hazırlıqla əlaqədar həmin məktəblərin qazanxanalarında cari təmir işləri görülüb.

Müasir istilik sistemi quraşdırılmayan 39 məktəbdə isə odun sobalarından istifadə olunur. Rayon təhsil şöbəsinin daxili imkanları hesabına həmin məktəblərə yeni odun sobaları və tüstü boruları, 1000 kubmetr odun alınaraq paylanılıb. Hazırda rayonun orta ümumtəhsil məktəblərinin binalarında istilik sarıdan heç bir problem yoxdur. Bu da şagirdlərin dərsə davamiyyətinə müsbət təsirini göstərir. Bundan əlavə, soyuq qış aylarında sinif otaqları qızdırılan zaman istiliyin itməməsi üçün bütün məktəb binalarında qapı və pəncərələr, dam örtükləri təmir edilib. Rayonun orta ümumtəhsil müəssisələrində baş verə biləcək yanğın hadisələrinin qarşısını almaq məqsədilə profilaktik tədbirlər görülüb. Məktəblərdə olan su hovuzları qaydaya salınıb, təhsil müəssisələri yanğına qarşı avadanlıqla təmin olunub.

Göyçay rayonunda uşaq bağçası üçün yeni bina inşa edilir.

Şəhər 1 saylı uşaq bağçası üçün yeni binanın inşasında hörgü işləri başa çatdırılıb, dam örtüyünün quraşdırılması həyata keçirilib. Bağçada müxtəlif yaşlı uşaqlar üçün hazırlıq qrupları, yataq otaqları, mətbəx, musiqi və idman zalı, tibb otağı fəaliyyət göstərəcəkdir. Eyni vaxtda 40 uşağın təlim-tərbiyə alması üçün körpələr evi zəruri avadanlıqla təmin olunacaq, orada uşaqların dünyagörüşünün artırılması, sağlamlığının qorunması üçün nümunəvi şərait yaradılacaqdır. Bağçanın həyətyanı ərazisində isə uşaq əyləncə qurğuları quraşdırılacaq, yaşıllıq salınacaq, asfalt örtüyü döşənəcəkdir. Xatırladaq ki, 70 yerlik Göyçay şəhər 12 saylı uşaq bağçası əsaslı təmirdən sonra istifadəyə verilib.

Göyçay Rayon İcra Hakimiyyətinin sifarişi ilə Gənclər Evinin tikintisi sürətlə davam etdirilir.

Gənclərin asudə vaxtının səmərəli təşkili üçün nəzərdə tutulan binanın birinci mərtəbəsinin daş-hörgü işləri başa çatdırılıb. İnşaat işlərini "ATF-İnşaat” MMC-nin tikinti briqadası həyata keçirir və Gənclər Evinin bu ilin yayında istifadəyə verilməsi nəzərdə tutulur.

Ümumi sahəsi 1300 kvadratmetr olacaq ikimərtəbəli binada konfrans və "dəyirmi masa”ların keçirilməsi üçün zallar, internet klub, stolüstü oyunlar üçün otaqlar, trenajor zalı, kitabxana, xalçaçılıq, rəsm və musiqi dərnəkləri, diskoteka fəaliyyət göstərəcək.

Göyçay şəhərində dövlət bayrağı meydanı da inşa edilib. Ötən ilin iyununda şəhərin mərkəzində tikintisinə başlanılan meydanda Azərbaycanın dövlət bayrağının ucaldılması üçün 30 metr hündürlüyündə dirək quraşdırılıb, bayrağın səkkizguşəli postamenti qranitlə üzl

"ATF-İnşaat” MMC-nin briqadası tərəfindən bir hektara yaxın ərazidə həyata keçirilən tikinti işləri zamanı meydanın ərazisinə tamet plitələr döşənmiş, dekorativ gül kolları və ağaclar əkilib. Orada rayon sakinlərinin istirahəti üçün oturacaqlar qoyulub, işıqlandırma sistemi quraşdırılıb. Meydanda mədəni-kütləvi tədbirlərin keçirilməsi üçün açıq səhnə və rəngli işıqlandırma sistemi də quraşdırılıb.

