Azərbaycanın möhtəşəm uğurlarının böyük memarı

Dünya siyasətində cahanşümul əməlləri ilə tanınan Heydər Əliyev şəxsiyyəti bütün zamanlar üçün müdriklik rəmzidir

XX-XXI əsr tariximizin əvəzedilməz şəxsiyyəti olan Ümummilli Lider Heydər Əliyevin siyasi portreti xalqımızın dövlətçilik təfəkkürünün canlı təcəssümüdür. Dahi Heydər Əliyevin həyat fəaliyyətinin hər bir anı müdriklik qibləgahı kimi insanlara, cəmiyyətlərə yol göstərir, kütlələri uğurla gələcəyə aparan istiqamətə yönəldir. Ulu Öndər Heydər Əliyevin yaratdığı Azərbaycan daim irəliləyən, iqtisadi, sosial, humanitar və mədəni sahələrdə inkişaf edən, hər addımda insan və şəxsiyyət amilini uca tutan ölkə imicini qazanıb.

Hələ sovet dövründə Azərbaycanın taleyi Heydər Əliyev şəxsiyyətinə bağlı olub. Ümummilli liderin zəngin siyasi və dövlətçilik irsi müstəqil Azərbaycan dövlətinin inkişaf və tərəqqisi, indiki və gələcək nəsillərin fəaliyyəti üçün əvəzolunmaz sərvət, milli qürur və iftixar mənbəyidir. Təsadüfi deyil ki, Ümummilli lider Heydər Əliyevin müdrik rəhbərliyi, həyata keçirdiyi düşünülmüş, məqsədyönlü tədbirləri hesabına 1969-1982-ci illər Azərbaycanın intibah dövrü kimi tarixə çevrilib. XX əsrin 70-80-ci illəri Azərbaycanın ictimai-siyasi, sosial-iqtisadi və mədəni inkişafında özünəməxsus və spesifik xüsusiyyətləri ilə səciyyələnən mühüm bir tarixi zaman kəsiyidir. Bu dövrdə həyata keçirilən tədbirlər məhz Ümummilli Liderin adı və fəaliyyəti ilə bağlıdır. Onun Azərbaycana rəhbərliyi dövründə bütün sahələrdə ölkəmizin milli mənafelərinin qorunmasına yönəlmiş bir sıra mühüm addımlar atılıb. Bu nailiyyətlər o vaxt hakimiyyətdə olan Ümummilli Liderin rəhbərliyi və prinsipiallığı nəticəsində mümkün olub.

Yeni dövrün tarixini də məhz Ulu Öndər yaradıb. Onun hakimiyyətə gəlişi ilk növbədə Dağlıq Qarabağ münaqişəsinin həlli üçün fəaliyyətə başlanılması, Rusiya və İran ilə münasibətlərin yoluna qoyulması, ölkənin xarici siyasət konsepsiyasının hazırlanması, daxili ictimai-siyasi və iqtisadi vəziyyətin düzəldilməsi ilə Azərbaycana şöhrət gətirdi. Torpaqlarımızın işğalı ən ağrılı məsələ idi. Hətta beynəlxalq ictimaiyyət və təşkilatlar Azərbaycanın haqlı olduğunu deyə-deyə işğalçıların irəliləməsinin qarşısını almaq üçün əməli tədbirlər görmürdülər. Ordu quruculuğuna yeni başlamış bir ölkənin müharibəyə sürüklənməsi, ərazisinin zəbt edilməsi tarixi cinayət idi. Buna görə də ilk baxışda göründüyü kimi işğalçı Ermənistanla yox, beynəlxalq aləmlə razılığa gəlib atəşkəsə nail olmaq lazım idi. Ulu öndər heç kimin dərk edə bilmədiyi bu amili vaxtında gördü və Rusiyanın moderatorluğu ilə cəbhədə atəşkəsə nail oldu. Gələcək fəaliyyət üçün bu addım nəfəs dərməyə imkan verdi. Məhz atəşkəs sayəsində dövlət digər vəzifələrlə məşğul olub ayağa qalxmağa nail oldu və yeni güc və qüvvə ilə işğalçılara qarşı mübarizəyə başladı. Respublikanın sosial-iqtisadi və siyasi problemlərinin müvəffəqiyyətlə həll olunması üçün demokratik dövlət quruculuğunun əsasının qoyulması tezliklə öz bəhrəsini verdi. Ölkəmizin beynəlxalq aləmdəki mövqeyinin güclənməsi, digər ölkələrlə milli dövlət maraqlarına cavab verən qarşılıqlı faydalı əlaqələrin yaranması və dünya birliyinə inteqrasiya prosesinin başlanması belə bir yolun seçilməsi ilə çox bağlı idi.

