Turizm sənayesində yeni inkişaf mərhələsi başlanır

Bu sahədə potensial güclü, gəlirlər stabildir

2019-cu ilin yanvar-oktyabr ayları ərzində Azərbaycana səyahət edənlərin sayı ötən ilin eyni dövrü ilə müqayisədə 10.9% və ya 264 min nəfər artaraq təqribən 2.7 milyona çatıb. Nəsərə alınsa ki, 2017-ci il ərzində Azərbaycana dünyanın 187 ölkəsindən 2696,7 min və 2018-ci ildə dünyanın 196 ölkəsindən 2849,6 min nəfər turist gəlib, onda bu ilin sonuna turistlərin sayının 3 milyon nəfəri ötəcəyini söyləmək olar. Təkcə keçən il ölkəmizə gələnlər 2 milyard dollara yaxın pul xərcləyiblər.

İndi ölkədə qış turizminə start verilib. Qış fəslində ölkəmizə maraq göstərən turistlərin sayında da artım müşahidə olunur. Belə ki, turizm potensialının tam realizə edilməsi məqsədilə həyata keçirilən tədbirlər öz nəticəsini verib. Azərbaycana maraq göstərən turistlərin sayı ildən-ilə artır.

Bir neçə il əvvəl qış turizm bazasının yaradılması turizm sənayesində mövsümçülük anlayışını aradan qaldırıb. İndi ölkəmizdə mövsüm boyu davamlı turizm üçün hər cür şərait var. “Şahdağ” Qış-Yay Turizm Kompleksinin yaradılması Azərbaycanın qış turizminin inkişafında uğurlara gətirib çıxarıb. Qusar rayonunun mərkəzindən 32 kilometr məsafədə “Şahdağ” Milli Parkının ərazisində yerləşən “Şahdağ” Qış-Yay Turizm Kompleksi müasir tələblərə cavab verir. Kompleksin ərazisi ekoloji təmizliyi, flora və faunasının zənginliyi ilə seçilir. Turizm obyekti dəniz səviyyəsindən 1300-2300 metr yüksəklikdədir. Turizm kompleksinin əsas hissəsi isə, dəniz səviyyəsindən 1440-1640 metr yüksəklikdəki yaylaqda yerləşir. Azərbaycanda və ümumiyyətlə, dünyada ən mükəmməl layihələrdən biri olan “Şahdağ” Qış-Yay Turizm Kompleksi oxşar istirahət mərkəzlərindən bənzərsizliyi ilə fərqlənir. Bu layihənin reallaşdırılması respublikamızda dağ-xizək idmanı və digər qış idman növlərinin inkişafı üçün hərtərəfli imkanlar açıb. Azərbaycan tarixində ilk dağ-xizək kurortu olan “Şahdağ” Qış-Yay Turizm Kompleksinə daxil olan “Qaya” və “Zirvə” mehmanxanalarının açılışı turistlərin istirahətinə geniş imkanlar yaradıb.

Bu sırada Qəbələ şəhərinin turizm mərkəzlərinin də işini qeyd etmək gərəkdir. Bu səfalı diyarın qış aylarında füsunkar mənzərələrə sahib olması xarici qonaqları cəlb edir. Eyni zamanda cənub bölgəsinin də turizm imkanları kifayət qədər genişdir. Azərbaycanın qonaqpərvərliyi, tolerantlığı, turizm infrastrukturunun yaradılması və yeni otellərin inşası turistləri cəlb edir. Digər amillərindən biri də, məhz ölkədə hökm sürən ictimai-siyasi sabitlikdir. Bu baxımdan, Azərbaycan saysız turistləri qarşılamaq və lazımi səviyyədə yerləşdirmək imkanına malik olan turist ölkəsidir. Lənkəran şəhərinə keçən ilin qışında 30 min nəfər turist gəlib. Artım tendensiyasını nəzərə alsaq, yeni ilə qədər bu diyara gələnlərin də çox olacağını demək olar.

Yeni il tətilini tam fərqli abu-havada qarşılamaq istəyənlər üçün hər il paytaxtda və regionlarda, xüsusilə də qış turizmi mərkəzlərində xüsusi bayram şənlikləri təşkil olunur. Bayram tətilini əsl qış mühitində, qarlı dağların əhatəsində və təmiz dağ havasında keçirmək istəyənlər üçün isə, Şahdağ ideal məkan olduğundan, buraya üz tutan turistlərin sayı həmin dövrdə lap çox artır. Yeni il tədbirləri qonaqlara əsl bayram əhval-ruhiyyəsi yaşadaraq, onlarda maraqlı və unudulmaz təəssüratlar yaradır. Məsələn, ötən ilin sonunda yeni il şənliyini keçirmək üçün təkcə “Şahdağa”a 16000-dən çox turist gəlib. Onlardan 40 %-dən çoxu, məhz xizək sürmək üçün mərkəzə üz tutan xizək həvəskarları olub. Yeni il bayramı günlərində xaricə gedən azərbaycanlıların sayı azalıb, Azərbaycana gələn turistlərin sayı isə artıb. Azərbaycan vətəndaşlarının çoxu ölkəmizin regionlarında - Quba, Qusar, Qəbələ və Lənkəranda istirahət ediblər. Bütün bunlar bu ilin payına düşən turistlərin sayının 3 milyonu keçəcəyinə böyük inam yaradıb.

N.NOVRUZ

Mövqe.- 2019.- 23 noyabr.- S.14