Azərbaycan İslam həmrəyliyində aparıcı rol oynayır

Bəşəri ideyaları ehtiva edən humanist arzular insanları birləşdirir

Qloballaşma dövründə ksenofobiyanın güclənməsi mədəniyyətlər və dinlər arasında münasibətlərin kəskinləşməsi ilə dünyanı təhlükəyə sürükləyir. Bu meyl dünyada sülhün və sabitliyin pozulmasında maraqlı olan radikal, terroçu qüvvələr tərəfindən dəstəklənir. Bu təhdidin qarşısını almaq üçün tolerantlığın, dialoqun, sülhün və həmrəyliyin gücləndirilməsi böyük əhəmiyyət daşıyır. Bu mənada Azərbaycanın göstərdiyi fəaliyyət əvəzedilməzdir və digər müsəlman dövlətləri tərəfindən dəstəklənir.

Bu gün İslam ölkələrinin ictimai-siyasi həyatında baş verən hadisələr dövrün gərginliyinə dəlalət edir. Ermənistanın hərbi təcavüzü nəticəsində Azərbaycanın əzəli torpağı olan Dağlıq Qarabağ və ətraf rayonlarda yaşayan soydaşlarımız doğma yurdlarından didərgin düşüb. Əfqanıstanda hökumət və xaricdən dəstək alan terrorçu qruplar arasında tez-tez qanlı toqquşmalar baş verir. Suriyada yenə xarici qüvvələrin birbaşa təsiri və iştirakı ilə müharibə gedir. İraq 15 ildir ki, müharibənin caynağından qurtula bilmir. Burada da xarici dövlətlərin dəstəklədiyi terrorçu qruplar tüğyan edir. Bir vaxtlar var-dövləti ilə öyünən Liviyada indi beynəlxalq tədbirdə iştirak üçün vəsait tapılmır. Səbəb yenə də xarici təsirlər nəticəsində baş verən müharibələrin iqtisadiyyatı viran qoymasıdır. Bütün bu dəhşətli faktlar fonunda İslam ölkələrinin sülh arzusunun nə qədər önəmli olduğu ortaya çıxır. Bu nəcib və zəruri arzunun gerçəklənməsi üçünsə artıq hərəkətlilik tələb olunur.

Şərq ilə Qərb mədəniyyətlərinin qovuşuğunda yerləşən Azərbaycan insanlıq və mədəniyyət adına çox dəyərli işlər görür. Azərbaycan həm türk, həm də İslam mədəniyyətinə əvəzsiz töhfələr vermiş dövlətdir. Müstəqilliyini bərpa etdikdən sonra Azərbaycan sülh çağırışları ilə bütün dünyada uğurlu addımlar atıb. İslam Həmrəylik Oyunları bu yolda atılan növbəti addımdır. Çünki, həmrəylik oyunları ayrı-seçkiliyə, irqçiliyə, müharibələrə qarşı dəyərli töhfədir.

Qazaxıstanın Azərbaycandakı səfiri Beybit İsabayevin sözlərilə desək, dünyəvi dövlət olan Azərbaycan İslam həmrəyliyində aparıcı rol oynayır. Azərbaycanın sülhə və dinlər arasında dialoqa töhfəsi çox böyükdür. Qazaxıstan kimi digər İslam dövlətləri də bu mövqedən çıxış edərək həmrəyliyi və sülhü müdafiə etdiklərini, dünyada əmin-amanlığa can atdıqlarını bəyan edirlər. 2017-ci ilin Azərbaycanda “İslam Həmrəyliyi İli” elan edilməsi bütün müsəlman dövlətləri tərəfindən “qlobal sülhyaratma prosesi” kimi dəyərləndirilir.

İslam Əməkdaşlıq Təşkilatı Parlament Birliyinin baş katibi Mahmud Erol Kılıçın fikrincə, terrorizmə və ekstremizmə qarşı bütün dinlərin birgə hərəkət etməsi vacibdir. 57 ölkəni birləşdirən İƏT İslam anlayışının bütün İslam dünyasına yenidən sirayət etməsini və Azərbaycanın sülh təşəbbüslərini dəstəkləyir. İran İslam Respublikasının sabiq xarici işlər naziri Mənuçöhr Mottəki bildirir ki, İslam dini sülh dinidir, terrorizmdən çox uzaqdır. Onun fikrincə, hazırda dünya İslam adı altında bir sıra terror fəaliyyətləri ilə üzləşir: “Biz real, birgəyaşayışı təbliğ edən İslamı dünya birliyinə nümayiş etdirməliyik”.

İslam Həmrəyliyi Oyunları məhz İslamın sülhsevət mahiyyətini bütün dünyaya bir daha tanıdır və əslində bu dinə iman gətirənlərin ümumi arzularını ifadə edir. IV İslam Həmrəylik Oyunlarının açılış mərasimində geniş reportajlar hazırlayan dünya KİV-ləri, xüsusilə də ərəb ölkələrinin jurnalistləri yazıblar ki, açılış mərasimi əsl idman bayramına çevrilib. Nümayiş etdirilən slayd və obrazlarda Azərbaycan İslam sivilizasiyasının sanballı nailiyyətlərini və inkişaf mərhələlərini, Azərbaycanın İslam dünyasının tarixi və ənənələri ilə qırılmaz tellərlə bağlı olduğunu əks etdirib. Azərbaycan İslamiada keçirməklə, möhtəşəm və yaddaqalan açılış mərasimi ilə İslam Əməkdaşlıq Təşkilatının üzvü olan ölkələr arasında və bütün planetimizdə birlik, harmoniya, qarşılıqlı anlaşma, sülh və həmrəylik çağırışı ilə dünyaya ismarıc göndərib. Bütün bunlar onu göstərir ki, İslamiada müsəlman dünyasının sülh və əmin amanlıq arzularının təcəssümüdür. Yarış meydanında olan rəqabət isə sağlam həyat tərzinə, xalqlar arasında dostluq və birliyin möhkəmlənməsinə xidmət edən təsirli vasitədir.

N.NOVRUZ

Mövqe.- 2017.- 18 may.- S.14