Ümummilli Lider həyatı boyu qazandığı təcrübə və bacarığı ilə bu çətin və mürəkkəb vəzifələrin öhdəsindən müvəffəqiyyətlə gəldi. Ölkəmizin sistemli şəkildə dünya birliyinə inteqrasiya olunmasında ikitərəfli və çoxtərəfli siyasi münasibətlərin genişlənməsi istiqamətində atılan addımlar mühüm əhəmiyyət kəsb etdi. Xəzər dənizinin Azərbaycan sektorundakı neft yataqlarının istismarına dair 1994-cü il sentyabrın 20-də imzalanmış “Əsrin müqaviləsi” ölkəmizin dünya dövlətləri ilə qarşılıqlı əlaqələrinin dərinləşməsi və beynəlxalq mövqelərinin möhkəmləndirilməsinə güclü təkan verdi. Bu, dahi dövlət rəhbərinin bütün dünyaya etdiyi çağırışın əks-sədası idi. Təsadüfi düril ki, sonrakı illərdə imzalanmış çoxsaylı neft müqavilələri Azərbaycanın dünya birliyinə inteqrasiyasının sürətləndirilməsində başlıca rol oynadı. 1998-ci il sentyabrın 7-8-də 32 dövlətin və 13 beynəlxalq təşkilatın nümayəndələrinin iştirakı ilə tarixi Böyük İpək Yolunun bərpası üzrə keçirilmiş Bakı beynəlxalq konfransı və onun nəticələri Azərbaycanın xarici siyasətinin qazandığı ən mühüm nailiyyətlərdən biri idi.

25 il əvvəl, 1994-cü il mayın 4-də Prezident Heydər Əliyevin Avropa İttifaqı ilə “Sülh naminə tərəfdaşlıq” proqramının çərçivə sənədini imzalaması Azərbaycanın beynəlxalq mövqelərinin möhkəmlənməsi istiqamətində atılan mühüm addımlardan biri oldu. Bu proqramın Azərbaycan üçün əhəmiyyəti ondan ibarətdir ki, ölkəmiz NATO-ya daxil olan Avropa ölkələri və ABŞ ilə dünya təhlükəsizlik sisteminin, eləcə də beynəlxalq münasibətlərin sivil qaydaları çərçivəsində hər cür əməkdaşlıq etmək imkanı qazandı.

Bütövlükdə Heydər Əliyevin ölkəmizə rəhbərlik etdiyi 1993-2003-cü illər Azərbaycan dövlətçiliyi üçün həlledici dövr olub. Məhz həmin illərdə dövlətimizin siyasi və iqtisadi strategiyasının möhkəm təməli qoyulub, Azərbaycan dünya birliyinin tam hüquqlu üzvünə çevrilməsi üçün zəngin irs ıldə edib.

Ötən əsrdə ölkəmizin keçdiyi yolun təhlili göstərir ki, bugünkü müstəqillik öz mənbəyini 1969-cu ildən başlayaraq Ulu Öndər Heydər Əliyevin Azərbaycana rəhbərlik etdiyi dövrdən götürür.

1993-cü ildə Azərbaycan Respublikasının Prezidenti seçilməsi ilə əlaqədar keçirilən andiçmə yığıncağında müdrik siyasətçi deyib: “Belə bir yüksək məsuliyyətli vəzifəni öz üzərimə götürərkən, birinci növbədə Azərbaycan xalqının zəkasına, müdrikliyinə, qüdrətinə güvənirəm, arxalanıram. Azərbaycan xalqının mənə bəslədiyi ümidlər məni bu vəzifəni üzərimə götürməyə məcbur edibdir. Əmin etmək istəyirəm ki, bu ümidləri doğrultmaq üçün əlimdən gələni əsirgəməyəcəyəm.