Göyçay şəhərində əhalinin su təchizatının yaxşılaşdırılması, kanalizasiya sisteminin yenidən qurulması işlərinin ikinci mərhələsi uğurla davam etdirilir

"Azərsu” ASC-nin sifarişi ilə şəhərin şimalında 2 min kubmetr tutumu olan iki su anbarı tikintisi başa çatdırılıb. Bundan əlavə, hazırda su anbarından şəhərə 530 millimetrlik daşıyıcı boru xətti, şəhərdən Şəhadət kəndinə 800 millimetrlik kanalizasiya boru xətti çəkilir.

Tikinti-quraşdırma işlərini beynəlxalq tenderdə qalib gələn Türkiyənin "Atinak” şirkəti həyata keçirir. Şirkətin işçiləri şəhərin Nizami, Əli Kərim, M.Hüseynzadə, H.Z.Tağıyev, Ü.Hacıbəyli, M.F.Axundov, R.Rza küçələrində yeraltı su və kanalizasiya xətlərinin çəkilişini başa çatdırıblar.

Hazırda digər küçələrdə bu istiqamətdə iş gedir. Şəhərin 48 küçəsində bu işlərin görülməsi nəzərdə tutulub. Tikintiyə Şəhərin su təchizatı şəbəkəsinin yenidən qurulması başa çatdıqdan sonra mənzillər sayğaclarla təmin olunacaqdır.

Şəhərin şimalında daha bir 2 min tonluq su anbarının inşası, Potu kəndində 500 kubmetrlik yeni su anbarının tikilməsi və bir artezian quyusunun qazılması nəzərdə tutulur.

Layihənin ikinci mərhələsinə ötən ilin yanvarında başlanılmış və bugünədək müxtəlif diametrli borularla 54 min metr uzunluğunda su, 50 min metr uzunluğunda kanalizasiya xətti çəkilib. İşlərin bu ilin yayında başa çatdırılması nəzərdə tutulur.

Layihənin birinci mərhələsi çərçivəsində rayonun Potu kəndində 4 artezian quyusu qazılıb, 5,8 kilometr uzunluğunda daşıyıcı su kəməri, nasos stansiyası və 500 kubmetrlik ötürücü su anbarı tikilib, transformator quraşdırılıb. Həmçinin suyun keyfiyyətinin öyrənilməsi üçün laboratoriya binası və xlorator məntəqəsi tikilib. Bundan əlavə, Göyçay şəhərində rayonun su-kanal idarəsi üçün ikimərtəbəli yeni inzibati bina inşa olunub, avtomobillərin və texniki qurğuların təmiri və bərpası üçün istehsalat bazası tikilib, şəhərdəki çoxmərtəbəli yaşayış binalarında daxili su-kanalizasiya sistemi yenidən qurulub.

9 kənddə qazlaşdırma işləri aparılıb. Kürdəmiş və Türkmən kəndləri mavi yanacaqla təmin olunub. Hazırda rayonun ən böyük yaşayış məntəqəsi olan Bığır kəndində qaz xəttinin çəkilişi uğurla davam etdirilir. Yaxın vaxtlarda mənzillərdə sayğacların quraşdırılması və 1.139 abonentin "mavi yanacaq”la təmin edilməsi nəzərdə tutulub.

Bu günədək Qubadlı-Şıxlı və Cəyirli kəndlərinə magistral və daxili qaz xətləri çəkilib. Yaxın vaxtlarda Cəyirlidə 443, Qubadlı-Şıxlıda 172, Qarayazıda 403 abonentə "mavi yanacağ”ın verilməsi gözlənilir.

Hazırda rayonun Potu, Kürd və Ulaşlı Şıxlı kəndlərində mövcud olan metal qaz xətləri yeraltı polietilen borularla əvəz edilir. Ümumiyyətlə, son bir ildə rayonun 8 kəndində əhalinin təbii qazla təmin edilməsi üçün 92 min 100 metr müxtəlif diametrli yeraltı polietilen borularla qaz xətti çəkilib. Bu il rayonun daha 33 kəndinin qazlaşdırılması nəzərdə tutulub.

Bu gün Göyçay şəhərində və 15 kənddə 12 min 653 abonent təbii qazdan istifadə edir.

Ötən il Göyçayda 712 daimi iş yeri açılıb. Onlar əsasən təhsil və səhiyyə ocaqlarında, topdansatış və xidmət obyektlərində, emal və sənaye müəssisələrində, maliyyə, sığorta, elektrik, təbii qaz və tikinti sahəsində işlə təmin olunublar. Digər sahələrdə də dinamik tərəqqi qeydə alınır.

Elşən BAYRAMOV

Mövqe.-2013.-27 fevral.-S.10.