“ASAN Xidmət” ölkələri asanlıqla fəth edir

Xalqa xidmətin Azərbaycan nümunəsi mükəmməlliyi və müasirliyi ilə geniş tanınıb

Azərbaycanın məşhur “ASAN xidmət” mərkəzinin işi şəffaflıq, vətəndaşlarla nəzakətli davranış və məsuliyyət prinsipləri əsasında qurulub. Bu gün “ASAN xidmət” mərkəzlərində vətəndaşlara 10 dövlət orqanı, həmçinin özəl şirkət və müəssisələr tərəfindən ümumilikdə 250-dən çox müxtəlif xidmət göstərilir. Prezident İlham Əliyevin tapşırığına əsasən, qısa müddətdə “ASAN xidmət” ölkənin böyük ərazisini əhatə edib. Hazırda ölkədə 20-ə yaxın “ASAN xidmət” mərkəzi fəaliyyət göstərir. Əslində isə səyyar xidmət sayəsində bütün əhali bu xidmətdən yararlanır. Bütün bunlar dövlət qulluqçusu-vətəndaş münasibətlərində yeni yanaşmanın formalaşmasında Azərbaycan dövlətinin həyata keçirdiyi siyasətin mühüm tərkib hissəsidir. Bundan başqa, Azərbaycan nümunəsi əsasında Əfqanıstanda “ASAN xidmət” adlı qurum yaradılıb.

Azərbaycanda “ASAN xidmət”in yaradılmasının əsas üstünlüyü bir neçə dövlət qurumunu bir orqanda cəmləşdirilməsidir: Bu xidmət ilk dəfə ölkəmizdə tətbiq olunub. Qısa müddətdə səmərəliliyi sayəsində böyük şöhrət qazandığından bir çox ölkə “ASAN xidmət”lə maraqlanıb və üstün cəhətlərinə görə ondan faydalanmaq arzusunu bildirib. Həmin ölkələr bu xidmətin öz ərazilərində də tətbiq olunmasını istəyiblər. Çünki, “ASAN xidmət” yarandığı gündən etibarən hər kəsin sevdiyi quruma çevrilib.

Məsələ burasındadır ki, hər bir ölkənin müvafiq idarəetmə forması var. “ASAN xidmət” modeli isə bütün dövlətlərin istəyinə uyğundur. Çünki, xidmət vətəndaşların istəyini qısa müddətdə həyata keçirir. Bu da bir sıra ölkələrdə böyük marağa səbəb olub. Onların “ASAN xidmət” modelindən istifadəyə can atmaları, bu metodu tətbiq etmələri sevindiricidir. Ona görə ki, “ASAN xidmət” Azərbaycana məxsus innovasiyalı müasir idarəetmə texnologiyası kimi xarici ölkələrə ixrac edilir. Məhz, ixrac məhsulu kimi “ASAN xidmətin” beynəlxalq arenada təbliğatını aparmaq və daha çox ölkəyə ixrac etmək başlıca məqsədlərdəndir. Hazırda ASAN Beynəlxalq Assosiasiyasının formalaşdırılması prosesi gedir. Ötən ilin dekabrında 8 ölkə ilə birgə nizamnamə layihəsi razılaşdırılıb və hazırda həmin dövlətlər sənədi öz ölkələrində ratifikasiya etməlidir. Bu proses ilin 2020-ci ilin birinci yarısında yekunlaşmalıdır. Assosiasiya layihəsini imzalayan dövlətlər Azərbaycan, Mərakeş, Monteneqro, İndoneziya, Əfqanıstan, Türkiyə, Uqanda və Birləşmiş Ərəb Əmirlikləridir. Ümumilikdə isə bu istiqamətdə 13 ölkə ilə iş aparılır.

“ASAN xidmət”ə marağın belə böyük olması onunla əaslandırılır ki, müasirlik baxımından əvəzedilməzdir və mənfi halların aradan qaldırılması istiqamətində olduqca böyük səmərə verir. Düzdür, bu cür xidmətlərin tətbiqi dərhal baş vermir. Bunun üçün müvafiq hüquqi və qanunverici baza yaradılmalı, dövlət qurumlarının fəaliyyətində informasiya-kommunikasiya texnologiyalarının tətbiqi istiqamətində əhəmiyyətli işlər görülməlidir. Bugün Azərbaycanın əksər dövlət orqanlarında əhaliyə elektron xidmətlərin göstərilməsi təmin edilib. Bu xidmətlər bürokratik əngəlləri və mümkün korrupsiya hallarını aradan qaldırır. Xidmətin tətbiqində maraqlı olan dövlətlərin kontingentinə diqqət edəndə görünür ki, mənfi vərdişlərin daha çox olduğu dövlətlər bu işdə daha israrlıdırlar. Çünki, ehtiyacları böyükdür.

“ASAN xidmət” təkcə ətalərə, bürokratiyaya, korrupsiyaya və digər bu kimi hallara qarşı mübarizədə 100 faizli nəticəyə nail olmaqla yanaşı ədalət məhkəməsindən gizlənən cinayətkarların tapılıb üzə çıxarılmasında və aidiyyatı orqanlara təhvil verilməsində də ciddi nəticələr əldə edir. Çünki, xidmətin hüquq – mühafizə orqanları ilə birgə müəyyən etdiyi konkret prosedurlar var. Azərbaycandakı hər “ASAN xidmət” mərkəzinə gündəlik 2000–2500 şəxs daxil olur. Onlardan bəzən gün ərzində 3 və ya 4 nəfər axtarışda olan şəxs saxlanılaraq hüquq –mühafizə orqanlarının əməkdaşlarına təhvil verilib. Hətta İnterpol xətti ilə axtarışda olan şəxslər də mərkəzlərdə xidmətdən yararlanarkən aidiyyəti orqanlar tərəfindən saxlanılıblar. Bu isə terrorçuların tüğyan etdiyi Yaxın və Orta Şərq ölkələrində tətbiq etmək üçün gözəl və səmərəli fürsətdir. Heç şübhəsiz, yaxın bir neçə ildə “ASAN xidmət” daha geniş ərazilərdə beynəlxalq şəbəkəyə malik olacaqdır.

N.NOVRUZ

Mövqe.- 2020.- 30 yanvar. S. 5.