XX əsrin sonu dünyada köklü dəyişikliklərə səbəb olmuş siyasi proseslərlə əlamətdardır. Azərbaycan xalqı da bu proseslərdən kənarda qalmamış, nəhayət, əsrlərdən bəri bəslədiyi ümidlərinə, arzularına çatmış, öz müstəqilliyinə nail olmuşdur. Azərbaycan Respublikasının dövlət müstəqilliyi əldə etməsi dünyada, keçmiş Sovetlər İttifaqında gedən ictimai-siyasi proseslərin məntiqi nəticəsidir. Azərbaycan Respublikasının müstəqilliyi tarixi bir hadisədir. Bu, Azərbaycan xalqının milli sərvəti, milli nailiyyətidir və bu müstəqilliyin əldə olunmasında hər hansı qrupun, hərəkatın, qüvvənin müstəsna xidmətləri olduğunu heç vəchlə qəbul etmək olmaz. Eyni zamanda Azərbaycanın müstəqilliyi respublika qarşısında, onun vətəndaşları qarşısında çox böyük və mürəkkəb vəzifələr qoyubdur. Dövlət müstəqilliyini möhkəmləndirmək, müstəqil dövlət quruluşu yaratmaq, dövlət atributlarını yaratmaq və inkişaf etdirmək, Azərbaycan Respublikasının ərazi bütövlü-yünü, tam suverenliyini təmin etmək, ölkəmizi müharibə şəraitindən çıxarmaq, respublikanın vətəndaşlarının rifahını yaxşılaşdırmaq, onların yaşaması üçün lazımi şərait yaratmaq və bu vəzifələr mənim prezident fəaliyyətimdə əsas istiqamətlər olacaqdır və mən bunların həyata keçirilməsinə çalışacağam”.

Ulu Öndər çıxışında vətən, xalq qarşısında duran məsələləri aydın şəkildə göstərərək bunların həyata keçirilməsinin zəruriliyini vurğulamışdı. İllər keçdi, həmin yığıncaqda səsləndirilən tezislər Ümummilli Liderin rəhbərliyi altında uğurla icra edildi. Azərbaycan dünya arenasına çıxdı, regionun lider dövlətinə çevrildi, xalqın güzəranı yaxşılaşdı, ölkədə böyük quruculuq işləri başlandı və Azərbaycan günü-gündən gözəlləşən və sabitlik hökm sürən diyara çevrildi.

Müstəqil Azərbaycan Respublikasının qarşısında duran əsas vəzifələrdən biri respublikanın dövlət quruculuğunu təşkil etmək idi. Təcrübəli rəhbər bu yolun üfüqlərini aydın görür və dəqiqliklə onun planınını cızırdı. Müstəqil Azərbaycanda demokratik, hüquqi dövlət qurulmalı idi və bu dövlət Heydər Əliyevin layihəsi əsasında demokratik prinsiplər əsasında öz tarixi və milli ənənələrindən bəhrələnərək, dünya demokratiyasından, ümumbəşəri dəyərlərdən səmərəli istifadə edilərək quruldu. Bu gün Azərbaycan Heydər Əliyev irsindən istifadə edərək demokratik sivilizasiyalı cəmiyyət qurub və bu tendensiyanı sürətlə inkişaf etdirir. Dövlət həyatında müstəqilliyi möhkəmləndirmək üçün əsas vəzifələrdən biri ağıllı, səriştəli xarici siyasətin olmasıdır. Ulu öndər elə bir mükəmməl siyasi proqram işləyib hazırlayıb ki, ölkəmizin perspektivdə həyata keçirəcəyi strateji xətt indidən aydındır.

Dünya siyasətində cahanşümul əməlləri ilə tanınan Heydər Əliyev şəxsiyyəti bütün zamanlar üçün müdriklik rəmzidir. Onun ömür yolu böyük ideyayaların qoynunda keçibdir. Gündəlik yaşam tərzi, iqtisadi addımları, yeritdiyi siyasət, istifadə etdiyi diplomatik üsullar böyük rəhbərin uzaqgörənliyini, strateji təfəkkürə sahib olduğunu təsdiq edirdi. O, dövrünün siyasi liderləri ilə tən addımlayan dövlət xadimi kimi Azərbaycan xalqının qəlbində əbədi məskən salıb.

N.NOVRUZ

Mövqe.- 2019.- 3 oktyabr.- S.3